Sa cida sulcitana in curtzu. Dae su 21 a su 27 de maju
Domingu 21: at tentu unu bonu resurtadu sa tapa de “Monumenti Aperti” fata in Santadi. Is piciocos de s’assòtziu “Su Coromeddu” cun is operadores de sa “Coop. Sémata” e sa collaboratzione de is iscolanos de s’istitudu de cumprensivu de Santadi e àteros volontàrios, ant “abertu” is museos santadesos, su situ pùnicu de Pani-Lòriga, s’ex presone mandamentale e sa tumba de is gigantes in Barrancu Mannu. Invècias sucessu mannu de pùbblicu pro sa de 4 tapas de “Primavera Sulcita” cuncordada in su centru de Teulada.
Lunis 22: Su Commissàriu Istraordinàriu de su Geoparcu, Giovanni Pilia, at giai aprontadu sa relatzione de s’acabu de su mandau suu chi iscadit su 28 de làmpadas e dd’at giai mandada a totus is òrganos cumpetentes. Cunsiderende chi est finas diregente in servìtziu in sa Giunta Regionale, e duncas non podet sighire toteduas is atividades, at arricumandadu a su Minesteru de s’Ambiente de ddu sustituire in sa ghia de s’òrganu de diretzione polìtica de s’Ente su prus a lestru possìbile.
Martis 23: in Carbònia s’est fata riunione de is sìndigos is comunos chi sunt parte du su SBIS – Sistema Bibliotecàriu Interurbanu de su Sulcis chi regollet 17 biddas sulcitanas – e ant programmadu is atividades pro ocannu. Cunfirmados su festival “TutteStorie” e is atividades de invitu a sa letura chi s'annu passadu ant otentu sucessu mannu e s’ant a fàere custu atòngiu chi benit. Ant previstu puru de comporare libros pro is bibliotecas e una parte de is cuotas chi pagant is comunos ddas an a pònnere pro comperare unu cunditzionadore nou pro sa biblioteca centrale sede de su sistema (in Carbònia) e pro ammodernare su sistema informàticu.
Mèrcuris 24: s’Amministratzione Comunale de Carbònia, gràtzias a una lege regionale, at a istabilizare 10 LSU. De siguru custa est una cosa bona ma mancai siat passadu giai un annu dae is eletziones parit pròpiu chi sa polèmica polìtica non bollat acabare prus. Infatis su sìndigu Paola Massidda in sa pàgina Facebook cosa sua (Paola Massidda - sindaco di Carbònia) at iscritu contras a is “peones” de su PD (in su gergu polìticu is peones sunt is chi contant pagu e nudda) chi fiant circhende de ismenguare su traballu fatu dae s’Amministratzione sua e chi sunt pròpiu is chi si chesciant candu s’ Amministratzione provat a torrare a organizare is servìtzios chi fiant gestidos dae cooperativas amigas de issos. S’ex sìndigu Giuseppe Casti e su segretàriu provinciale de su PD Daniele Reginali ant annuntziadu chi ant a cuerelare su sìndigu pro tutelare siat is iscritos a su PD siat is funtzionàrios de su Comunu e dd’ant isfidare a ammostrare de fronte a unu giugi su chi at decraradu.
Giòbia 25: est incumentzada in Tratalias sa Festa Manna pro onorare Maria Munserrara, sa Patrona de sa Diocesi Sulcitana. Dae Igrèsias s’istàtua nche dd’ant lòmpida a tratore in su brugu bèciu. Nche fiat gente meda apetende sa Santa ma no nche fiat su sìndigu cun sa fàscia tricolore. A cantu parit su comitadu organizadore de sa festa e su sìndigu non tirant paris pro su chi pertocat s’organizatzione. A parridade de su comitadu sa festa est de totu sa bidda e duncas si depet faere festa puru in su bidda noa non solu in su brugu bèciu.
Cenàbara 26: In Igrèsias si sighit a faeddare de sa chistione de is migrantes. Sa cabugrupu de Cas@ Iglesias in Consìliu Comunale, Valentina Pistis, at presentadu un’interpellàntzia a s’assessore a is polìticas sotziales in contu de sa gestione de is profugos e de s’aculièntzia in su territòriu comunale. Pistis dimandat de connòschere cales sunt is istruturas chi ospitant is migrantes; cantu sunt is migrantes in Igrèsias; cantu nde sunt passados finas a oe e cantu de issos ant otentu su deretu de asilu; cales sunt is progetos locales pro s’inclusione e s’integratzione de is istràngios e à urtimu dimanddant de connòschere cantu dinari s’est ispèndidu finas a imoi e chini at postu custu dinari.
Sàbudu 27: Su tempus est bonu, su mare est chietu e dae s’Algeria toorrat a lòmpere gente in sa costa sulcitana: 12 òmines ddos ant agatados in zona de Porto Pino, àteros 20 sunt isbaracados in s’ìsula Sant’Antiogu e pro ddos circare est arribadu puru un’elicòteru. Comente semper is Carabineris de sa Cumpangia de Carbònia cun s’agiudu de cussus de is istatziones de Sant’Antiogu, Giba e Tratalias nde-ddos ant arrigotos e lòmpidos a unu tzentru de collidura pro su rimpàtriu.
Roberto Pinna
