NOTA! Questo sito utilizza i cookie e tecnologie simili.

Se non si modificano le impostazioni del browser, l'utente accetta.

Approvo
25
Mon, Jun
45 Nuovi articoli

Sa cida sulcitana in curtzu, Dae su 7 a su 13 maju

Novas in Sardu (LSC)
Aspetto
Condividi

sa cida sulcitana in curtzu Dae su 7 a su 13 de maju

Lunis 7: in is dies passadas, pròpiu in mesu de s’emergèntzia in Giba ant presentadu su COI de is Comunos de su Sulcis de Bàsciu, su centru operativu intercumale, chi iat a deper funtzionare in casu de emergèntzias. Sa sede est cussa de s’unione de is comunos de su Sulcis in Santu Giuanni Suèrgiu e in casu de netzessidade s’ant alternare, a tres a tres, is delegados de is comunos pro coordinare totus is operatziones. In su mentris in Sant’Antiogu s’opositzione at fatu polèmica contras a su sìndigu proite chi su fundu de is arrios fiat brutu e duncas abastat chi protzat unu pagu in prus de su normale e custos essint e faghent dannu. Dae su comunu ant annuntziadu traballos pro 1 milione e prus de èuros pro aderetzare, cun 5 pontes, s’arrigàngiu de S’Arriaxu. Ma sa beridade est ca dinari pro pulire is arrios no nd’at in logu perunu e a primu candu proiat meda is arrios essiant e faghiant iscònciu ma nemus si chesciàt proite chi fiat sa normalidade.

martis 8: custa cida puru, mancai su tempus non fessit siguru, sunt arribados algerinos in su Sulcis. In 4 isbarcos (3 in Porto Pino e 1 in su portu cummertziale de Sant’Antiogu) sunt caladas 32 personas. Comente dònnia borta nde-ddas ant pinnigadas is Carabineris e che-ddas lòmpidas su tzentru de collidura de Muristenis.

Mèrcuris 9: s’est scìpidu chi in is dies passadas nd’est arruta una bòvida in d-una stantza de su CTO de Igrèsias e fiat acanta de cassare a un’infermiera. Craramente sa polèmica polìtica est incumentzada sùbitu cun is esponentes de su centru-dereta (regionales e locales) chi imputant a su PD sa curpa de s’isfàsciu de totu su sistema sanitàriu sulcitanu. At arrìspundiu Fulvio Moirano, chi est su diretore de sa ATS (azienda tutela salute) regionale chi at annuntziadu una cummissione de inchiesta asuba de totus is traballos fatos in is ùrtimos 10 annos in is uspidales sulcitanos (candu guvernaiat su centru-dereta) e a nùmeros at ispiegadu ca, pro imoi e tanti, non benit bene a fàghere de su CTO unu presìdiu de emergèntzia I livellu ma fortzis est mellus circare de fàghere un’uspidale ùnicu pro totu su Sulcis.

Giòbia 10: in Sant’Antiogu ddoe at a èssere torra unu teatru. Infatis s’ex cineteatru “Savoia” dd’ant trasformadu in domu pro is antzianos, e imoi su dinari istatale chi est prontu dae 10 annos (2 miliones de èuros dae su fundu natzionale pro is ìsulas piticas) dd’ant a pònnere pro arrangiare e adatare s’ex mercadu cìvicu. S’idea est cussa de intregare sa progetatzione a intrus de su 2018 pro dd’apaltare in su 2019 a manera de no nche pèrdere su dinari. Su teatru nou at a èssere un’istrutura de 500 metros cuadros e at a tènnere unu collegamentu deretu cun su cursu e at a pòder funtzionare puru de centru pro is cungressos e de auditorium.

Cenàbara 11: sunt acabados is furriotos de is alleàntzias pro is eletziones comunales de su 10 de làmpadas. A s’acabada su PD e s’UDC, de chi si sunt fastigiados in is ùrtimas cidas, sustennent sa candidadura de Mauro Usai chi est su presidente de su consìliu comunale. Cun Valentina Pistis 5 grupos de centru dereta (FdI, Forza Italia, Cas@ Iglesias, Riformatori Sardi, Iglesias in Comune). A Carlo Murru ddu sustennint 2 listas cìvicas (Progetto per Iglesias e Iglesias Risorge). Federico Garau est su candidadu se su M5S, faint lista a contu insoru puru is comunistas. Si votat in Teulada puru: Paolo Luigi Dessì, pro 15 annos sìndigu de S.A. Arresi e consilieri regionale, isfidat a Daniele Serra chi circat su de duos mandados.

Sàbudu 12: comente dònnia annu s’assòtziu “Amici della Vita” at organizadu sa sa festa de sa sobriedadi. Ocannu puru in s’àula consiliare de Giba nche fiant gente meda a ascurtare is operadores, assistentes sotziales, volontàrios e amministradores locales chi ant arrexonadu a pitzus de is problemas de is dipendèntzias e in prus ant ascurtadu puru is testimonias de is chi sunt gherrende, cun bona volontade, contras a custas maladias.

Domingu 13: ant tentu unu risurtadu discretu de pùbblicu sa de 12 editziones de “Sulcis Iglesiente espone” (organizadu dae su consòrtziu fierìsticu sulcitanu in su centru de Carbònia); “Is Maistus craft beer” in Tratalias (una festa de is birras artigianales) e Monumenti Aperti in Sant’Antiogu (chi aiant rinviadu de una cida pro mori de su tempus malu). Fatu istat ca custos 3 eventos postos in biddas totus acanta de pari, si sunt istrobados s’unu cun s’àteru proite chi sa gente s’est ispainada. In su benidore, mancai giai dae s’annu chi benit, iat a èssere una cosa bona si is chi organizant si coordinant e detzidint datas diferente pro chi is manifestatziones, totus de importu e interessantes, arrinnesciant mellus.

Roberto Pinna