NOTA! Questo sito utilizza i cookie e tecnologie simili.

Se non si modificano le impostazioni del browser, l'utente accetta.

Approvo
21
Sun, Oct
49 Nuovi articoli

Sa cida in curtzu! Dae su 30 de abrile a su 6 de maju

Novas in Sardu (LSC)
Aspetto
Condividi

Sa cida sulcitana in curtzu! Dae su 30 de abrile a su 6 de maju

Lunis 30: in Piscinas ant presentadu “Il grande Erik” su libru de su santantioghesu Filippo Lorrai chi s’annu passadu at bintu su prèmiu natzionale “Rai-Eri – La giara”. Custa sa fiat sa primu presentada de una libru chi faghiant in sa biddexedda de su Sulcis de Bàsciu e is amministradores de Piscinas no ant cuadu s’orgògliu de tènnere pro ospite unu iscritore sulcitanu chi at bintu unu prèmiu natzionale. Lorrai at ispiegadu comente est nàschidu su libru (chi contat de 3 generatziones de artistas de circu chi depent gherrare contras a una grefa de delincuentes) e at arrispùdiu a totus is dimandas chi dd’at fatu su pùbblicu contende puru is esperièntzias suas de iscritura e at nadu puru cales sunt is autores e is romanzos chi prus dd’agradant.

Martis 1 de Maju: fiat sa festa de is traballadores e est acabadu su ponte longu chi est incumentzadu su 25 de abrile. S’est registradu unu nùmeru bonu de turistas, pruscatotu istràngios dae su nord e dae s’est de s’Europa ma no ammancaiant mancu is “continentales” e puru fiant medas puru is grupos organizados de sardos. Si cunfirmant duncas is previsiones bonas pro ocannu e sigumente su tempus non fiat bonu is turistas si-nde sunt andados dae mare e ant fatu su prexu de is gestores de is sitos culturales e naturalìsticos de s’internu.

Mèrcuris 2: est giai dae 2 annos chi gente meda est dimandende sa cunversione de sa fàbbrica de bombas de Domus Noas e finas s’obispu nostru, Monsignor Zedda, in d-unu messàgiu at nadu chi non benit bene a cunsiderare in sa pròpiu manera sa produtzione de cosas chi serbint pro sa vida de dònnia die e sa produtzione de ainas de morte e distrutzione. Duncas est pretzisu a istudiare unu pianu pro garantire unu traballu dignitosu pro totus is operàios chi traballant in sa fàbbrica. Monsignor Zedda at ispiegadu chi custa impostatzione est coerente siat cun sa Fide cristiana siat cun s’artìculu 11 de sa Costitutzione e at acabadu ispieghende chi tocat a is polìticos e a is istitutziones sotziales a agatare una manera de isvilupare su territòriu nostru chi andit de acòrdiu cun s’ambiente e donit valore a is risorsas locales a s’istòria nostra.

Giòbia 3: in su MISE de Roma is dirigentes de sa Syder Alloys ant ispiegadu de fronte a su ministru Calenda e is sindacados sa situatzione de s’impiantu de Portovesme. Pro imoe ant dimandadu a 3 ditas esternas de propònnere unu pianu pro su cambiamentu e sa manutentzione de totus is machinàrios chi serbint pro torrare a fàgher partire s’istabilimentu. Si totu andat bene, pro sa fase de riaviu, chi at a acabare in 24 meses e at a costare giai 160miliones de èuro, iant a dèper traballare 360 personas (is primas 60 incumentzant a intrus de s’acabu de ocannu).

Cenàbara 4: custa cida passada at fatu àcua meda. Is allertas mèteo sunt incumentzadas dae su primu de su mese (su 2 iscolas serradas pro mellus siguresa in comunos meda) e at pròpiu in manera sulena finas a cenàbara candu in logos meda at atacadu a ghetare a istrossu. Arrigàngios e arrios mannos ant incumentzadu si unfrare e ant fatu puru iscònciu: allagamentos in su sartu de Sant’Antiogu e in Perdaxus; s’àcua dae is montigheddos a ingiru de Masainas nc’at lòmpidu perdas mannas che limones pròpiu in mesu de bidda; fangu e ludu finas a is genugos in sa zona de Rosmarino in Carbònia; in Flùmini Majori s’arriu si nc’est papadu unu arrogu de s’arruga printzipale de sa bidda. Fiat dae su 2013 chi,,non si bidiant 3 dies de àcua totu de sighiu e imoi totus is digas sunt bessende e si podet nàrrere chi assumancus pro s’annu chi benit chi su perìgulu de su sciutori e de su sicori no nc’est prus.

Sàbudu 5: a cantu paret, si no est chi is partidos fatzant calincun’àteru furriotu, is giogos pro is pròssimas eletziones amministrativas sunt fatos. Su centru-manca candidat pro sìndigu su presidente de su consìliu comunale Mauru Usai (ma is socialistas non partetzipant a sa coalitzione); su M5S proponet s’istudente Federico Garau; Carlo Murru est su candidadu de “Iglesias Risorge” e de “Progetto per Iglesias”; de Valentina Pistis e de s’alleàntzia sua chi regollet grupos de su centru-dereta eus giai iscritu bortas meda, sa giornalista Ilenia Mura iat a dèper èssere sa candidada de su chi abarrat de su centru-dereta.

Domingu 6: mancai su tempus non fessit tropu siguru est andada gente meda a sa de ses festas de su Monte organizada dae sa Pro Loco de Nuxis. Ocannu is partetzipantes, prus de 120, sunt artziados a màchina a Monte Tamara e a pustis sunt calados a su centru sotziale pro pràndere totus in pari. A meigama sunt andados in sa ex miniera de Sa Marchesa aundi cun is ghias de su speloclub locale sunt intrados in sa “Gruta de Su Montixeddu” chi est interessante meda proite chi tenet testimònias archeològicas e ddoe at puru fòssiles e “pisolitas” (perlas de gruta) e ant castiadu puru sa colletzione de minerales e arrocas de dònnia era geològica arregortos in su Sulcis.

Roberto Pinna