Sa cida sulcitana in curtzu. Dae su 21 a su 27 de gennàrgiu
Lunis 21: una nova chi podit èssere de agiudu pro medas famìlias chi tenet una persona disàbile in domu: is amministratziones comunales ant obertu su bandu is pianos personalizados de sustegnu previstos dae sa lege regionale 162/98 e duncas is chi sunt interessados depent andare a is ufìtzios sotziales de is comunos pro si informare e iat a èssere bene pro totus is chi tenent s’idea de fàghere sa dimanda de aprontare su modellu ISEE chi si podet fàghere in is CAAF.
Martis: in S.Anna Arresi is rapresentantes de sa sienda Italgas at atobiadu is amministradores de is comunos de su Sulcis de Bàsciu pro s’isterrmimentu de sa retza de su Gas. S’Italgas at a pònnere, paris cun is tubos de su gas, puru is cavos pro s’internert a velotzidade arta. Ormai est 10 annos chi si chistionat de custas cosa e sende chi s’iter de is autorizatziones est giai a innantis est capassu chi custa siat s’orta bona: a su chi narant is tènnicos in 2 annos s’iant a deper ativare is primas utèntzias.
Mèrcuris: in Nuxis is iscolanos de s’istitutu cumprensivu de Santadi in un’atobiadu organizadu dae s’Amministratzione Comunale ant ascurtadu s’interventu de educadora, de su maresciallu de is Carabineris Stefano Alba e de mastru Marcello Silvestri chi est su màssimu espertu de Ju-Jitsu in Itàlia in contu de su bullismu. Prima ant arrexonadu a pitzus de ita est su bullismu, comente si isvilupat, cales sunt is càusas e comente si podet cuntrastare custu fenòmenu e a pustis is piciocheddos cun sa ghia de su mastru Silvestri ant fatu unas cantu esercìtzios de reatzione pràtica a is àttos de bullismu.
Giòbia: is Carabineris de sa Cumpangia de Carbònia, cun is collegas de Deximu Mannu e de Lumezzane (Brescia) ant arrestadu in totu 14 personas chi in su periodu 2016-2017 in sa zona de su Sulcis e de su Campidanu de bàsciu ant fatu furas meda in butegas e in domos privadas e fintzas rapinas a is corrieris chi nde arritiraiant s’incassu de is machineddas papa-dinari chi si agatant in is locales pùbblicos. Pro unas cantu de is arrestados est partida puru sa denùntzia pro sa detentzione e su tràficu de armas illegales. In custa ghenga nche fiat gente abbista e àbile a oberare sa tecnologia prus moderna proite chi ddos ant agatodos puru ainas chi serbint a nde istudare is sistemas de allarme. In sa percuisitzione chi is Carabineris ant fatu in su campu rom de Carbònia ant agatadu puru rivoltellas, fusiles, oraria, arrelògios e àteras cosas furadas pro unu valore de prus de 100 mila èuros chi ant a èssere torradas a is meres.
Cenàbara: Sebastiano Dessany, unu musicista sardu chi bivit in Inghilterra e chi est faende su giru de totus is biddas de Sardigna a bicicreta at lassadu su Sulcis-Iglesiente e imoi est bisitende is biddas in sa costa acanta de Casteddu. Dessanay est abarradu cuntentu meda pro s’acullièntzia chi dd’ant fatu e ispantadu pro sa bellesa e sa richesa de sitos chi at agatadu in logu nostru e at pregontadu a chini iscriet custa rubrica proite custa zona chi est prena de bellesas frutu de su traballu de is òmines e de sa natura asserit a èssere sa prus pòbera de totu s’Itàlia. De siguru una pregonta atzuda e sigumente a lestru eus a votare iat a andare bene a fare a ddu dimandare a is 96 candidados ispartzidos in 24 listas (11 pro su tzentru-dereta de Cristian Solinas, 8 pro su tzentru manca de Màssimu Tzedda, a cara de una pro su M5S, Audeterminatzione, Comunistas, Mauro Pili e Paolo Maninchedda) chi circant una cadira su palàssiu de arruga Roma in Casteddu.
Sàbudu 27: in Sant’Antiogu ant arregordadu is algerinos chi sunt mortos in mare su 16 de su mese de donniassantu passadu. S’assessore regionale a is afàrios generales Filippo Spanu, su sìndigu Nàssiu Locci, s’imam Golam Kibria e don Marco Lai in pari a 2 piciocos chi si sunt sarvados cun una barca de sa Guàrdia Forestale sunt andados in su logu de su naufràgiu e ant lassadu una corona de frores. A cantu parit s’annu passadu sunt prus de 200 is giovànos algerinos chi sunt mortos tentende de sartare su mare pro arribare a su logu nostru pro circare una oportunidade de una vida diferente.
Domìniga 27: in su 1945, pròpiu in custa data, s’esèrcitu sovièticu fiat intradu in su campu de cuncentramentu de Auschwitz in Polonia e aiat iscobertu su machìmine prus mannu chi fortzis est mai acuntèssidu in Europa. Dae s’annu 2005 custa data est arregordada che “sa die de sa memòria”. In totu su Sulcis-Iglesiente non sunt ammancadas is initziativas pùbblicas organizadas dae is iscolas e dae is bibliotecas. S’ispera est chi, cun is tempus chi semus bivende, chi abarrit biu s’arregordu de su chi est sutzèdiu e pro custu motivu est pretzisu a istudiare e a resonare de cussos fatos, mancai siat dolorusu, pro chi su machìmine de is òmines non torrit mai prus.
Roberto Pinna
