NOTA! Questo sito utilizza i cookie e tecnologie simili.

Se non si modificano le impostazioni del browser, l'utente accetta.

Approvo
20
Wed, Mar
44 Nuovi articoli

Sa cida sulcitana in curtzu. Dae su 19 a su 25 de donnniassanti

Novas in Sardu (LSC)
Aspetto
Condividi


Sa cida sulcitana in curtzu. Dae su 19 a su 25 de donnniassanti

Lunis 19: ancora no ant agatadu is 8 personas chi si-nche fiant ghetadas a s'àcua pro lòmpere a terra annadende e invècias sunt abarradas ispèrdidas in su tentativu de isbarcu chi ant fatu su fine de cida passada. In su mentris ant arrestadu, cun acusas graves meda (favoressimentu de s’immigratzione clandestina e morte in segus de àteru crìmine) su chi si pentzat chi siat s’iscafista chi fiat guidende sa barchita.

Martis 20: Gigi Rubiu, chi est consilieri regionale de FdI, at presentadu un’interrogatzione pro connòschere ita ideas tenet sa regione in contu de su Parcu Geomineràriu. Rubiu at arregordadu ca tempus agoa est arribada una lìtera de s’Unescu chi annuntziaiàt s’abertura de una protzedura informale in contu de sa gestione de su parcu, e duncas bòllet ischire ita bollat fàghere sa giunta regionale pro chi su patrimòniu de is àreas mineràrias bessat unu volanu de isvilupu pro totu su territòriu.

Mèrcuris 21: In sa crèsia de Santa Maria Goretti de Sant’Antiogu, comente est traditzione dae annos, ant afestadu sa Virgo Fidelis chi est patrona de s’Arma de is Carabineris. A sa missa, celebrada dae don Elio Tinti, ddoi fiat sa camundante de sa Cumpangia de Carbònia, su capitanu Lucia Di Lio e is rapresentates de is àteras fortzas de s’òrdine e is sìndigos de su territòriu.

Giòbia 22 in sa sede operativa de sa politzia municipale de Igrèsias ant incingiadu s’impiantu de videosorvegliantza pro mèdiu de su cale s’at pòdere controllare in manera costante ita acuntessit in citade. In totu nc’ant a èssere una cincuantina de aperèchios (4 sunt mòbiles pro cuntrastare is reatos ambientales), pagados in parte dae sa RAS e in parte dae s’amministratzione comunale. In custa manera s’iant a dèper prevènnere totus is “cumportamentos” e atziones dannàrgias e atos vandàlicos chi massimamente in ùrtimos meses sunt acuntèssidos in su centru de Igrèsias. In prus su sistema de telecàmeras at a permìtere de controllare su volumu de tràficu chi intrat in Igrèsias.

Cenàbara 23: sighint is traballos pùbblicos in Sant’Antiogu: de chi ant acabadu de asfartare de bellu e nou 25 arrugas de su centru istòricu, cun su dinari chi est abarradu de su ribàsciu de s’asta, s’amministratzione comunale at detzìdidu de a asfartare sa parte prus manna de arruga Matteotti, (est s’istradone printzipale chi dae s’intrada de Sa Idda faghet de circonvallatzione esterna pro andare conca a Caleseda) e in prus cun dinari bogadu dae su bilànciu comunale s’ant a arrangiare is marciapiedis e s’ant a pònnere làntiones pùbblicos in puntos prus perigulosos de cussa arruga etotu.

Sàbudu 24: est incurtzende s’acabu de s’annu e est tempus de bilàncios de su Piano Sulcis. In s’ùrtimu report disponìbile (a su 31 de mese de ladàmine) si ligit ca fintzas a imoi de 1 milardu e 243 miliones de èuros disponìbiles (840 miliones de dinari pùbblicu su chi abarrat sunt investimentos privados) ndi asserint impegnados 840 miliones ma su tanti licuidadu a manera efetiva est sceti de 140 miliones de èuros. Su coordinadore Tore Cherchi at decraradu ca si prevedint in totus unus 4500 postos de traballu candu ant a intrare a regime totus is investimentos (giai totus sunt in su polo industriale de Portovesme). S’ impegnu de dinari est bastante bonu ma cun is licuidatziones si trigat tontesamente e a parrei de Cherchi sa curpa est de sa burocratzia: is procedimentos autorizativos sunt longos meda e nc’at problemas organizativos e duncas cuntzillat de intervènnere pro resolvere custos problemas (comente chi custas cosas non si scipiant giai de ora meda).

Domìnigu 25: in Santadi est andada bene meda sa de XVI editziones de “Pane e Olio in frantoio”. Mancai su tempus non fessit bonu pro nudda (fiat sulende bentu fridu e fatu fatu ghetaiàt àcua), in 200 a pee e 50 a cuaddu ant pigadu parte a s’escursione organizada dae sa Fundatzione de su Camminu de Santa Bràbara chi est partida dae su putzu sagradu de Tatinu (in comunu de Nuxis) e est acabada in sa pratza de Santadi. Un’àteru tanti uguale fiant is chi sunt andados a “La grande arrampicata” a bicicreta in montes de Pantaleu cun sa ghia de is “Pedali Santadesi”. Est andada gente meda puru a bisitare situ pùnicu de Pani-Lòriga, su museu archeològicu e su museu etnogràficu (500 bisitadores in totu) e in medas si sunt istentados a passilare in mesu de is paradas cuncordadas a ingiriu de sa pratza e a pustis ant prenu totus is ristorantes e is agriturismos de sa zona.
Roberto Pinna