Sa cida sulcitana in curtzu. Dae su 28 de cabudanni a su 4 de mesi de ladàmine.
Lunis in Teulada ant incingiadu su tzentru pro s’impiegu. S’assessora su Traballu de sa RAS Alessandra Zedda at nadu chi pro Teulada, sende ch est unu comunu chi si agatat in positzione detzentrada, est unu servìtziu de importu mannu chi at permìtere de fàgher crèschere sa cultura imprenditoriale de su territòriu siat cuntzentrende is isfortzos in sa formatzione e in sa creatzione de autoimpresa. Est cuntentu su sìndigu Daniele Serra chi est cunvintu chi custu servìtziu at a èssere de agiudu fintzas pro s’orientamentu de is istudentes e de totus is tzitadinos.
Martis est acabada sa de 20 editziones de su Giro delle Miniere chi est stètia cunditzionada dae su tempus malu. Sa cursa dd’at binta s’atleta paralìmpicu friulanu Michele Pittacolo chi in s’ùrtima tapa, fata totu a s’atacu, at recuperadu is 50 segundos chi teniat dae su primu in classìfica.
Mèrcuris in s’EX MA de Casteddu ant presentadu sa de 10 editziones de su Carbònia Film Festival. Sunt 16 is filmis in cuncursu (8 metràgios longos e 8 metràgios curtzos). Paolo Serra, chi est su diretore de sa Società Umanitaria de Carbònia at nadu ca sa de ocannu est un’editzione cunditzionada dae s’apretu sanitàriu chi non permitit de fàere is atividades de is annos passados: is proietziones si faghent a in donu in su Cineteatro Centrale de pratza Roma ma podint intrare sceti 150 personas (tocat a prenotare su postu on line) ma gràtzias a una piataforma on line su traballu de seletzione fatu in antis de su lockdown si podit propònnere fintzas a su pùbblicu de “continente”. Francesco Giai Via, chi est diretore artìsticu de su festival, at ispiegadu ca su festival de ocannu est unu viàgiu chi ammostrat is mellus produtziones a pitzus de is temàticas de su traballu e de is migratziones fatas in Amèricas, Àfrica, Àsia e in àteros paisos europeos.
Cenàbara a mengianu In Igrèsias ant abertu su primu tzentru residentziali in Sardigna dedicadu a is problemàticas de su cumportamentu alimentare gestidu dae Casa Emmaus. S’assessora a is polìticas sotziales de su Comunu de Igrèsias Angela Scarpa at nadu chi su tzentru rapresentat un’ecellèntzia po sa tzitade e unu resurtadu de importu mannu pro totu su territòriu, chi at a permìtere de afrontare problemàticas chi sunt ispainadas meda, pruscatotu in is prus giòvanos, ma chi sunt connotas pagu e nudda.
Semper cenàbara, a pustis de is chescias de su sìndigu de Igrèsias Mauro Usai, is consilieris regionales sulcitanos Fabio Usai (PSdAz) e Michele Ennas (Lega) ant annuntziadu chi fintzas su laboratòriu de sa ASSL de Carbònia, a pustis de un iter burocràticu longu meda (sa Fondazione Sardegna iat postu su dinari pro comporare su machinàriu is primas dies de su mese de làmpadas) at otentu s’acreditamentu pro protzessare is tampones. In su mentris in logu nostru sighit a si ispainare su sars-cov-2: custa cida si sunt registrados 7 casos de positividade in Carbònia, 1 in Igrèsias e in Sant’Antiogu, e àteros 3 in Gonnesa aundi sa situatzione est cumplicada meda: in totu is positivos sun 35 e ancora sunt abetende s’èsitu de àteros tampones cun sa bidda chi est praticamente in lockdown: is iscolas sunt serradas, is locales pùbblicos serrant a is 18:00 Su sìndigu Hansel Cabiddu at dimandadu a sa ATS regionale unu screening de totus is residentes. Novas bonas dae Villaperùciu: giòbia s’est scìpidu chi is 45 tampones chi ant fatu lunis ant torradu totus èsitu negativu e duncas is piciocheddos baroniesos podint torrare a andare a iscola.
Su coronavirus ddu binceus sceti si totus rispetaus is règulas: distantziamentu sotziale, mascaredda in logu serradu e dònnia borta chi non podeus abarrare assumancus a unu metru dae is àteras personas.
Sàbudu a mangianu, in Igrèsias, volontàrios a tropas, asuta de sa ghia de Legambiente ant partetzipadu a Puliamo il Mondo: si sunt atobiados a is 8:30 in pratza Conte Ugolino e de inias ant impunnadu a su Casteddu de Salvaterra, a su Bonu Camminu, in is Giardinos Pùbblicos, a sa zona de is iscolas, a Su Pardu e Funtana Martzu ant regortu e seberadu àliga a muntones.
Domìniga est acabada sa de 5 editziones de sa Fiera de su Libru de Igrèsias. Su tema de ocannu fiat “Su Fueddu chi criat mundos”: su podere de su Fueddu de criare, donare sètiu e fintzas distrùere sa realidade. Craramente ocannu sa Fiera at patiu meda s’apretu sanitàriu: infatis is sòtzios de Argonautilus no ant pòtziu traballare cun is piciocos de is iscolas, ma si sunt fatas a su pròpiu presentadas de libros e de autores in sa Pratza de sa Seu (chi fiat semper prena a mericeddu) letziones cun professionistas in su Teatru Electra e atòbios de autores e editores chi ant arrexonadu de is problemàticas de s’editoria sarda.
Roberto Pinna
