Sa cida sulcitana in curtzu. Dae su 16 a su 22 de mese de argiolas
Domingu 16: in Iglesias, in su pianu terra de su palàssiu comunale ant incingiadu s’Ufìtziu Turìsticu nou. Est un’istrutura moderna chi est ùnica in Itàlia, chi imperat tecnologias noas pro introdùsere is turistas in su territòriu e in sa tzitade. Soddisfada s’Amministratzione Comunale e puru is bisitadores chi ant provadu is espositziones noas.
Lunis 16 e martis 17: sighit a crèschere sa preocupatzione pro sa situatzione de su polu industriale de Portovesme. Infatis est ancora firma sa protzedura burocràtica pro sa discàrriga noa in Gena e Luas oberada dae sa Portovesme SRL ma ant autorizadu a nche ghetare àteros 25mila metros cubos de ludu rùbiu in sa discàrriga bècia. A su pròpiu est incora firma sa protzedura pro s’ex Alcoa (s’atòbiu chi fiat previstu in su MISE su dd’ant rinviadu a cida chi benit). Polìticos locales e sindacalistas si chesciant proite sa Provìntzia noa de su Sud Sardigna no est impegnende-sì pro agiudare a risòlvere is vertèntzias ma a parridare de chini iscriet custa rubrica nc’at pagu de si chesciare: sa Provìntzia de su Sud Sardigna in pràtica est un’ente fatu de bellu e nou, chi tenet sceti personale amministrativu (e pagu puru) e cosa prus importante non tenet guida polìtica. Duncas su comissàriu faghet su buròcrate e sighit, sena de si pigare apretu o preocupatzione, is protzeduras chi depet e no arrispundit a nisciunus.
Mercoledi 19: sighit su machìmine de atacare fogos a tressu e a longu. Cust’orta su fogu dd’ant postu a pagu tretu de su campusantu de Cortoghiana, ororu de sa SS 126. Nche fiat timoria pro is domos ma su bentu nche-dd’at tiradu conca a sa pinneta. A gherrare contras a sa pampa (e pruscatotu contras a sa tontesa de sa genti loca) sunt lòmpidos 2 elicòteros, 1 canadair, is Pompieris de su distacamentu de Carbònia e is iscuadras de sa Protetzione Civile.
Giòbia 20: sa Càmera de is Deputados at aprovadu is emendamentos propostos dae su PD in contu de indùstrias energivòras a sa chi si narat “Lege Europea” (sceti su M5S at votadu contras). Duncas torrat a crèschere s’isperàntzia pro resòlvere sa vertèntzia ALCOA.
Cenàbara 21: est Sabrina Sabiu s’assessora noa a sa cultura e a su turismu de su comunu de Carbònia. Sabiu tenet 52 annos, est originària de Giba e residente in Santu Giuanni Suèrgiu, at de pagu acabadu s’iscola de archivìstica e at fatu traballos meda de circa istòrica. Imoi s’òrganu de guvernu est torra cumpletu e aici si serrat una fase de crisi polìtica longa meda – chi intru de dimissiones de assessores e consilieris comunales e documentos polèmicos firmados dae grupos de ativistas fiat durende dae prus de 4 meses – in su Comunu chi iat a dèpere èssere sa ghia de totu su territòriu.
Sàbudu 22: Acanta de sa mìgia de Monti Nieddu in comunu de Nuxis ant agatadu unu pensionadu de Caleseda mortu a intrus de sa vetura sua. Sunt intervènnidos is Carabineris de sa Cumpangia de Carbònia. A unu primu esàmine parit chi s’òmine si siat mortu pro causas naturales ma su magistradu at ordinadu a su pròpiu s’autopsia pro cumprèndere is arresones de custa morte.
Is Carabineris de Carbònia ant arrestadu un’òmine de 45 annos chi fiat in prova cun is servìtzios sotziales. Faci a mesunoti dd’ant firmadu in arruga Gramsci, ma s’òmine chi fiat guidende una màchina sena de patente si-nd’est fuidu andende puru contromano in su tzentru de sa tzitade. Candu is Carabineris dd’ant ingiriadu s’est inserradu a intrus de sa vetura e apoi nd’est caladu a nche ddos at iscutos unu fusti sena de ddus infèrrere. Is òmines de s’Arma dd’ant arrestadu a inserradu in sa cella de siguresa de sa caserma aundi at abetadu su processu.
