Sa cida sulcitana in curtzu. Dae su 20 a su 26 de maju
Lunis 20: in Nuxis fiat una die de lutu. Infati ant interradu a Francesco Murru (89 annos), chi in su 1957, a 29 annos sceti, fiat istètiu su primu sìndigu in s’istòria de s’autonomia de -- Nuxis. Murru mancai fessit malisanu aiat bòfidu partecipare a sa festa pro is 50 annos de autònomia chi ant fatu 2 annos agoa.
-- In Carbònia est acabadu male meda unu certu intru de bighinos acuntèssidu domìniga a merie in sa fratzione de Caput Àcuas. Calincunu at telefonadu a is Carabineris e candu sunt lòmpidos ant agatadu un’òmine de 32 annos chi fiat boghende sànguine a arriu e ant iscìpidu ca is bighinos (babbu e fillu) dd’iant pigadu a corpos de arruncillu. A custos duos is Carabineris ddos ant arrestados in s’ùspidale CTO de Igrèsias (aundi fiant andados pro si fàghere medicare issos etotu) cun s’imputu de àere tentadu bocimentu.
Martis 22: est arribada una nova bona pro is ex traballadores de s’Alcoa. Infatis ant arregistradu su decretu interministeriale n.16 de su 29 de abrile 2019 chi ponet prus de 12 miliones de èuros destinados a Sardigna pro is ammortizadores sotziales. Est craru chi pro unu pagu is famìlias de is operàios ant tènnere unu agiudu pro bìvere ma sa prioridade de is polìticos regionales abarrat cussa de torrare a fàghere partire totu s’istabilimentu.
Mèrcuris 23: ant incumentzadu is traballos de fronte a s’intrada de su campusantu de Sant’Antiogu. S’at a fàghere unu pamentu nou a manera chi non si formint prus foghes de àcua candu proet chi at serbire puru de parchègiu. At a èssere fatu a nou puru s’impiantu de s’illuminatzione pùbblica, s’ant a bogare totus is barrieras architetònicas e s’ant a aprontare fintzas is box pro ospitare is chi bendint frores.
Giòbia 23 :una fèmmina fiat guidende sa màchina sua in s’intrada de Igrèsias candu s’est acatada chi bessiat fumu dae su cofunu de annanti. Custa s’est firmada e a comente at abertu su cofunu nd’essida una pampada chi fiat pro dda imbistire. Pustis est curta a lestru a nde bogare su fillixeddu chi fiat sètzidu a palas e at telefonadu a su 115. Candu is pompieris sunt arribados de sa vetura nde sunt abarradas sceti is lamieras e un’atzìchiru mannu meda pro sa fèmmina chi no at tentu perunu dannu.
Cenàbara 24: de bonu mangianu un’iscuadrone de voluntàrios, cun is iscolanos de s’istitutu G.Marconi de Santu Giuanni Suèrgiu, si sunt atobiados in Punt’e Tretu e asuta de sa ghia de Legambiente e nd’ant bogadu s’àliga chi, sighende custa usàntzia lègia, sa gente pagu abbista at abbandonadu a pagu tretu de sa pràgia. A pustis ant fatu su trashchallenge, unu giogu chi prevedit de pònnere in is social network (Instagram e Facebook pro esèmpiu) is fotografias de su logu a pustis a in antis de dd’àere allichiridu cun s’iscopu de ammostrare a totus chi su de èssere ativos e tziviles, a s’acabada, est cosa fàtzile.
Sàbudu 25: at torradu a cumentzare a pròere e duncas su tempus malu (nche fiat puru s’allerta groga) at fatu istrobu mannu a is eventos previstos in zona nostra pro custu fine de cida. Sàbudu a merì Tullio De Piscopo at sonadu a su pròpiu de fronte a 200 personas a paràcua abertu pro s’abertura de Sulcis Iglesiente Espone ma a s’acabada is organizadores ant detzìdidu de rinviare totu sa manifestatzione a su 16 de làmpadas. Invècias “Villamassargia in fiore” sunt arrinnèschidos a ddu fàghere a su pròpiu movende is totus is ispetàculos previstos in locales serrados.
Dòminiga 26: s’est votadu pro is eletziones europèas. In su Sulcis s’afluèntzia, comente in totu s’ìsula, est istètia bàscia meda: est andada dae a su pagu prus de su 28% in Piscinas a in Tratalias fintzas a su 37,40% de Portescusi. Is resurtados narant ca su primu partidu de su territòriu, a pustis de sa derrota de is eletziones regionales, est su M5S chi est primu in Carbònia (29,32%), in Igrèsias (27,61%) e in àteras biddas mesanas de su territòriu o sinoncas est segundu a palas de sa Lega chi bincit su Sulcis de Bàsciu (est clamorosu su 47% de Villaperùciu) e in Sant’Antiogu. Su PD sighit a andare male sende chi est arribadu primu sceti in Gonnesa e Carloforte e segundu in Carbònia e inderetura dd’at acabada a su de cuàturu postos, palas de Forza Italia, in meda biddas de su Sulcis de Bàsciu chi est zona dae semper fidele a sa dereta. Praticamente ant pigadu su nudda totus is àteras listas.
a ura di Roberto Pinna
