Sa cida sulcitana in curtzu Dae su 18 a su 24 de freàrgiu
Lunis 18: pro totu sa cida in su Palàssiu de su Capìtulu in Sant’Antiogu ant fatu una mostra de su fundu chi contat prus de milla libros chi fiant de sa psicologa e professora universitària Anna Carla Tocco. Is parentes de sa professora Tocco ant a donare una parte de is libros, chi tratant pruschetotu de piscologia analìtica e de psichiatria infantile, a sa biblioteca de Sant’Antiogu e duncas est fàtzile chi siant de agiudu pro is istudentes de totu su Sulcis.
Martis 21: ancora una multa pro is piscadores abusivos de arritzones de mare. Cust’orta sa Guàrdia Costera at cassadu unu grupu de sub in Carloforte chi aiant giai pigadu 3000 arritzones postos in 8 cascitas e chi fiant ancora bivos. Duncas is militares nche-ddos ant torrados a ghetare a mare e ant scercuestadu totus is ainas de is subàcueos e ddos ant postos una multa manna meda.
mèrcuris 20: Mancai nche fessit una spècia de “tregua eletorale” at sighidu a andare a innantis sa protesta de is pastores chi sunt dimandende a is industriales chi su late bengat pagadu assumancus a un’èuru prus s’IVA. Mèrcuris a mangianu 4 òmines mascarados at firmadu unu mezu de unu caseìficu de Gùspini chi trasportaiàt unus deximila litros de late e dd’ant isboidau in mesu de sa SP 94 a pagu tretu de Tratalias. S’autista mancai unu pagu atzicadu at telefonadu a is Carabineris chi si sunt postos a indagare.
Giòbia 21: su Comunu de Sant’Antiogu at fatu tres parchègios a colore de arrosa (acanta de is potecarias de arruga Roma e pratza Umberto, e acanta a su poliambulatòriu de arruga Rinascita) chi sunt destinados a is fèmminas prìngias o chi tenint unu pipieddu piticheddu. Su sìndigu Nàssiu Locci at ispiegadu chi custa genia de parchègiu no est prevista in su còdighe de s’istrada e non si podint pònnere multas e duncas si custa initziativa at a funtzionare at a dipèndere totu dae su sensu cìvicu de is citadinos.
Cenàbara 22: cun is comìtzios de Matteo Salvini fatos giòbia a primu note in su ristorante Tanit de Carbònia (aundi at atobiadu puru unu grupu de pastores) e cenàbara a mangianu in pràtza Sella in Igrèsias est acabada una de is peus campagnas eletorales chi eus bistu in Sardigna. Grupeddos de giòvanos ant cuntestadu su leader de sa Lega e custu at arrìspundidu cun pagu istile. In custa campagna eletorale is candidados, de calisisiat ischieramentu, ant chistionadu pagu nudda de programmas e bideas e pruscatotu si sunt intèndidos insultos e ofesas a is personas.
Sàbudu 23 Custa cida, sende ca su tempus fiat bellu meda, sunt torrados a lòmpere piciocos dae s’ Algeria in su Sulcis. In totu sunt arrinbadas 40 personas. 12 sunt isbarcadas dòminiga passada in Porto Pino; giòbia e cenàbara a de note sa Guàrdia de Finantza de Sant’Antiogu at intercetadu duas barchitas in mesu de mare (13 e 15 personas) e ddas at agiudadas a lòmpere a su portu industriale de Ponti. Comente dònnia borta nde-ddos ant pinnigados isfFortzas de s’òrdine e nche-ddos ant lòmpidos a Casteddu pro is protzeduras de identificadura e espulsione.
Domìniga 24: s’est votadu pro is eletziones regionales. S’afluèntzia in su Sulcis fiat unu pagu prus arta cunfronta su 2014, cun sa punta de su 5% in prus in Igrèsias. Su resurtadu est bastante sìmbile a cussu de su restu de s’Ìsula: at bintu sa coalitzione de centru-dereta chi proponiat su cabuderresu Christian Solinas a presidente (49,1%). Atesu meda su centru-manca de Massimo Zedda (30,6%) prus atesu ancora su M5S (10.7%). Andat discretamente s’igresiente Mauro Pili chi at pigadu su 5.2, firmu a su 2.1% Paolo Manichedda, pagu e nudda ant pigadu is indipentistas de Autoderminatzione e is Comunistas de Vindice Leccis (1,8% e 0,5%). A cantu parit dae su collègiu nostru, pro mori de su giogu de is cuotzientes, sunt essidos sceti 3 consilieris regionales in logu de 4 e sunt totus in magioranza. Si tratat de su consilieri comunale de Carbònia Fabio Usai cun su PsdAz chi tenit su record de preferèntzias in su collègiu (3291), is igresientes Gigi Rubiu chi at agatadu cunfirma cun FdI (2644 preferèntzias) e su leghista Michele Ennas chi nc’est essidu sceti 876 preferèntzias es. Sunt igresientes puru Giorgio Oppi (intradu sa primu borta in Consìliu Regionale in su 1979) e Carla Cuccu de su M5S chi fiant candidados in su collègiu de Casteddu.
Cida chi benit eus a oberare unu pagheddu de “spàtziu” de custa rubrica pro arresonare, con prus datos disponìbiles, in contu de su resurtadu de custas eletziones.
Roberto Pinna
