Sa cida sulcitana in curtzu. Dae su 9 a su 16 de mese de argiolas
Domingu 9: àtera die de fogu in su Sulcis. Is Pompieris lòmpidos dae Carbònia, Igrèsias e Casteddu, sa Forestale e totus is volontàrios de sa Protetzione Civile ant traballadu meda in Bidda Massàrgia e in Domus Noas pro istudare unu fogu mannu chi at postu in perìgulu finas is domos e fatu iscònciu in d-unas cantu siendas agrìcolas. Pro agiudare is iscuadras a terra ddoe fiant puru 3 elicòteros partidos dae Pula e Marganai e su Superpuma lòmpidu dae Fenosu. Pro mori de su fumu nche ant fatu evacuare is residentes (est tocadu a ricoverare 2 òmines ca fiant intossicados dae su fumu) e Trenitalia at firmadu is cursas de is trenos.
Lunis 10: sa targa noa de sa provìntzia de su Sud Sardigna at a èssere SU e duncas at a isparèssere sa sigla CI. Dd’at istabilidu cun d-unu regulamentu su Consìliu de is Ministros chi depet èssere adotadu cun d-unu regolamentu de su Presidente de sa Repubblica. Is veiculos chi tenent is siglas bècias podent sighire a circulare finas a candu no ant a èssere immatriculadas a nou.
Martis 11: isbarcu “curiosu” de migrantes algerinos in su portu turìsticu de Teulada: faci a is 8 de merie est arribada una barca cun 8 personas e in mesu de custas ddoe fiat puru un’òmine cun d-una cadira cun is arrodeddas, su catètere postu e teniat avatu totu sa documentatzione sanitària. Is Carabineris nche dd’ant lòmpidu a s’uspidale Sirai de Carbònia, is cumpàngios invècias nche ddos ant bàtidos a su tzentru de Assèmini in pari a àteros 4 personas chi ant firmadu in sa zona de Capo Malfatano.
Mèrcuris 12: su sìndigu de Carbònia Paola Massidda at pigadu positzione contras a sa riforma de sa retza de is uspidales de sa Sardigna chi est aprontende sa Regione. A parridare de Massidda in s’atòbiu organizadu dae s’ANCI in Aristanis totus is sìndigos de Sardigna ant cuntestadu su fatu chi in Regiona no ant carculadu is sìndigos etotu e dimandat chi si abergiat una mesa de cunfrontu pro chi sa riforma siat cumpartzida e chi tengat in contu is esigèntzias de dònnia territòriu.
Giòbia 13: in Sant’Antiogu sighit sa protesta de s’opositzione chi est dimandende is dimissiones de su sìndigu Ignazio Locci de su consilieri regionale. Alberto Fois, su cabugrupu de Genti Noa, in s’ùrtima riunione de consìliu comunale at decraradu chi sunt prontos a si nche rivolgere a su tribunale si su sìndigu non si dimitit dae su Consìliu Regionale e at ispiegadu ca custu scioberu est fatu sceti pro fàere respetare sa lege. Petantis s’Amministratzione Comunale ghiada dae Locci est incumentzende a traballare: s’est scìpidu chi s’annu chi benit s’asilu Carlo Sanna iat a pòdere ospitare sa “Sezione Primavera” e in su museu archeològicu ant presentadu unu calendàriu ricu meda de is eventos pro custas istade .
Cenàbara 14: est torrada a sa Diocesi de Igrèsias sa perda chi tenet s’istemma de is Donoratico e aundi ddoi est arremonadu puru su Conte Ugolino della Gherardesca chi fiat posta in s’intrada de sa Seu. Sa perda, chi asserit a èssere de su de XIII sèculos, dd’iant mòvida in su comentzu de su sèculu passadu candu fiant arrangende sa Seu e dda teniant allogada in su Museu Mineralògicu. Imoi sa perda est custodiada in su Museu Diocesanu.
Sàbudu 15: in Masainas dae cida chi benit at a abèrrere s’infopoint. Unu scioberu coragiosu cussu fatu dae s’Amministratzione masainesa chi at postu dinari dae su bilànciu suo e at intregadu su traballu de promotzione de su territòriu a is professionistas de sa retza Visit Sulcis. A s’ufìtziu de Masainas (chi at a èssere abertu dònnia meria dae martis a domingu, su fine de cida puru a mangianu e ddoi at a traballare unu operadore bilingue) si aciungit a cussos abertos dae is amministratziones comunales de Narcau e de Santu Giuanni Suèrgiu. S’ispera est chi, in manera coordinada, totus is amministratziones sulcitanas collaborint totus in pari pro promotzione turìstica de sa zona nostra.
