NOTA! Questo sito utilizza i cookie e tecnologie simili.

Se non si modificano le impostazioni del browser, l'utente accetta.

Approvo
22
Mon, Oct
48 Nuovi articoli

Sa cida in curtzu. Dae su 4 a su 10 de mese de idas

Novas in Sardu (LSC)
Aspetto
Condividi

Sa cida in curtzu. Dae su 4 a su 10 de mese de idas

Lunis 4: S’amministratzione comunale de Santadi at organizau pro su 21 de custu mese unu atòbiu de importu mannu in s’aula consiliare. Su tìtulu de s’atòbiu est “Con TE...Mai più sola!” e s’at a arrexonare a pitzus de sa violèntzia asuba de is fèmminas e de sa netzessidade de dda denuntziare e de agiudare is fèmminas chi denuntziant. Sunt totus cumbidados a partecipare e a ascurtare is intervèntos de criminòlogos, psicologos e abogados.

Martis 5: in Sant’Antiogu canes iscapos e sena de mere si sunt ghetados a unu tallu de berbeghes e ant mortu prus de binti angiones e nd’ant fertu un’àteru tanti. Pro sa meri de is pegus, chi at pòtziu sceti denuntziare su fatu a is vìgiles, su dannu econòmicu est mannu meda. Pertantis su sìndigu Ignazio Locci at nadu ca no est sa primu borta chi acuntessint custos fatos in Sant’Antiogu e tocat chi sa Regione pongat dinari pro agiudare is comunos a cuntrastare custu fenòmenu.

Mercuris 6: est salva s’istagione de prosa in su teatru de Carbònia. Infatis su CEDAC e s’Amministratzione Comunale si sunt postas de acòrdiu e ant cuncordadu unu programma, chi at incumentzare a gennàrgiu e at acabare in abrile, cun cummèdias e dantzas chi at a biere protagonistas artistas natzionales e is cumpangias locales.

Giòbia 7: s’amministratzione comunale de Masainas cun su contributu de sa RAS at organizadu una bella die di istùdiu e de arrexonadas. Su tìtulu de s’atòbiu fiat “Ònnia die sa die”. A mangianu Giampaolo Salice, chi est un’istudiosu de istòria moderna in s’universidade de Casteddu, at fatu una bella letzione de fronte a 100 istudentes de su liceu Amaldi de Carbònia: at incumentzadu pighende esèmpiu dae is telefims prus sighidos dae is giovànos e at ammostradu comente sa Sardigna est parte, in manera perfeta, de is proceessos evolutivos de su Mediterràneu e de s’Europa. A merie invecias, cun s’agiudu de su giornalista M. Corrias, Salice at arrexonadu cun s’antropologu F. Bacchis in contu de is ideas de identidade, autonomia, pàtria e lìngua sciusciende is istereòtipos chi tenemus a pitzus de custos cuncetos.

Cenàbara 8: Paschixedda est incurtzende e ormai est traditzione in logus meda de abèrrere mercados: dd’ant fatu in Sant’Antiogu, in Igrèsias e finas in Carbònia cun tanti de “Villaggio de Babbo Natale” in su parcu urbanu de Cannas de Susu. De siguru est una cosa bella meda pro is pipios e finas pro is mannos, ma iat a èssere una cosa bene fata su de ispiegare cale est su significu prus fungudu de custa die noira chi a logus est connota cun su nùmene de “Sa Purissima”.

Sàbudu 9: est incumentzada in Carloforti sa rasegna de cìnema “L’impegno, il viaggio, il mito” cuncordada dae sa Società Umanitaria de Carbònia cun su contributu de sa RAS. S’ant a fàghere in totu 7 proietzionis (finas a su 22 de custu mese) in Giba, Carloforti e Masainas. Su tema de sa rassegna est s’atualidade: totus is pellìculas tratant de immigratzione e emigrados, de sa situatzione econòmica de sa Sardigna e de is problemas de sa gioventude. S’iscopu de custas proietziones est cussu de promòvere in su territòriu totus is initziativas chi siant in calincuna manera acapiadas a sa promotzione de s’audio-visivu e de sa cultura in generale.

Domingu 10: est acabada cun d-unu discretu sucessu de pùbblicu sa manifestatzione “Nuxis si mostra” cuncordada dae is assòtzios de sa bidda de su Sulcis de Bàsciu in s’ex miniera de Sa Marchesa. Infatis sunt andadas prus de 300 personas a bisitare sa mostra de su fotografu N. Pinna e s’espositzione de prus de 50 muncadores antigos. Is chi sunt andandos a Sa Marchesa in prus ant pòtziu castiare sa colletzione de minerales e fòssiles regortos in sa zona de su Sulcis e is prus coragiòsos sunt calados in sa gruta de Su Montixeddu: ddoi at sceti una sala manna meda (est longa 40 metros, lada 20 e arta prus de 10) e chi est interessante meda pro sa proite chi si agatant is chi narant “perlas de gruta” e sa presèntzia de unas cantu tumbas de su periodu pre-nuraghesu.

Roberto Pinna