NOTA! Questo sito utilizza i cookie e tecnologie simili.

Se non si modificano le impostazioni del browser, l'utente accetta.

Approvo
20
Mon, Aug
23 Nuovi articoli

Sa cida sulcitana in curtzu. Dae su 14 a su 20 de maju

Novas in Sardu (LSC)
Aspetto
Condividi


Sa cida sulcitana in curtzu. Dae su 14 a su 20 de maju


Lunis 14: Tito Boeri, chi est su presidente de s’INPS, at arrispùndiu cun d-una lìtera a su sìndigu de Carbònia chi in is dies passada dd’aiat iscritu dimandende de non serrare sa sede operativa de Carbònia. Boeri at ispiegadu ca sa sede de Carbònia e su “punto INPS” de Giba no ant a serrare ma antzis ant a èssere potentziados a lestru e duncas, assumancus pro su chi pertocat is ufìtzios, is amministradores de su Sulcis non si depet pigare nisciuna cimbella.

Martis 15: sa Guàrdia de Finantza at scercustadu una discàrriga abusiva in sa zona industriale de Portovesme. In d-unu terrenu de propriedade de s’ENEL de 25mila metros cuadros ant agatadu trambullanas e botos suterrados prenus de arrefudos perigulosos. Sa Procura est indaghende pro cumprèndere chini e candu nc’apat interradu custa àliga ca est dannàrgia meda pro s’ambiente. A sa primu castiada parit chi is arrefudos siant cuados asuta de terra dae assumancus 20 annos e chi tengant su pesu de unas 40mila tonnelladas .

Mèrcuris 16: sa Madonna de Monserrat, connota puru cun su nùmerene de Maria Munserrara, sa Reina de su Sulcis e Patrona de sa diocesi nostra, est torrada a sa seu de Igrèsias de chi cenàbara passadu nche-dd’iant lòmpida a tratori a sa ex catedrale de Tratalias. A acumpangiare sa Santa, a s’essida e a sa torrada, e puru in prucessiones chi ant fatu in Tratalias e in sa sosta de Gonnesa, ddoe fiat gente meda e de dònnia edade. Custu est unu bellu sinniale de sa fidi e de s’atacamentu forte chi is suclitanos tenent pro is traditziones insoru.

Giòbia 17: Is sìndigos sulcitanos aiant domandadu un’atòbiu a s’assessore a sa sanidade Luigi Arru ma sigumente no aiat arrispùndiu sunt andados a su pròpiu a s’assessoradu in Casteddu. Comente sunt lòmpidos sa guàrdia in s’intrada nche-ddos at bogados e a cantu parit est arribada puru sa DIGOS ma de chi ant bogadu is fàscia a tres colores ddos ant fatos intrare e s’assessore Arru cun su capu de gabinetu si sunt iscusados pro su chi fiat acutèssidu. In su mentris chi is sindigos fiant abetende, casu istranu, est allòmpida sa cunvocatzione pro su 24 de custu mese. Is sìndigos ant intregadu unu documentu aundi dimandant ita bideas tenet s’assessore pro su sistema sanitàriu sulcitanu e bolent arrispostas craras e pretzisas in su pròssimu atòbiu.

Cenàbara 18: su ministru Calenda at annuntziadu in manera ufitziale chi is traballadores pro sa primu borta in Itàlia ant a intrare, in manera isperimentale, in su capitale de una sienda, infatis sa Sider Alloys at deliberadu s’aumentu de capitale e modifichende s’istatu pro permìtere de fagher intrare is rapresentantes de is traballadores in su comitadu de vigilàntzia.

Sàbudu 19: in Teulada, mancai su tempus non fessit siguru, at tentu unu resurtadu bellu meda sa “Primavera Teuladina” sa manifestatzione organizada dae s’amministratzione comunale e sa pro loco in pari a totus is assòtzios locales: in is pratzas e is domos de su centru istòricu ant fatu ballos, mostras e arrustiu pisci e petza a baratu pro is turistas; is amantiosos de is escursiones ant pòtziu bisitare su sartu e is montes a ingiru de sa bidda. A totu custu si depet aciungere totu sa gente chi at acumpangiadu in prucessione a Santu Sidòriu, su patronu de is messajos, chi dae sa crèsia de su Cramu est torraddu a sa crèsia in Tuerra (acanta de Portu Tramatzu) e inias ant benidixiu is campos.

Domingu 20: sunt acabados is campionados regionales diletantes de fuballu. In su girone A de su campionadu de promotzione su Carloforte acabat a su de 3 postos e imoi depet fàghere is playoff pro provare a artziare Ecellenza; su Carbònia de chi at pèrdidu sa finale de Coppa Italia at acabadu trancuillu a su de 7 postos. In su girone B de primu categoria sa groriosa Monteponi, mancai apat cuncordadu una iscuadra forte meda est abarrada 4 puntos a coa de su Bidda Massàrgia chi artziat deretu in promotzione; calant in segunda su JSE Domusnovas e su Masainas, su Narcau depet gherrare ancora in su play-out. Invècias in su girone B de sugundu categòria s’Isola de Sant’Anitioco est arrinèsciu a sorigare in is ùrtimas partidas su Caputerra e cida chi benit si giogant s’isparegiu in campu nèutru pro detzidere chini bincit su campionadu. Is santantioghesos artziant a su pròpiu in primu categoria proita chi mancai perdant ant a èssere sa mellus segunda iscuadra de totus is 10 girones sardos e ant a èssere ripescada

Roberto Pinna