Sa cida sulcitana in curtzu. Dae su 30 de abrile a su 6 de maju
Domingu 30: s’est votadu pro is primàrias de su Partidu Democràticu, in Sardigna si votaiat puru pro s’eletzione de su segretàriu regionale. At bintu su senadore nugoresu Luigi Cucca (teniat s’apògiu de duas listas) ma in s’ex provìncia de Carbònia-Igrèsias, aundi ant votadu 3800 personis, at bintu s’àteru candidadu, su deputadu de Igrèsias Francesco Sanna cun su 53% de is votos. Pro s’eletzione de su segretàriu natzionale no nche fiat partida: defatis toteduos is candidados a sa segretèria regionale fiant in favore de Matteo Renzi chi at pigadu prus de su 80% de is votos.
Lunis 1 de maju: 13 algerinos sunt isbarcados in sa plàgia de Porto Pino. Is òmines chi istant totus bene, fiant impunnende conca a Sant’Anna Arresi ma ddos ant firmados is Carabineris chi comente semper nde-ddos ant pinnigados e lòmpidos a unu tzentru de identificadura.
Est acabada cun d-unu sutzessu mannu de pùbblicu sa de 658 sagras de Sant’Antiogu, Patronu de Sardigna. Mancai ocannu fessit paris cun Sant’Efis, a Sa ‘Idda est lòmpida gente meda: si chisitionas de assumancus 25mila presèntzias. Sa protzessione, cun totus is arrugas aundi est passada ornadas cun arrampos de prama (su sìmbulu de su martìriu) ddoi fiant unas cantu milla fideles acumpangiados dae 50 grupos folkloristicos de totu s’Ìsula, prus de 100 cavalieris e sonadores de launeddas. Duncas, a pustis de annos, sa de Sant’Antiogu est torrada a èssere Festa Manna de diaderus.
Martis 2: a mengianu is sìndigos de s’Unione de is Comunos Metalla e il Mare, sunt andados a bisitirare su presìdiu de is traballadores de s’AIAS de Cortoghiana chi sunt dimandende su pagamentu de is istipèndios arretrados. A merie est andadu su predi de Cortoghiana, don Andrea Zucca, a ddis donare sa beneditzione pascale. Is traballadores sunt abetende chi is impegnos pigados dae su Consìliu Regionale s’11 de abrile passadu pro isblocare sa vertèntzia bessant fatos cuncretos.
Mèrcuris 3: non serbit prus a abetare oras in is ufìtzios de sa ASL pro rennoare is esentziones de su tiket iscadidas su 31 de martzu. Sceti in sa sede de pratza S. Ponziano de Carbònia, dònnia die duos impiegados a solos fiant atendende prus de 100 personas. Su diretore de ASL cun d-unu comunicadu at fatu scire chi imoe bastat a andare a che su dotore de famìlia chi at a comunicare sa pròroga automàtica de s’esentzione pro is chi tenint su còdighe EO03, EO04 e EO01.
Giòbia 4: in Sant’Antiogu ant acabadu is ripresas de su cortometràgiu chi at a èssere trasmìtidu dae Canale 5 su mese chi intrat in s’àmbitu de su festival pro is iscolas “Ciak Junior”. Su documentàriu dd’ant scenegiadu e giradu is iscolanos de sa 2A de s’iscola de s’iscola mèdia, ghiados dae sa professora Barbara Sitzia. Su tìtulu provisòriu de s’òpera est “Mio nonno, uno degli ultimi maestri d’ascia”.
Sa Giunta Regionale, a segus de sa proposta de s’assessore a is Entes Locales Cristiano Erriu, at aprovadu su catàlogu de is interventos propostos dae is entes pùbblicos chi ant a dèpere regòllere a traballare (a tempu determinadu) is traballadores de s’ex Ati Ifras chi fiant impegnados in atividades collegadas a su Parcu Geomineràriu de sa Sardigna. Su dinari pro realizare is interventos est giai istantziadu in sa lege finantziaria 2017.
Cenàbara 5: un’àteru incidente mortale in is istradas sulcitanas. Unu casteddàiu de 42 annos chi fiat impunnende conca a Casteddu, fortzis pro mori de sa velotzidade arta meda, at pèrdiu su controllu de sa vetura e nc’est essidu deretu in d-una curva a su km 55 de sa SS 293 (a pagu tretu de Nuxis). Su mezu at istumbadu su guard-rail chi nc’est intradu aintru de sa màchina etotu. Is chi fiant andende avatu sunt calados sùbitu in su campu aundi fiat arruta sa vetura ma s’òmine fiat giai mortu.
Sàbudu 6: in Nuxis is sòtzios de su SpeleoClub locale, ghiados dae su professore Roberto Curreli, cun su sìndigu Roberto Lallai ant abertu su museu de geologia e de ispeleològia in is locales de s’ex miniera de Sa Marchesa. In is tres salas de su museu si podent osservare sequèntzias de arrocas e de minerales de totus is eras e periodos geològicos regortas in su Sulcis, riprodutziones de is repertos archeològicos agatados in is ambientes suterràneos de su territòriu de Nuxis e ainas pro sa geognostica e s’isploratzione de is grutas. Custu museu, chi si integrat in manera perfeta cun su museu archeològicu de Santadi e cussu de is minerales de Rosas, est un’àtera prenda de ammostrare a is turistas.
Roberto Pinna
