Sa cida sulcitana in curtzu. S’anàlisi de su votu in su collègiu de Carbònia - Igrèsias
Cida passada eus votadu pro is eletziones regionaleles e imoi, mancai non siant ancora definitivos, sunt disponìbiles giai totus is datos de su collègiu nostru (ammancant sceti unas milla ischedas de su comunu de Giba) si podet provare a analizare su resurtadu de su votu.
S’affluèntzia est calada meda in Sant’Antiogu (-10,5%) prus pagu in Gonnesa, Tratalias e in Santadi ma est aumentada meda in totu is àteros comunos ( +11% in Portescusi e +5% in Igrèsias) e su resurtadu totale est de su 51,32% e duncas asserit a èssere 3 puntos prus arta de su 2014.
Christian Solinas at pigadu su 49,11% de is votos pro su presidente e at bintu in dònnia comunu de su collègiu nostru francu che in Carloforte aundi at bintu Massimo Zedda chi s’est firmadu a su 30,6%. Su distacu in su collègiu est mannu meda ma est bastante variàbile: si andat dae su 40% de mèdia de su Sulcis de Bàsciu (ispantosos is 60 puntos de Narcau), prus “piticu” in is comunos prus mesanos (prus de su 25% in Santuanni e Domus Noas ), su 15% in Sant’Antiogu e Igrèsias e sceti su 5% in sa ex fortinu arrùbiu de Carbònia.
Pigat su 10,73% Francesco Desogus de su M5S cun risurtados giai uguales in dònnia comunu; sa lista invècias s’est firmada a su 9,6%. Custu resurtadu pro gente meda est unu fallimentu si est cunfrontadu cun su 42% de is eletziones polìticas de s’annu passadu o fintzas cun is comunales de Carbònia e Igrèsias candu a su primu turnu de cussas eletziones aiant pigadu prus de su 20%, ma sende ca is leaders natzionales ant lassados a solos is candidados grillinos chi pro sa primu borta faghiant una cumpetitzione de custu tipu non sunt andados mancu tropu male.
Andat bene cunfronta a su datu regionale Mauro Pili chi pigat su 5.7% ma chi at pèrdidu prus de sa metade de is votos chi aiat pigau in is eletziones de su 2014. Paolo Manichedda at pigadu pagu prus de su 2% e fatu bastante curiosu at pigadu 28 votos de mancu de sa lista sua. Firmos asuta de su 2% is indipendentistas de Autodeterminatzione e pagu e nudda est andadu a is comunistas de Vindice Leccis (0,4)
In sa coalitzione de centru-dereta su primu partidu est su PsdAz cun su 11,3% chi at pigadu pagos votos in prus de sa Lega chi at tentu benefìtziu mannu dae is comìtzios de su Ministru de s’Interno Salvini. Bene meda FdI chi aumentat de prus de 3 bortas is votos cunfrontos a 5 annos agoa e arribende a su 7,37%. Male est andadu s’UDC chi est caladu a su 4,6% ma at aguantadu bene in Igrèsias. Male meda puru Fortza Italia chi dae 15% s’est firmada a su 3,6% e duncas est fàtzile chi is votos suos siant andados in bona parte a in sa lista Sardegna 2020 (7,22%) e a Sardegna Civica (2,9%).
In sa coalitzione de centru-manca mancai su PD apat pèrdiu giai 4500 votos sighit a abarrare su primu partidu in su Sulcis cun s’11.8%. Chini est andada bene meda est sa lista de LEU chi cun su 6,9% chi est essida puru su primu partidu in is comunos de s’arcipèlagu e du su Sulcis de Bàsciu. Resurtadu discretu pro Campo Progressista e “Noi La Sardegna con Massimo Zedda” chi sunt a curtzu de su 4%.
A cantu parit sunt averguende incora is ischedas de 30 sègios in Sardigna proite chi is eletores ant fatu errores errores votende pro mori de su fatu chi in s’ischeda, manna che una tialla, ddoe fiant is sìmbulos de is partidos a parte e àtera de su nùmene de su candidadu e duncas is datos non sunt definitivos e ancora non si scit chini ant a èssere is consilieris regionales sulcitanos.
Sigundu is contos de is partidos sunt siguros sceti Fabio Usai chi est su prus votadu de totu su collègiu (3300 votos) e Michele Ennas de sa Lega chi iat a dèper intrare cun mancu 900 votos. Est ancora baddende sa sègiu de Gigi Rubiu chi fortzis podet andare a su collègiu de Aristanis. Su chi est siguru est chi pro sa primu borta is listas chi sunt eredes de sa grandu traditzione de is partidos de sa manca no mandant mancu unu rapresentante a sa màssima assemblea regionale e de siguru custu fatu at a abèrrere arresonos in is grupos dirigentes locales.
Un’àtera cosa puru est sigura: cust’orta su sistema eletorale sardu – proportzionale cun su territòriu ispartzidu in collègios de mannària diferente (piticheddu su Sulcis, mannu meda Casteddu) – e su resurtadu chi ant tentu is listas locales postu in pari a su giogu de is cuotzientes prenos e de is restos non sunt istados generosos cun su territòriu nostru proita chi perdeus assumancus unu rapresentante. Duncas est netzessàriu chi s’assemblea noa curregiat custa impostatzione a manera de assigurare a dònnia territòriu sa rapresentàntzia chi est prevista in sa lege.
Roberto Pinna
