Sa cida sulcitana in curtzu Dae su 21 a su 27 de cabudanni
Dòminiga e lunis passados s’est votadu pro su Referendum cunfirmativu de s’ismenguadura de su nùmeru de is parlamentares. S’afluèntzia in logu nostru est istada a giru de a su 32%, unu pagu prus bàscia de su datu regionale (34%). S’afluèntzia prus arta est istètia in Narcau cun 36%, cun Carbònia, Igrèsias e Sant’Antiogu a su 34%; sa prus bàscia in Nuxis cun su 26%. Craramente at bintu su eja cun sa mèdia de su 75%, sa punta màssima su eja dd’at tocada in Villaperùciu cun s’81,7 sa punta mìnima in Carbònia e in Igrèsias (pagu prus de 65%).5%,
In antis de arribare is travessuras de bentu estu e de àcua de custu fin’e cida, is algerinos ant sighidu a isbarcare in sa costa sulcitana. Dae Lunis a giòbia nd’ant arribadu 50: a bortas sunt arribados deretos a terra (in is pràgias de Tuerredda e de Porto Pino, in Sant’Antiogu e in su territòriu de su polìgonu de Cabu Teulada); duas barchitas ddas at interzetadas sa Guàrdia de Finantza in mesu de mare e nche ddas tragadas a su portu de Ponti in Sant’Antiogu. Comente sèmper is Fortzas de s’Òrdine nd’ant pinnigadu custas personas e nche-ddas ant lòmpidas a su tzentru de collidura de Muristenis pro incarrerare is protzeduras de identificadura e de esplusione.
Sighint a crèschere puru in logu nostru is casos de positividade a su coronavirus: àteros 3 casos in Villaperùciu (sunt 4 in totu) cun s’ATS chi lunis incumentzat unu screening ampru de sa popolatzione sende chi non est bènnidu bene a pònnere in fatu a sa cadena de cuntatos de unus cantu positivos e duncas su sìndigu, pro mellus siguresa, at ordinadu de serrare su parcu e s’istàdiu comunale e is iscolas (iscolas serradas fintzas a mèrcuris puru in Perdaxus e Narcau); unu casu s’est registradu in Nuxis e in Carloforte, lompit a 8 su totale de Domus Noas. Novas malas dae Gonnesa: in totu is positivos sunt arribados 31 e su sìndigu at fatu un’ordinàntzia chi firmat is iscolas cun bar e ristorantes chi depint serrare a is 18:30 (lassende lìbera s’atividade de asportu) e òbbligu de mascaredda a totu die. Cenàbara su sìndigu de Igrèsias Mauro Usai invècias at at annuntziadu novas bonas: sunt abarrados sceti 7 in corantena fiducìaria, 4 sunt is positivos: 1 nou (diagnosticadu in Cabu de Susu) e 3 casos bècius chi sunt abetende de si negativizare.
Totus cantu seus depeus cumprèndere ca custu virus no est brulla e sceti si nos cumportaus in manera responsàbile podeus bìnchere custa batalla contras a unu nèmigu chi non si bidet ma a sigunda de aundi inferrit faghet dannu mannu a is personas: pro èssere craros custa cida sunt duos is sulcitanos chi sunt mortos de covid e àteros sunt ricoverados. In prus tocat a aciungere chi est berus chi biveus in comunidades piticas e sa curiosidade e sa timoria sunt cosas normales ma est meda mellus, candu non conosceus a comente sunt is cosas, a abarrare citios e rispetare sa privacy de is personas in logu de imbentare boghes farsas chi podent èssere prus dannàrgias de su virus etotu.
Su 25 e su 26 de su mese de ladàmine si votat pro is eletziones amministrativas chi non si sunt fatas beranu passadu in 6 comunos de sa su Sulcis, sàbudu ant presentadu is listas. Si scidiat giai dediora chi in Santadi Marco Loi e Massimo Impera, toteduus assessoris in càrriga, circant de pigare sa postu de Elio Sundas chi lassat sa polìtica. In Giba s’isfida est sa pròpiu de 5 annos a coa ma a s’imbresse: ocannu at a èssere Learco Fois chi at provare a nde leare sa cadira a Andrea Pisanu. In Piscinas currit a solu Mariano Cogotti chi circat su de tres mandaus de sighiu e no iat a deper tènnere problemas pro su quorum sende chi est istimadu meda dae sa comunidade sua. In Tratalias su vicesìndigu Emanuele Pes provat a donare continuidade a s’atzione de Marco Piras ma si dda dept gherrare cun Mariano Balia. A pustis de un’annu de commissariamentu in Musei ant scioberare su sìndigu intr’e Doriano Pisanu e Sasha Sais. De siguru at a èssere una fèmmina su sìndigu de Bidda Massàrgia: tocat a bìere si is massargesos cunfirmant Debora Porrà o si ant a prefèrrere Rita Caboni.
Domìniga A pustis de 7 meses ant torradu a incumentzare is campionados de fubalu dilentantes. Inghitzat bene meda s’aventura de su Carbonia Calcio in sèrie D chi at bintu 2 a 0 a sa Torres de Tàtari. In su girone A de promotzione bene fintzas sa Monteponi chi at bintu 3 a 1 in domu de s’Arborea, rinviadas is partidas de su Villamassargia e de su Cortoghiana. In su girone B de sa prima categoria non s’est giogadu su derby intr’e s’Atletico Villaperuccio 06 e s’ Atletico Narcao, invècias s’Antiochense 2013 at bintu 2-0 cun sa Virtus Villamar e at paregiadu 1-1 sa Fermassenti in Serramanna in domu de sa Gialeto.
