Sa cida sulcitana. Dae su 2 a s'8 de mese de argiolas
Domingu 2: a pustis de 9 annos in Nuxis ant torradu a fàere sa festa de sa bidda. Unu grupu de giòvanos chi si sunt pinnigados a pari in s’assòtziu “Su Beranu” ant fatu sa circa e aprontadu unu programma de ispetàculos chi is nuxaios ant tentu agradèssidu. S’ispera de totus est chi giai dae s’annu chi benit si pongant totus de acòrdiu pro fàere paris siat sa festa tzivile siat sa festa religiosa de Santu Perdu chi est su patronu de sa bidda. In Villaperùciu invècias at tentu sutzessu mannu sa festa de Nostra Sennora de Is Gràtzias. A su medau de sa Crèsia est aproliada gente meda finas dae is biddas de acanta e ant sighidu sa protzessione a pee e a pustis ant castiadu una bella cummèdia in lìngua sarda.
Lunis 3: in Sant’Antiogu s’est insediadu su consìliu comunale nou. Su sìndigu Ignazio Locci at decraradu chi s’at a dimìtere dae consilieri regionale – cosa chi ddi benit a marolla proite chi sa lege narat chi nc’at incopatibilidade cun is duas càrrigas. Is grupos de opositzione dd’at cumbiradu a coitare a ddu fàere sende chi est passadu giai unu mese dae candu s’est votadu a incora no at fatu su chi aiat promìtidu. Su sìndigu at arrispùndiu chi est valutende is protzeduras.
Martis 4: in pratza Roma in Carbònia ant fatu sa seletzione finale pro scioberare is 35 personas chi ant a traballare in su ristorante McDonalds chi at a abèrrere in tzitade a s’acabu de su mese. Custa fiat su de tres passos de una protzedura de seletzione chi est incumentzada on line su mese passadu. Is candidados de 1000 chi fiant, sunt abarrados in 100 sceti pro sa prova orale. Custu fine de cida ant a incumentzare sa formatzione in su locale sende chi s’abertura est prevista pro s’acabu de custu mese.
Mèrcuris 5: in Portescusi, a 500 metros dae sa Punta de S’Àliga, in mesu de mare nc’est arrutu un’aparèchiu de cussos ultralèbios chi fiat partidu dae su campu de Ùssana. Is chi fiant in s’àereu – unu militare de 48 annos chi traballaiat in sa base de Deximomannu e una fèmmina de 41 annos de Pabillonis – sunt mòrtos a comente su mezu at tocadu s’àcua. Sa Capitaneria de Portu est indaghende pro circare de cumprèndere is càusas de custa disgràtzia.
Giòbia 6: Romantica, una barca a vela longa 12 metros cun 2 turistas bolognesos, s’est arrèschida in sa Sica de is Salinas e at segadu s’èlica e su timone. Su logu est a pagu tretu de aundi si agatat Caroline, sa barca cun bandera tedesca chi est in is arrocas dae is primos de dònniassanti, chi est meta de “pellègrinàgiu” de fotografos e gente curiosa. Perou cust’orta is mezos de sa Capitaneria de Portu, cun s’agiudu de unas cantu barcas de piscadores, sunt arrinnescidos a nche bogare sa barca e nche dda lòmpere a su portu de Caleseda.
Cenàbara 7: su 5 de mese de argiolas, su sìndigu de Igrèsias Emilio Gariazzo aiat fatu unu pregone cun su cale proibiat de oberare s’àcua de sa retza idrica: fiat tropu artu su valore de su prumu in is analisis chi faghet sa ATS (Azienda Tutela Salude, aici si narat imoi sa ASL) a manera periòdica. Ma a pustis de duas dies su pregone est istadu revocadu proite chi is valores sunt torrados normales. Su problema est chi su prelievu dd’ant fatu su 19 de su mese passadu e sa nota de sa ATS est lòmpida a su protocollo de su comunu su 30 de làmpadas. Pro duas chidas is igresientes ant oberadu àcua chi non fiat bona e pro custu motivu nc’at meda polèmica in tzitade.
Sàbudu 8: in Sant’Antiogu don Elio Tinti e s’assessora a sa cultura Rosalba Cossu ant incingiadu sa pratza de sa crèsia de Santa Maria Goretti e dd’ant dedicada a Don Antonio Mereu chi fiat istadu su primu predi de cussa parròchia. S’annu passadu unu comitadu de tzitadinos aiat arregortu prus de 500 firmas e aiat dimandadu a s’Amministratzione Comunale de dedicare unu logu pro regordare su predi e totus is fainas bonas chi at fatu pro sa comunidade santantioghesa.
