Sa cida sulcitana in curtzu. Dae su 12 a su 18 de mesi de ladàmine
Lunis sunt arribados a metade is traballos in sa crèsia parrochiale de sa Madonna de su Rosàriu de Villaperùciu: de chi maistos ant arrangiadu is impiantos de sa domu canòniga e is muros de sa crèsia, ant incumentzadu a pònnere in siguresa su campanile e a torrare a fàghere sa faciada. In totu is traballos balint 100mila èuros e si faghent gràtzias a dinari postu dae s’Amministratzione Comunale.
Curiosu su chi est scìpidu martis: duas piciocas de una bidda sulcitana ant iscobertu chi fiant isposas cun su pròpiu òmine e de chi si sunt postas de acòrdiu e sunt andadas in pari e dd’ant insurtadu e ant filmadu totu. Pustis pro ddu isbregungire ancora de prus ant postu su vìdeo in Facebook ma s’òmine ddas at denuntziadas pro difamatzione.
Giòbia est istada una dii de lutu in Santu Giuanni Suèrgiu: est mancadu su presidente de sa ProLoco Pietro Armas. Armas fiat persona amàbile e de gabbale chi si impegnaiat meda pro sa bidda sua donende una manu de agiudu a organizare totus is eventos de is ùrtimos annos.
Terremutu in sa ASSL de Carbònia. Infatis mèrcuris est essida sa nova chi duos tampones oberados 20 dies innantis (e unu de custos est resurtadu positivu) siant istados imperados dae volontàrios pro provare su funtzionamentu de su machinàriu in su laboratòriu de microbiologia de s’ ispidale Sirai. Sa dirigèntzia de sa ASSL ant negadu narende chi una cosa sìmbile non fiat possìbile. Fatu istat ca giòbia su commissàriu istraordinàriu de sa ATS regionale at detzididu de cambiare sa dirigente de su servìtziu Maria Cristina Garau (chi però at presentadu difida a s’ATS) cun Francesco Ronchi, diretore de su pròpiu servìtziu in Seddori, motivende sa detzisione cun su fatu chi s’incàrrigu fiat iscadiu. Cenàbara su diretore locale de sa Assl, Ferdinando Angelantoni at presentadu is dimissiones chi sunt operativas dae lunis e andat a dirìgere s’Istrutura Cumplessa de Seddori e su postu suo dd’at pigadu Giorgio Carboni chi fiat su diretore s’àrea sòtzio-sanitària de Seddori etotu. De siguru su chi est sutzèdiu no est pròpiu craru e custu giru de nòminas e càmbias in is dirigentes faghent mancare sa fidùtzia de sa gente comuna in s’istitutzione. In su mentris tocat a abetare ancora chi su machinàriu intrit in funtzione e is tampones de su Sulcis sighint a ddos analizare in su policlìnicu universitàriu de Pauli.
Sèmper dae cenàbara ant serradu su portixeddu turìsticu de Sant’Antiogu e duncas is diportistas depint mòvere is barcas insoru. Infatis a pustis de su fallimentu de su gestore s’àrea est scercuestada e s’Amministratzione isperat chi a lestru sa RAS fatzat unu bandu chi permitat sa ricualificatzione e su rilànciu de s’istrutura chi est fundamentale pro s’econòmia turìstica de zona.
At tentu unu resertudu bonu meda s’eventu de sàbudu “In Iglesias – Chiese e Musei della Città” organizadu dae su Comunu cun sa collaboratzione de sa Diocesi de Igrèsias e medas assòtzios locales: su tzentru stòricu s’est trasformadu in d-unu museu ùnicu aundi is arrugas fiant is passadìtzos, is palàtzios e is crèsias is salas. A mengianu is ghias diocesanas ant acumpangiadu is bisitadores in is crèsias de su tzentru stòricu, a merì invècias fiant abertus is museus. Fiat prenu puru su Teatru Electra pro sa presentada de “I Delitti della Salina” s’ùrtimu romanzu de Francesco Abate pubblicadu dae Einaudi.
Una nova de utilidade: nc’at tempus fintzas a s’ùrtimu de custu mese pro presentare sa domanda pro èssere amìtidos a s’albu de presidente de sègiu eletorale (tocat a tènnere su diploma) e a s’albu de is iscrutadores.
A ùrtimu s’agiornamentu de sa situatzione covid. Mancai in su restu de s’Ìsula sighit is casos de positividade sighint a si ispainare, parit chi sa situatzione siat ammelliorende in logu nostru: in Domus Noas 3 sunt sanados e abarrant 6 positivos; in Gonnesa 23 sanados e is positivos calant a 27; in Igrèsias 3 positivos in prus (su contu totale arribat a 16 casos) e una classe de s’istitutu magistrale in isolamentu; in Bidda Massàrgia 7 personas sanadas e 3 positivos nous (7 su totale de is chi funt positivos); in Carbònia custa cida 5 positivos (su contu de is casos totale est arribadu a 17) e sunt 3 sanados; totus negativizados is 4 casos de Villaperùciu, totus negativos is cuntatos de s’ùrtimu casu positivu in Carloforte.
Is racumandatziones sunt sèmper is pròpias: tocat a portare sa mascareda semper avatu fintzas si seus in logu abertu, depeus donare cura a s’igene de is manos e mantènnere su distantziamentu sotziale e istransire is avollotos. S’augùriu puru est semper su matessi: a abarrare sanos!
a cura di Roberto Pinna
