Sa cida sulcitana in curtzu. Dae su 19 a su 25 de mese de ladàmine
Custa cida passada at fatu tempus bonu e pretzisos is algerinos sunt isbarcados a tropas in su Sulcis. Lunis intr’e Porto Pino e Teulada sunt arribadas 20 personas. Martis nd’ant firmadu 9 acanta de Is Pillonis (in comunu de S.A. Arresi) e 3 inderetura ddus ant firmados in Portobotte, in comunu de Giba ma non s’est agatada sa barchita chi ant oberadu. Mèrcuris is carabineris nd’at firmadu àteros 8 in Maladroxa (Sant’Antiogu). Comente sempert nde-ddos ant pinnigados e lòmpidos a su tzentru de collidura de Muristenis pro incarrerare is protzeduras de identificadura e espulsione.
In Igrèsias sighint is traballos de ingegnerizatzione de sa retza ìdrica: is 80 km de tubos ant a èssere partzidos in 7 distretos telecontrollados chi gràtzias a is aperèchiaduras eletrònicas (mèrcuris ant postu una vàlvula pro regulare sa pressione in via Zardini) s’ant a fàere is interventos in manera prus lestra e pretzisa.
Giòbia Sulcis Iglesiente Oggi at fatu 20 annos. Su primu nùmeru in su sutatìtulu teniat iscritu ca fiat “su giornale de sa Crèsia e de sa Gente”. Monsignor Tarcisio Pillola in sa presentada iat scritu chi su giornale depiat èsser cunsideradu comente un’aina de giudu pro fàgher arribare su messàgiu cristianu a is famìlias, pruscatotu a is chi non partecipant a sa vida de sa Crèsia. S’obispu nostru, Monsigor Zedda, at mandadu is augùrios a redatzione, torrende gràtzias a totus is diretores e a totu sa retza de is collaboradores, e at cumbidadu a sighire a andare a innantis in s’òpera de evangelizatzione de su territòriu.
Sèmper giòbia in Carbònia est mancadu Beppe Rampini chi est istadu unu bravu giogadore de fùbalu in is annus 60 (iat giogau cun Carbònia e fintzas cun su Casteddu in serie C) ma fiat prus connotu pro èssere unu grandu allenadore de giòvanos e pruscatotu unu mastru de vida.
De chi cida innantis is traballadores de sa Sotacarbo iant decraradu s’istadu de agitatzione Cenàbara s’assessore regionale a sa programmatzione Giuseppe Fasolino at annuntziadu su finantziamentu de 850 mila èuros pro afortiare is progetos de circa scentìfica e in prus at assiguradu chi sa Regione s’at a impegnare cun unu progetu legislativu chi fatzat prus sòlidu su benidore de una sienda chi est cunsiderada de interesse istratègicu.
Ant suspèndiu is campionados de fuballu diletantas (sighit sceti sa serie D) chi domìniga sunt arribados a sa de cincu giorronadas pròpiu candu is classìficas fiant incumentzende a pigare sètiu. In su girone G se sa serie D su Carbònia at pèrdidu sa primu partida in domu contras a sa su Savoia 1908 e tenis 5 puntos in classìfica ma cun d-una partida de recuperare (1 binta, 2 parègios e 1 perdìda). In su girone A de Promotzione regionale su Cortoghiana cun 9 puntos (3 bintas e 2 pèrdidas) est su de 4 postos, avatu sa Monteponi cun 7 puntos e su Villamassargia cun 6. In su girone B de prima categoria est primu a solu s’Atletico Narcau cun 13 puntos (4 bintas e 1 paregiada), 8 puntos sa Femassenti de Santuanni (2 bintas, 2 paregiadas e 1 pèrdida), 7 puntos s’Atletico de Villaperùciu e 5 puntos pro s’Antiochense 2013.
Agiornamentu a pitzus de sa situatzione covid: 3 casos in prus in Carbònia cun 14 negativizados (abarrant 7 positivos); primu casu annuntziadu giòbia in Santadi a pustis de una cida de boghes sena de controllu; 2 casos puru in Sant’Anna Arresi e 1 in Narcau chi però no est unu tzitadinu residente; 25 casos annuntziados totus paris de su sìndigu cenàbara prus àteros 8 de is dies passadas cun 4 iscolas serradas e 40 personas in corantena; 9 casos in prus a Carloforte cun una persona ricoverada in su CTO de Igrèsias proite ca no ddoi at prus logu in su Santissima Trinità de Casteddu. Novas bonas dae Gonnesa: sunt 45 is chi si sunt negativizados e abarrant sceti 10 positivos; in Domus Noas nisciunu casu nou, una persona est sanada e abarrant sceti 4 positivos.
Cida chi benit incumentzant cursos de lìngua sarda de primu, segundu e tertzu livellu, in comunos de Igrèsias e Carbònia chi sunt partner de sa provìntzia de su Sud Sardigna in progetos de sighidura de isperimentatzione linguìstica. Is cursos sunt a in donu e pro mori de s’apretu sanitàriu s’ant a fàere on line in sa piataforma “Zoom”. Totus is informatziones, is cuntatos e is mòdulos pro s’iscritzione si agatant in su situ www.limbasardasudsardegna.it
Comente dònnia borta is sòlitas racumandatziones: tocat a portare sa mascareda semper avatu, fintzas si seus in logu abertu, depeus donare cura a s’igene de is manos e mantènnere su distantziamentu sotziale e istransire is avollotos. S’augùriu puru est semper su matessi: a abarrare sanos!
A cura di Roberto Pinna
