Sa cida sulcitana in linga sarda comuna. Dae su 28 de maju a su 3 de làmpadas
Domingu 28: Nche fiat gente meda in pratza Umberto in Sant’Antiogu a ascurtare sa debata de is 4 candidados a sìndigu. Sa debata assimbilaiat meda a cussos chi si bident in televisione. A pustis de unu giru lestru de presentatzione, is candidados ant arrispùndidu in d-unu minutu e mesu a totus is pregontas, bortas medas difìtziles, fatas dae su moderadore e chi arribaiant puru dae su pùbblicu. Est istètia una bella prova de democratzia chi siguramente at agiudadu a donare a is eletores un'idea prus crara de is programmas eletorales.
In Pula S’Atletico Masainas at bintu 5-4 a is rigores (1-1 a pustis de is suplementares) s’isparègiu contras a su Settimo e duncas s’annu chi benit at a giogare, pro sa primu borta, in su campionadu de primu categoria.
Lunis 29: Cristiano Erriu, s’Assessore a is Entes Locales de sa RAS, at annuntziadu chi 40 km de sa ferrovia bècia chi dae Silìcua lompiat a Caleseda ant a èssere recuparados e fatos a pista ciclàbile in su tretu chi ruet in is comunus de Silìcua, Narcau, Santadi e Villaperùciu. In totu s’ant a ispèndere 800mila èuros chi arribant dae is santziones amministrativas pro violatziones paesagìsticas. Giai dae annos nc’at escursionistas meda chi faghent custu percursu, chi a tretos est ispetaculare, a pee e a bicicleta.
Martis 30: Est Andrea Corda, ex candidadu a sìndigu cun sa lista Unidos, su segretàriu nou de su sìndigu de Carbònia. Siguramente custu scioberu at fatu ispantu siat a intrus de su M5S carboniesu siat a s’opositzione. Infatis totus si abetaiant una persona interna de su Movimentu, invècias Paola Massidda scioberende Andrea Corda, chi est unu giornalista giòvanu cun tìtulos de istùdiu importantes, at ammostradu de èssere libera dae is ischemas tìpicos de sa polìtica.
Mèrcuris 31: S’est firmada in sa semifinale de is play-off sa cursa de sa Sulcispes de Sant’Antiogu chi fiat circhende sa ampuare in sa sèrie C silver de basket. Is òmines de Massidda de chi ant pèrdidu sa gara 1 in S’Alighera contras a sa CORAL, ant pèrdidu puru sa segunda partida in domu 58-54. Imoi ant isfidare su Basket Club de Uri pro unu eventuale ripescàgiu.
Giòbia 1: polèmica in su consìliu comunale de Sa Baronia-Villaperùciu. S’opositzione at dimandadu sa cunvocatzione de su consìliu pro arresonare in contu de s’indennidade de is amministradores. Sa cabugrupu e ex-candidada a sìnndigu M.G. Peis at torradu a atacare sa giunta comunale imputendi-dda de s’èssere aumentada s’istipèndiu isfrutende s’oportunidade chi donat sa lege natzionale de crèscere, a certas cunditziones, s’emolumentu de su 5%. Fiant ispantados pro custa essida is consilieris de magiorantza, cunsiderende chi is assessores de Sa Baronia pigant dònnia mese sa bellesa de 77 èuros e 46 centesimos netos e chi in d-un’annu no ant circadu mancu unu rimborsu pro is missiones fatas. Su sìndigu, Antonello Pirosu, at arrispùndiu ca totus is atos sunt a norma e chi a dònnia manera “s’istipèndiu” de sa giunta est prus pagu de su chi si pigaiant in sa consiliadura passada.
Cenàbara 2: in Piscinas s’Amministratzione Comunale in collaboratzione cun sa Pro Loco at obertu a su pùbblicu Villa Salazar, su palàssiu grogu cun is fentanas rùbias e asullas, chi abarrat acanta de su semàforu in sa SS293. Su palàssiu, progetadu dae s’architetu Giorgio Asproni jr a s’acabu de s’800, fiat in origine su magasinu pro regòllere su trigu e su lori prodùsidos in is terras de is donnos Salazar chi fiant is meres de Piscinas. In sa villa si podent biere mobìlia de su primu 900, colletziones de giornales de època e bistiris de sennores. Duncas imoe su Sulcis de Bàsciu tenet un’àtera prenda de ammostrare a is turistas. Villa Bice est aberta su giòbia dae is 17:00 a is 20:00, su sàbudu e su domingu dae is 10:00 a is 12:00 e dae is 17:00 a is 20:00.
Sàbudu 3: in Narcau at tentu unu bonu resurtadu “Sa Cumandara” s’initziativa cuncordada dae s’Amministratzione Comunale pro allichire sa bidda. Unu truma de una bintina de volontàrios, ghiados dae is amministradores, totus armados cun iscovas, guantos e palitas, dae bonu mangianu si sunt postos e ant arregotu s’àlliga e segadu s’erba in is pratzas e in is istressiadòrgios de sa bidda
Roberto Pinna
