Sa cida Sulcitana in curtzu. Dae su 7 a su 13 de maju
Domingu 7: Ant tentu unu sutzessu discretu de pùbblicu sa primu tapa de “Primavera Sulcitana” in Igrèsias e sa tapa de Bidda Massàrgia de “Sulcis Iglesiente in fiore”. Siguramente fiat meda mellus si is comunos, proscatotu candu sunt acanta de pari, si poniant de acòrdiu pro istransire cuncorrèntzias pagu simpaticas chi non faint bene a su territòriu proite chi ispartzint is turistas potentziales e non donant sinniale de unidade e cuncòrdia a intru de is amministratziones locales a is chi benint dae foras.
Lunis 8: De is 39 plàgias sardas chi ant otentu sa “Bandiera Blu”, 3 s’agatant in su comunu de Teulada: Portu Tramatzu, Tuerredda e Is Arenas Biancas. Su nùmeru de localidades e de plàgias chi dònnia annu otenint custu prèmiu est crescende semper e testimongiat su traballu bonu fatu in Sardigna dae is amministratziones locales pro sa sustenibilidade ambientale.
martis 9: Giuseppe Mannina su manager de sa Sider Alloys, sa multinatzionale isvìtzera chi est intressada a comporare s’istabilimentu ALCOA de Portovesme, in d-una cunferèntzia istampa in Roma at decraradu chi si donant totus is autorizatziones in 8 meses s’iat a pòdere torrare a produire a su 25% de su potentziale de s’istabilimentu donende traballu a 40 personas, cun s’obietivu de torrare a regòllere totu e 400 is traballadores a intrus de 2 annos. Sannina at nadu puru ca pro totu s’àrea industriale de Portovesme sunt fundamentales siat is infrastruturas (pro esèmpiu in su portu industriale bàsciu chi ddu dragant no ddoi podent atracare naves mannas) siat su prètziu de s’energia e isperat chi in su decretu de su Guvernu su prètziu siat istabilidu a intru de 19-30 èuros a Kilowattora.
mèrcuris 10: in Sant’Antiogu ant incumentzadu is traballos pro sa pista ciclàbile chi at a lòmpere finas a Santu Giuanni Suèrgiu e at a sighire su percursu de sa ferrovia bècia. Su dinari (giai 2 miliones de èuros) est de sa Provìncia de su Sud Sardigna e est parte de su Piano Sulcis. Sa pista at a èssere bella lada: 3 metros e 70 centimetros: a costau de sa pista pro is bicicletas s’at a fàere puru un àndala pro is chi caminant a pee.
Giòbia 11: In Carbònia s’est dimìtida s’assessora sa pubblica istrutzione Carla Mario. In mancu un’annu de mandadu amministrativu custu est su de 4 assessores de sa giunta de Paola Massidda chi s’est dimìtidu e de siguru no est sinniale bonu. Dae unu puntu de vista polìticu is dimissiones de Carla Mario sunt “graes” meda: fiat sa candida a consilieri prus votada de totu sa lista de su M5S (aiat pigadu prus de 350 preferèntzias personales) e dd’iant “promòvida” assessora. Imoi ca s’est dimìtida, pro motivos personales, non podet prus tènnere perunu ruolu ativu in s’Amministratzione carboniesa ma in sa lìtera protocollada in comunu at fatu ischire ca abarrat disponìbile a collaborare cun su sìndigu.
cenàbara 12: sit-in de protesta organizadu dae is partidos de su tzentru-dereta de fronte a su presone de Sa Stoia. A cantu narant is esponent polìticos locales is igresientes sunt acimbellados meda pro su fatu chi in s’ex presone si fatzat su “Centro si Permanenza per Rimpatri” e sunt prontos a cuncordare àteras atziones de protesta in prefetura. Is polìticos presentes ant sinnialadu ca si sighit a regòllere gente istràngia ma non si arrinescit a agatare sulutziones pro is disocupados e totus is personas in dificoltade chi s’agatant in su territòriu.
sàbudu 13: s’11 de làmpadas si votat in 4 comunos sulcitanos pro su sìndigu e pro rennoare is consìlios comunales e a pustis de meses de boghes sunt essidos is nùmenes de is candidados. In Sant’Antiogu sa cadira de sìndigu si dda gherrant in 4: Marco Massa (Insieme per Sant’Antioco), Ignazio Locci (Nautica, edilizia, turismo), Massimo Melis (Sant’Antioco Attiva) e Mariano Alberto Fois (Genti Noa). In Nuxis invècias si dda giogant in tres: s’ex consilieri regionale e professore de deretu Andrea Pubusa, su giometra Pierandrea Deias e s’ex ispetore de Politzia Mariano Nonnis. Puru in Carloforte tres candidados: Marco Simeone (Carloforte oltre il 2000), Salvatore Puggioni (Carloforte rinasce) e Salvatore Biggio (Isola di San Pietro). Duos candidados sceti in Portescusi: Rossano Loddo isfidat Giorgio Alimonda.
Roberto Pinna
