NOTA! Questo sito utilizza i cookie e tecnologie simili.

Se non si modificano le impostazioni del browser, l'utente accetta.

Approvo
20
Wed, Mar
44 Nuovi articoli

Sa cida sulcitana in curtzu. Dae su 26 de donniassanti a su 2 de mese de idas

Novas in Sardu (LSC)
Aspetto
Condividi

Sa cida sulcitana in curtzu. Dae su 26 de donniassanti a su 2 de mese de idas:

Lunis 26: s’Amministratzione Comunale de Carbònia at presentadu unu bellu programma de manifestatziones pro afestare is 80 annos de sa tzitade (sa data pretzisa de su “compleannu” est su 18 de custu mese). A pustis de 18 annos torrant “Nuvole Parlanti” chi est una rassegna de “nuigheddas” (is “fumetti” in italianu) cun sa presèntzia de artistas famados de su setore (pro esèmpiu Bepi Vigna e Sergio Staino); ddoe ant a èssere mostras fotogtàficas a in donu in totus is museu citadinos; e a ùrtimu no ant a mancare is ispetàculos musicales, teatrales e de su chi si narat “varietà”.

martis 27: Sa cummissione agricoltura de su Consìliu Regionale at ascurtadu Antonello Pirosu, Laura Cappelli e Antonello Cocco chi sunt is sìndigos de Villaperùciu, de Bugerru e Flùmini Majori chi ant faeddadu de is problemas chi ant tentu is amministratziones comunales de sa zona de su Sulcis-Iglesiente in contu de sa valutatzione e su pagamentu de s’iscònciu fatu dae su tempus malu de ocannu. In s’auditzione is sìndigos ant ispiegadu is problemàticas chi sunt pruscatotu de tipu burocràticu – in sìntesi a una parte pagu personale in is comunos e a s’àtera parte is tècnicos e funtzionàrios regionales chi no arrexonant e aplicant sceti is regulas insoru. Is consilieris de V cummissione ant ispiegadu ca issos non podent fàghere nudda in manera dereta ma ant promìtidu de interessare diretamente is assessorados cumpetentes (agricoltura e assentu de su territòiu) dae is cales dipendent is agentzias regionales pro chi circhint de risòlvere custos problemas chi pertocant totu su territòriu regionale.

mercuris 28: ormai is eletziones regionales sunt incurtzende e is ischieramentos printzipales ant decìdidu is candidados insoru. Est cunfirmada sa candidadura de su senadore sardista (elìgidu cun sa Lega) Cristian Solinas pro su centru-dereta. Massimo Zedda chi est sìndigu de Casteddu e est circhende de cunvìncere is indipendentistas de Autoderterminatzione a intrare in coalitzione de centu-manca. Non si ischiet ancora nudda de su M5S (sunt aspetende su resurtadu de is regionàrias on line) chi a pustis de su 40% e prus de is eletziones polìticas fiat cunsideradu su “grandu favoriu” de custas eletziones ma is candidados fortes meda de is àteras coalitzione lassant abertas totu is possibilidades. In custa rubrica, in is cidas chi benint, eus a circare de donare calincuna informatzione in contu de is candidados de su collègiu nostru.

Giobia 29: in Sant’Antiogu e in Caleseda is Carabineris de sa cumpangia de Carbònia a s’obrescidroxu ant incumentzadu un’operatzione antidroga in sa cale ant arrestau 6 personas (2 ancoras sunt circhendi-ddas a s’èsteru) e ant scercuestadu 2,5 kilos de marijuana agatados in d-una serra artificale. Custa operatzione est su resurtadu de 2 annos de indagines chi ant postu a un’oru una banda de personas chi fiant prontos a punire in mala manera is chi non pagaiànt is dèpidos de droga.

Cenàbara 30: sighint is dudas de is sindacados in contu de su progetu de sa Sider Alloys pro modernare s’impiantu de Portovesme. Ancora non si connoscet su pianu industriale de sa sienda isvìtzera e lassat dubitosos s’idea de una sala eletròlisi noa proite chi serbint assumancus 2 annos pro dda fàghere e a s’acabu de s’annu iscadint is ammortizadores sociales e duncas sa CISL dimandat a sa Sider Alloys de pigare totus is ex traballadores in s’orgànicu in manera de donare unu sinniale forte a su territòriu e de garantire s’atzessu a sa cassa integratzione pro is operàios.

Sàbudu 1 de mese de idas: in Masainasis piciocos chi ant partecipadu a “Promemoria Auschwitz – il treno della memoria” ant contadu s’esperièntzia insoru. Custu fiat unu viàgiu de formatzione organizadu a livellu natzionale dae S’ARCI in pari a s’assòtziu torinesu Deina, chi prevediàt de andare in trenu a bisitare is logos prus sìmbòlicos (su campu de Auschwitz e su ghetu de Cracòvia) chi ant bistu miliones de personas umans ispèrdidas dae su machìmine nazista. Interessantes is fueddos de su vicesìndigu Ilaria Portas chi at ispiegadu bene s’importu de custu tipu de initziativas pro sa formatzione de sa cuscèntzia de is personas prus giòvunas.

domìnigu 2: s’obispu Giovanni Paolo Zedda at nomenadu is predis chi ant a andare in 6 parròchias de sa diocesi nostra. Don Andrea Zucca est su predi nou de Santu Pontzianu in Carbònia; don Maurizio Mirai andat a sa Biada Vìrgini de su Rosàriu in Sa Baronia-Villaperùciu; don Nicola Fadda e don Mauro Coni sunt is amministradore parrochiales de is crèsias de Santu Giusepi de Biddearriu (fratzione de Giba) e de Arriu Murtas (fratzione de Narcau); don Gianfranco Nonnis est su vicàriu parrochiale de is crèsias de Santu Pontzianu e Cristu Re in Carbònia; don Marco Olianas est vicàriu parròchiale de Santu Pàuli e de su Coru Sagradu de Igrèsias.

Roberto Pinna