NOTA! Questo sito utilizza i cookie e tecnologie simili.

Se non si modificano le impostazioni del browser, l'utente accetta.

Approvo
18
Tue, Jun
33 Nuovi articoli

Sa cida sulcitana in curtzu Dae su 3 a su 9 de mese de Idas

Novas in Sardu (LSC)
Aspetto
Condividi

Sa cida sulcitana in curtzu Dae su 3 a su 9 de mese de Idas:

Lunis 3: In sa ex sede de sa chi fiat sa provìncia de Carbònia-Igrèsias, a lestru ant a aprontare 50 postatziones telemàticas e duncas is istudentes de 5 cursos de làurea de s’universidade de Casteddu a cumentzare dae su mese de martzu chi benit cun s'agiudu de is tutors ant a sighire is cursos de Scientzias de sa communicatzione, Amministratzione e organizatzione, Benes Culturales e Ispetàculos e is cursos de Ingegneria informàtica, elètrica e eletrònica. S’idea est cussa de donare una manu de agiudu a su territòriu permitende puru a giòvanos chi tenent problemas a viagiare o a personas prus a innantis cun is annos de si formare sena de dèper andare a marolla a Casteddu.

Martis 4: a bellu a bellu est cumpletende-sì su cuadru de is candidados a presidente pro is eletziones regionales de friàrgiu chi benit. Francesco Desogus, 59 annos e impiegadu in sa biblioteca de sa Citade Metropolitana de Casteddu, at bintu de su ballotàgiu de su Movimentu a 5 Isteddas e duncas at a èssere issu su candidadu a presidente. In su mentris una parte de sa galàssia manna de su mundu indipendentista abetat su resurtadu de is primàrias on line propostas dae su Partidu de is Sardos chi ant a acabare su 16 de custu mese: in mesu de is 5 candidados, in prus de Paolo Maninchedda assessore in sa giunta Pigliaru, ddoe at puru s’ingegneri de Giba Matteo Murgia.

Mèrcuris 5: su Cunsòrtziu de Bonìfica de sa Sardigna de Bàsciu at pèrdidu una càusa contras a un’agricoltore de Biddiarriu chi dae su 2010 aiat lassadu de pagare is cuotas proite chi, pro mori de is pèrdidas de is condotas, no arrinnesciat prus a acuare is terrenos suos. Custu agricoltore aiat giai bintu in primu gradu (intzandus ancora s’ente si naraiat Consòrtziu de Bonìfica de su Sulcis) e su giugi de apellu at cunfirmadu s’arrexoni a s’agricoltore chi imoi at at a arricere 4000 mila èuros dae su Consòrtziu pro pagare is abogados suos.

Giòbia 6: Sa RAS at pubblicadu sa graduatòria provisòria de unu bandu pro finantziare òperas pùbblicas e infrastruturas de interessu comunale e subracomunale. A su primu postu postu pro sa provìntzia de su Sud Sardigna e de Sa Citade Metropolitana ddoe est su ponte de Sant’Antiogu. Duncas sa RAS at a pònnere 400mila e àteros 100mila ant a arribare dae su bilànciu comunale. S’ant a fàghere traballos in s’esternu de s’istrutura a manera de donare una bella assetiada a s’intònacu chi acarrargiat is plintos e is armaduras de atzàrgiu pro ddas amparare de is agentes atmosfèricos (pruscatotu s’àcua pròina e s’ària salida chi currodint cun facilidade custa genia de istruturas).

Cenàbara 7: est incumentzada cun d-unu sutzessu mannu de pùbblicu Nuvole Parlanti chi a pustis de 18 annos est torrada in Carbònia. in s’ex diretzione de La Grande Miniera de Serbariu gente meda at ascurtadu a Sergio Staino e at bisitadu sa mostra de is robot protagonistas de is cartones animados de is annos 70 chi ant cuncordadu. Fiat prenu a intipu de pipios su laboratòriu fatu sàbudu dae s’illustradora Monica Portolona in sa biblioteca comunale.

Sàbudu 8: fiat sa festa de sa Purissima e s’usàntzia noa bollit chi si fatzat su presèpiu e si cuncordit sa mata de Nadale e chi incumentzint puru is ispetàculos chi is amministratzione comunales apariciant pro is festas de Paschixedda. In Masainas at tentu unu sutzessu mannu s’sipetàculu de coros polifònicos fatu in sa crèsia de Santu Giuanni pro regordare a Vadore Sini chi fiat su poeta chi aiat iscritu A Diosa prus connota cun su nùmene de No Potho Reposare. In Sant’Antiogu cun s’abertura de sa villàgiu de Babbo Natale est incumentzadu su calendàriu de eventos chi at a acabare su 6 de gennàrgiu aundi sunt previstos laboratòrios pro fàghere giocàtulos, giros cun su trenixeddu in mesu de sa bidda e esibitziones musicales.

Domingu 9: is campionados diletantes de fubalu sunt arribados a sa de 13 giorronadas de su girone de andada. In su girone A de su campionadu de promotzione su Carbònia e su Bidda Massàrgia tenint 24 puntos e sunt a su de 3 postos e in bona positzione pro andare a is playoff, sunt ùrtimos cun 9 e 4 puntos sa Monteponi e su Carloforte chi sunt circhende de si sarvare. In su girone B de sa prima categoria sunt primas cun 31 puntos e 30 puntos su Cortoghiana e sa Fermassenti, trancuillu a 24 puntos s’Atletico de Villaperùciu, prus a coa s’Isola de Sant’Antioco e su Narcau chi però sunt bene postos pro si sarvare cun trancuillidade. In su girone C de sa segunda categoria s’Antiochense 2013 est a su primu postu paris cun sa Monreale, a su segundu postu sighit su Masainas chi est sceti 2 puntos a coa.
Roberto Pinna