NOTA! Questo sito utilizza i cookie e tecnologie simili.

Se non si modificano le impostazioni del browser, l'utente accetta.

Approvo
21
Sun, Oct
49 Nuovi articoli

Sa cida sulcitana in curtzu.

Novas in Sardu (LSC)
Aspetto
Condividi

Sa cida sulcitana in curtzu. Dae su 21 a su 27 de maju

Lunis 21: Su tempus non s’est assetiadu ancora e custa cida puru at fatu àcua. A cantu narant is prus bècios fiat assumancus dae 40 annos chi non proiat aici meda in su mese de maju. Fatu istat ca incumentzant a contare s’isconciu fatu dae s’àcua. Infatis si pro is allevadores est annada bella meda, cun pasturas bellas e luatzas pro su bestiàmene, no est andende bene pro nudda pro is agricoltores: is trigos e is loris sunt istrumpados sunt incumentzende a purdiare e a fintzas is bìngias sunt malàdias: sunt ispainendesì sa peronòspera e s’oidiu chi purdiat is gurdonis e tocat a fàghere tratamentos. Is sìndigos de is comunos de su Sulcis de Bàsciu sunt pentzende de dimandare s’istadu de calamidade naturale pro chi is agricoltores otengant calincunu rimborsu.

Martis 22: fatu-fatu in is domos populares de arruga Powel in Sant’Antiogu nde ruent arrogos de balcone e de intònacu e is chi ddoe bivint sunt protestende proite ca sunt perigulosas e in is dies passadas sunt andados finas is pompieris pro ddas controllare. Custas domos ddas aiat fatas s’ex IACIP in su 1982 e imoi sunt propiredade de s’AREA chi no at fatu mai peruna manutentzione. Est intervènnidu puru su sìndigu Ignazio Locci chi at dimandadu a s’AREA de mandare is tènnicos a castiare is domos proite chi is signos de comente sunt scisciendesì si bident a ogu e duncas AREA depet fàghere totus is traballos chi serbint pro ddas pònnere in siguresa, tenende puru in contu ca esistis unu progetu de ristruturatzione cun su dinari postu dae su 2012.

Mèruris 23: s’est ispaciada in paghe e cun su cunfortu de is parentes tzia Gratzia Boi chi fiat acanta de cumprire 108 annos e duncas Sant’Antiogu nc’at pèrdidu s’ajaja sua. Tzia Gràtzia fiat fiuda dae su 1991 e biviat in sa Rosa del Marganai in Igrèsias e s’annu passadu est torrada in Sant’Antiogu aundi fiat bene atèndia dae is parentes e dae is dotores e dae is infermieris chi traballant in sa domu proteta Melania.

Giòbia 24: de chi cida passada fiant acanta de nche-ddos bogare dae s’assessoradu regionale de sa sanidade in Casteddu, is sìndigos sulcitanos pro 4 oras ant atobiadu in Carbònia s’assessore a sa sanidade Luigi Arru, sa diretora de sa ASSL de Carbònia Maddalena Giua e su diretore generale de sa ATS regionale Fulvio Moirano. Is “cumandentes” de sa sanidade regionale ant ispiegadu ita ant fatu fintzas a imoi: ant agatadu una solutzione pro su problema de s’avantzamentu de is fàscias retributivas de is dipendentes (unu problema chi fiat andenda a innantis dae annos); ant ispiegadu ca is problemas a is istruturas chi fatu-fatu nde arruent sunt incumentzadu dae annnos meda tirende in mesu is amministratziones regionales de is annos passados e sunt circhende solutziones; ant promìtidu chi cun s’isblocu de su turn over e cun is istabilizatziones at a arribare personale nou in totus is istruturas. Ant chistionadu puru de is listas de atesa pro is bìsitas ispieghende ca est unu problema in totu sa regione e tocat a traballare pro nche bogare unu 40% de prenotatziones chi si faghet in manera pagu e nudda trasparente e pro su chi pertocat sa retza de is uspidales ant nadu chi sunt abetende de acrarare unas cantu chistiones tènnicas cun su Ministeru de sa sanidade in Roma.

Cenàbara: sa Guàrdia de Finantza at scercustadu 2 impiantos fotovoltaicos in Santadi e in Santu Giuanni Suèrgiu (18 ètaros in totu) e a custos si aciunghent cascitas de siguresa , contos currentes e àteros bene pro unu valore totale de 16 miliones de èuros a duas sotziedades chi traballant is su setore de is energias rinnovàbiles. In totu nc’at 4 indagados pro lotizatziones abusivas (is impiantos non fiant cunformos a is progetos presentados a is comunos) e pro trufa sende chi depiant èssere siendas agrìcolas ma produsiant pruscatotu currente elètrica.

Sàbudu 24: ocannu puru est andadu bene meda su Girotonno in Carloforte chi est lòmpidu a sa de 16 editziones. Gente a intipu pro totus is 4 dies de festa cun su cantante Piero Pelù chi in antis de incummentzare su cuncertu est andadu a giru in s’ìsula e sa Lituania chi at bintu s’isfida internatzionale de is chef chi ant priparadu pratos totus a base de turina.

Domingu 25: S’Isola di Sant’Antioco at pèrdiu 1 a 0 s’isparègiu cun su Cabuterra e duncas acabat a su segundu postu de su girone B de su campionadu de segunda categoria. Fatu istat chi s’iscuadra sulcitana asserit a èssere sa mellus segunda classificada de totus is 10 girones sardos e s’annu chi benit at a giogare a su pròpiu in primu categoria.

Roberto Pinna