Sa Cida sulicitana in curtzu in lingua sarda comuna. Dae su 14 a a su 20 de maju
Domingu 14: Sighint cun resurtados bonos de pùbblicu is eventos cuncordados in su Sulcis pro custu beranu. Est andada bene meda “Monumenti Aperti” in Gonnesa (10% in prus de presèntzias cunfronta a s’annu passadu), discretamente est andada in Carbònia: sa de duas tapas de “Primavera Sulcitana” at fatu in manera de fàere aproliare unu bellu pagu de gente in pratza Roma, ma at fatu calare su nùmeru de bisitadores a sitos abertos.
Lunis 15: Daniele Conti, s’ex capitanu de su Casteddu, est andadu a Santu Giuanni Suèrgiu e in pari a Vittorio Sanna e Fabiano Gaggini, at presentadu a is istudentes de s’iscola elementare s’autobiografia sua “La mia vita in rossoblu”. Su vicesìndigu Marco Zusu at introdùsidu s’òspite e dd’at pregontadu unas cantu cosas chi nd’ant fatu essire a pillu sa grandu umanidade e is valores de s’òmine. A ùrtimu Conti at rispùndiu cun trancuillidade e siguresa a is totu su chi dd’ant pregontadu is piciocheddos; at tentu carchi problema candu una pipia dd’at dimandadu cali fiat sa cosa de papare sarda chi prus dd’agradaiat e pro nàrrere <<su porceddu arrustu!>> nc’at dèpidu pentzare unu pagheddu.
Martis 16: Federico Esu chi traballat in sa Diretzione Generale de sa Circa e s’Innovatzione de sa Cummissione Europea in Bruxelles est torradu in sa ex iscola cosa sua, su Liceu Gramsci Amaldi, aundi at contadu a is iscolanos su camminu chi nci dd’at fatu lòmpere a traballare s’istitutzione prus importante de s’Èuropa. Custa atividade est parte de s’initziativa “Back to school” chi prevedit chi is funtzionàrios de sa Comunidade Europea torrint in is iscolas superiores aundi ant istudiadu pro ammostrare is istudentes totus is oportunidades de traballu e de carriera chi donat sa UE.
Mèrcuris 17: in s’ùrtima setziada de su Consìliu Comunale de Carbònia mancaiant 5 consilieris de sa magiorantza a 5 isteddas e s’opositzione, francu Daniela Garau, est essida a foras dae s’àula e duncas no nche fiat prus su nùmeru legale e sa setziada est sartada. Sa magiorantza at imputadu s’opositzione de no èssere responsàbile ma su sìndigu Paola Massidda e su capugrupu de su M5S Manolo Cossu ant ammìtidu ca nche sunt problemas a intrus de su grupu consiliare chi depent èssere arrisolvidos a lestru. Dae s’opositzione Giuseppe Casti e Fabio Usai ant torradu a dimandare is dimissiones de su sìndigu proite ca no arrinescit a ghiare sa tzitade e in custu momentu istòricu de grandu dificoltade.
Giòbia 18: festa manna in Sant’Antiogu pro tzia Caterina Carracoi chi at fatu 100 annos. Tzia Caterina est nàscida in Brucei e s’est cojada cun tziu Raffaele Frau e dae Cuartu Sant’Aleni sunt bènnidos a bìvere n Sant’Antiogu aundi su maridu traballaiat in su portu. Tzia Caterina, chi at pesadu 12 fillos, bivit in domu sua in V. San Giovanni Bosco, aundi dd’atendint is fillos e is nebodes.
Cenàbara 19: In sa Grande Miniera de Serbariu s’est fatu unu cunvènniu de importu mannu a pitzus de sa ripresa industriale in su Sulcis. Cun sa moderatzione de su giornalista Vito Biolchini e de su sìndigu de Carbònia Paola Massidda si sunt cunfrontados espertos chi sunt contras a a sa ripresa industriale (comente s’architetu Fausto Martino, sopraintende de is benes culturales de Casteddu chi est s’ùnicu chi at donadu parridare negativa in s’iter burocràticu pro ripresa de s’Euroallumina) e àteras chi sunt in favore (comente Tore Cherchi, su coordinadore de su Pianu Sulcis, chi arregordadu sa traditzione industriale seculare de su Sulcis ). Àteros comente Luca Saba de sa Coldiretti ant nadu chi si depet agatare un’ecuilìbriu intrus de indùstria e is àteros setores econòmicos. Siguramente sa situatzione ambientale de su Sulcis est difìtzile meda e intendende is ùrtimas novas dae Machiareddu (su casu Fluorsid) parit chi in Sardigna non bengat bene chi s’indùstria arrispetit is règulas e is leges, e duncas parit diaderus chi seus cundennados a disastros ambianteles asuta de su ricatu ocupatzionale.
Sabudu 20: sutzessu mannu in Narcau pro sa de duas editziones de Su Triathlon a iscuadras cuncordadu dae s’ “ASD Campo di Tiro S. Lucia”. 25 iscuadras de 3 òmines si sunt isfidadas in d-una prova a istafeta acanta de su campu isportivu: unu depiat cùrrere a pee pro 5km, un’àteru a bicileta pro 10 km e s’ùrtimu depiat isparare a carabina in su campu de tiru. Is organizadores ant postu totu su dinari guadangiadu cun is iscritziones e sa cena sotziale pro comperare un’ambulantza noa pro is “Volontari del Soccorso Narcao”.
