Sa cida in curtzu sulcitana. Dae su 23 a su 29 de mese argiolas
Domingu 23: at tentu sutzessu mannu sa de XXIII editziones de su Narcao Blues. Is su palcu de Pratza Europa ant sonadu e cantadu, comente dònnia annu, is mellus rapresentantes de sa scena mondiale de su blues. Is ùrtimos duos ispetàculos fiant totus esauridos e a gente meda chi est aproliada in Narcau no at pòtzidu intrare in pratza e dd’est tocada a ascurtare sa mùsica dae atesu. Soddisfadu meda Gianni Melis, presidente de s’assòtziu Progetto Evoluzione chi aparixat sa manifestatzione, e prexu mannu puru pro totus is piciocos de su staff suo giai chi ant tentu s’oportunidade de connòschere e de si cunfrontare cun professionistas de gabbale.
Lunis 24 est su piemontesu Giampaolo Falettis su primu pellegrinu chi at fatu totu is 400 km de su Camminu de Santa Bràbara. Faletti est partidu dae pratza Sella in Igrèsias e a Igrèsias est torradu a pustis de 19 dies camminende a solu. Faletti at ispiegadu a chini iscriet custa rubrica chi est contentu meda de s’esperièntzia fata e chi at bistu logus de una bellesa ispantosa e istravanada. In prus at nadu chi su percursu non difìtzile ma bastante impegnativu massimamente in sa primu parte (tapas crutzas ma cun dislivellu artu) e prus “trancuillu” in sa segundu parte cun tapas prus longas ma pranas. S’ispera de totus est chi de pellegrinos nde bengant medas e chi in dònnia logu si aprontint is istruturas chi serbint pro ddos arrìtzere.
Martis 25: No nci sunt novas bonas pro is operàios de sa Portovesme SRL. Infatis is funtzionàrios de sa RAS sunt obbligados a abèrrere un’istrutòria de valutatzione de impatu ambientale pro su chi pertocat s’istocàgiu temporaneu de unas 30mila tonnelladas de iscartos a intrus de is vascones de s’istabilimentu etotu. Duncas sa cimbella de is traballadores est crescende finas proite chi su su Ministeru de s’Ambiente in Roma aiat giai donadu su via lìbera pro custa operatzione chi serbiat comente solutzione temporànea (si abetat s’iter pro abèrrere una discàrriga noa in Gen’e Luas). In austu sa produtzione arrallentat in manera fisiològica, ma si non si agatat a lestru unu logu pro nche pònnere is iscartos, s’at a firmare totu s’impiantu e sunt àteros 1000 postos de traballu in perìgulu.
Mèrcuris 26: custa cida is macos chi ponent fogu dd’ant tentada in Narcau. A meigama unu fogu est partidu a pagu tretu dae su campu isportivu e su bentu de maestrale forte fiat impunnende-ddu conca a sa pineta aundi ddoe sunt puru is ripetitores telefònicos. Sunt intervènnidos a lestru is volontàrios de sa Protetzione Civile de Terreseu chi cun s’agiudu de un’elicòteru partidu dae Marganai nd’ant istudadu is pampas.
Giòbia 27: pro circare de cumbatere is chi lassant butìllias e botus in is arrugas de su tzentru, in Sant’Antiogu, si podet bufare sceti sètzidos a mesa opuru a intrus de is locales pùbblicos. Est custu su sensu de su pregone chi at firmadu Ignazio Locci custas dies passada. A gente meda, massimamente in is social network, custa situatzione noa no est praxia ma su sìndigu (chi intantis at arritzidu s’invitu de su presidente de su Consìliu Regionale a resòlvere sa situatzione de incompatibilidade sua) at ispiegadu ca est una chistione de decoru urbanu e puru de siguresa proite fatu-fatu incapitat chi calincunu imbruconat in is butìllias de imbidru lassadas in terra e si ingollit puru.
Cenàbara 28: pro mori de carèntzia de personale (ammancant 2 dotoras in su CTO de Igrèsias e 2 dotores in s’uspidale Sirai de Carbònia) ant torradu a organizare totus is bìsitas cardiològicas in is presìdios sulcitanos finas a su 14 de austu: in pagos faeddos totus is consulèntzias urgentes e cussas de routine s’ant a fàere in s’unidade de Carbònia e si in casu si arrinnesciat a agatere àteru personale s’at a torrare a organizare su servìtziu pro circare de allebiare su disàgiu de is malaidos.
Sàbudu 29: at tentu unu bonu resurtadu sa de XIII editziones de sa sa Rassegna Folk e de sa sagra de is durches traditzionales cuncordada dae su grupu folk Sant’Elia de Nuxis. A is 7 de a merie s’est fata s’isfilada cun 5 grupos folklorìsticos chi beniant dae Campidanu e dae su tzentru de Sardigna e a pustis Emanuele Garau at presentadu is ballos de sa traditziones propostos dae is grupos folk etotu. Is chi fiant presentes ant tentu s’oportunidade de tastare a in donu is durches chi dònnia annu is fèmminas de domu de Nuxis aprontant pro custu eventu.
