sa cida sulcitana in curtzu Dae su 4 a su 11 de maju
Domingu 4 : A pustis de is 13 personas lòmpidas sàbudu in sa plàgia de Porto Pino, dae s’Algeria nde sunt arribadas àteras 10 (9 òmines e 1 fèmina). Is chi fiant in sa plàgia de chi ddos bistos isbarchende ant telefonadu a is Carabineris chi comente sempre nde-ddos ant pinnigados e bàtidos a unu tzentru de collidura in Assèmini.
Lunis 5: est andada bene meda “La Lagune Espone” sa fiera de sa nàutica chi s’est fata in S’Antiogu custu fine de cida passadu. Prus de 20mila personas sunt aproliadas in su lungomare in Sa Idda e ant passilladu in mesu de 100 stand aundi ant pòtzidu osservare s’espositzione de produtziones locales, garas e ispetàculos musicales. Duncas prexu mannu de is santantioghesos e de is organizadores pro custu sutzessu chi at abertu in sa mellus manera s’istasone turìstica.
Martis 6: in totus is comunos sulcitanos sunt abertos is bandos pro dimandare s’ammissione a su REIS – rèdditu de inclusione sotziale – sa mesura noa bòfida dae sa Regione pro cuntrastare sa poberesa. Is chi ant a èssere ammìtidos a su programma ant a otènnere unu cuntributu chi partit dae 200 finas a 500 èuros (a sigunda de su cantu mannu est su nùcleu familiare insoro) e non depent tènnere unu rèdditu ISEE prus artu de 5.000 èuros, perou ant a dèpere sighire unu percursu personalizadu de istùdiu e de traballu chi depet portare is utentes a nche passare sa cunditzione de poberesa.
Mercuris 7: imoi in Carbònia, is chi ddu bolint fàere si podent coniugare in sitos diversos de sa domu comunale. Cun d-una delìbera is giunta cumale carboniesa at istabilidu chi is matrimònios si podent tzelebrare puru in s’anfiteatru de pratza Marmilla, in s’anfiteatru de Monte Sirai e in sa “sala argani” de sa Grande Miniera de Serbariu. Sa pròpiu cosa si podet fàere in Porto Flavia, in su Belvedere de Nèbida e in sa colònia de sa foresta de Marganai (in comunu de Igrèsias). Sigundu is amministradores custas initziativas bollent èssere una manera de promòvere su turismu in is duas tzitades mineràrias.
Giòbia 8: in Carbònia s’est torrada a dimìtere s’assessora a sa cultura Emanuela Rùbiu chi si fiat giai dimìtida a s’acabu de su mese de martzu passadu e apoi fiat torrada a intrare in giunta. Aici sunt 4 is assessores chi in prus pagu de annu sceti de mandadu si sunt diimìtidos in Carbònia. Ispantada su sìndigu Paola Massidda chi non si abetaiat custa detzisione ma at promìtidu chi a lestru at a nomenare un’àteru assessore. S’opositzione atacat e s’ex sìndigu Giuseppe Casti at torradu a dimandare is dimissiones de Paola Massidda proite no arrennescit a ghiare sa tzitade in custu momentu de crisi manna.
In su rifornidore ENI de bia Lubiana in Carbònia ant fatu una fura atrivida: calincunu est intradu in s’ufìtziu e nd’ant pigadu sa càscia cun su dinari. Is Carabineris de su nùcleu radiomòbile sunt arribados a lestru ma no ant acurtu a cassare is ladrones chi si-nde sunt fuidos cun sa bellesa de 6 èuros!
Cenàbara 9: sa politica carboniesa ormai at pigadu sètiu de telenovela. S’ex assessora Rubiu in d-una nota at ispiegadu is arresones suas (in bona sustàntzia chistiones de “metodo”) ma in d-unu grupu Facebook (Associazione Carbonia a cinque stelle) sunt aparèssidos cummentos misòginos e ofesas chi fortzis fiant pròpiu pro chini s’ex assessore Rùbiu. Custos cummentos sunt isparèssidos ma in s’interis is fèmminas de su M5S carboniesu ant criticadu chini ddos at iscritos.
Sàbudu 10: In Tratalias est incumentzada sa rassegna “Calici di Libri” cuncordada dae s’assessore a sa cultura G.Luca Lìndiri. Pro totu s’istade in su bidda bècia s’ant a fàere presentadas de libros e atòbios cun autores importantes. Custa initziativa est unu de is eventos de sa FieraOff de sa “Fiera del libro” de Igrèsias chi est organizada dae s’assòtziu Argonautilus.
Domingu 11: In 4 comunos sulcitanos s’est votadu pro s’eletzione de is sìndigos e su rennovu de su Consìliu Comunale. In Sant’Antiogu at bintu Ignazio Locci chi at pigadu giai su 38% de is votos, Alberto Fois de Genti Noa est arribadu segundu cun su 34,30, a su de tres postos cun su 16,2% Massimo Melis, male meda s’ex vicesìndigu Marco Massa (sceti su 11,7%). In Portescusi cunfirmadu Giorgio Alimonda cun su 53,8%. Su sìndigu nou de Carloforte est Salvatore Puggioni( at pigadu prus de 57%); sìndigu nou puru in Nuxis: Pierandrea Deias at bintu cun su 40,3%.
Roberto Pinna
