Sa cida sulcitana in curtzu. Dae su 29 de abrile a su 5 de maju
Lunis 29: no ant acurtu a iscobèrrere, gràtzias a su sistema de telecàmeras, is chi ant coreddadu su muru de su centru diretzionale de arruga Isonzo in Igrèsias iscriende sciollòrios contras a sa Politzia chi sunt aparèssidas àteras iscritas acanta de pratza Marmilla in Carbònia. Parit chi su bersàgliu siat unu marasciallu de is Carabineris chi ant incumentzadu is indàgines pro iscobèrrere s’autore de custa bella faina.
Martis 30: a pustis de s’ùrtimu rinviu ant incumentzadu is traballos pro su dragàgiu in sa laguna de S.Antiogu. Ma is chi ant incumentzadu sunt traballos chi serbint a cumprèndere sceti cantu arena nde depent bogare dae su fundu e de chi acabat sa dita depit furnire a s’autoridade marìtima is datos de s’indagine chi ant a serbire pro donare su via lìbera definitivu pro custa faina de isgavu chi is operadores de su portixeddu turìsticu sunt abetende dae annos meda.
mèrcuris 1 de maju: fiat sa festa de is traballadores. Manifestatziones in su Sulcis no nd’at fatu, at a èssere chi su traballu est semper prus pagu e ormai sa gente est iscrètia e is giòvanos sighint a emigrare. Ancora non si scit nudda de is ammortizadores sotziales pro si ex traballadores de su polo industriale de Portovesme. Siguramente, si puru isblocant totus is protzeduras, nc’ant a passare meses pro chi arribit su dinari e sa situatzione de is famìlias est semper peus cada die chi passat.
Giòbia 2: a pustis de is travessuras de bentu de Pasca Manna su tempus s’est assetiadu e pretzisos sunt torrados is isbarcos de algerinos in su Sulcis. In Porto Pino sunt arribadas 2 barchita0s aundi ddoi fiant in totu 15 personas. Comente dònnia borta nde-ddas pinnigadas is Carabineris e nche-ddas lòmpidas a su centru de collidura de Muristenis pro is bìsitas mèdicas e is protzeduras de identificadura e de espulsione. A pustis de is controllos est essidu a pillu ca 3 de custas personas nche-ddas aiant giai bogadas dae s’Itàlia s’annu passadu e duncas ddas ant denuntziadas (unu dd’ant arrestadu e processadu, is àteras duas abarrant in istadu de libertade).
Cenàbara 3: comente dònnia annu est essidu s’elencu de is logos chi ant otentu sa Bandera Asulla chi est unu reconnoschimentu donadu dae su FEE (chi est un’organizatzione internatzionale non governativa) a is localidades costeras chi arrispetant standard artos meda de limpiesa de is àcuas e de is servìtzios balneares. Ocannu in Sardigna nd’ant donadu 18 e s’est bista sa cunfirma de su Comunu de Teulada pro is aprodos turìsticos e pro sa primu borta at otentu sa bandera asulla puru Sant’Antiogu pro sa pràgia de Maladroxa. Su sìndigu Nàssiu Locci est contentu meda e at decraradu ca su primu de mese de argiolas dd’ant a cuncordare in sa pràgia. Locci in prus at torradu gràtzias a totu is dipendentes comunales chi ant traballadu pro fàghere sa dimanda e at nadu chi in custa manera Sant’Antiogu otenit unu reconnoscimentu internatzionale chi donat prestìgiu mannu e at a agiudare sa crèscida de totu su setore turìsticu.
Sàbudu 4: in custu fin’e cida sunt acabados Is campionados de fuballu dilentantes. In su girone A de promotzione cun sceti 7 puntos su Carloforte est ùrtimu e calat in prima categoria; acabat a mesu classìfica cun 42 puntos su Bidda Massàrgia, sa Monteponi de chi in mese de idas pariat cundennada a sa retrocessione at acabadu a su de cuàturu postos cun 46 puntos gràtzias a s’arribu de su narcaresu Samule Curreli chi cun 19 gol sengados in 20 partidas est su capocannonieri de su campionadu; su Carbònia invècias arribat tertzu e si giogat sa promotzione a is play-off. In su girone B de primu categoria ammancant ancora 2 partidas cun su Cortoghiana chi est a unu puntu de su playoff e s’Isola di Sant’Antioco chi est circhende de salvare. S’Antiochense at bintu su girone suu de secunda categoria cun 3 giorronadas de antìcipu e duncas artziat dereta in prima. Artziat dae sa tertza in segunda categoria su S.A. Arresi chi cida passada at bintu 1-0 s’isparègiu contras a su Silìcua in Carbònia.
Dòminiga 5: Est andende bene meda sa de 660 sagras de Sant’Antiogu. Mancai ocannu su tempus non fessit bellu pro nudda (at suladu bentu estu forte e nche fiat puru s’allerta mèteo) a Sa ‘Idda est lòmpida gente a tropas pro onorare su Patronu de Sardigna. Fata sàbudu sa protzessione de is cocois cun is devotos chi ant bàtidu a sa basìlica su pane pintadu, domìniga fiat sa die de is tracas, de is parìglias, de is ballos sardos e de is cuntzertos. In custas dies non sunt ammancados cunvènnios cun istudiosos de istòria e mostras de fotografias e sutzessu mannu at tentu Sulkinfiera, s’espositzione de is prodotos tìpicos cun esposidores chi sunt lòmpidos dae totu s’ìsula. Duncas sa Festa de Sant’Antiogu est cunfirmende-sì Festa Manna de diaderus.
Roberto Pinna
