Sa cida sulcitana in curtzu. Dae su 14 a su 22 de gennàrgiu
Lunis 14: is sìndigos de Caleseda e Sant’Antiogu ant mandadu una lìtera a su sìndigu de Carloforte in contu de s’istitutzione de un’àrea marina amparada. Nàssiu Locci e Antonio Vigo dimandant a su collega Puggioni de torrare a intrus de s’ispiritu de s’Unione de is Comunos pro chi si traballit totus in pari a s’istitutzione de s’àrea marina amparada e de coinvòlgere puru s’amministratzione comunale de Portescusi e ispiegant ca sceti sa volontade comuna de totus is amministratziones podet portare unu resurtadu bonu e utilosu pro totus is comunidades chi bivint e fintzas chi si bivint de cussu arrogu de mare.
Martis 15: in pagas dies at a arribare s’autorizatzione pro fraigare un’àtera banchina chi at a cumpletare su portixeddu turìsticu de Porto Pino. Su comissàriu mandadu dae sa Regione Bruno Carcangiu at decraradu ca nche sunt 130mila èuros prontos pro nche ghetare is arrocas chi ant a amparare s’intrada de su portu e pro pònnere is pontiles chi ant a fàghere una banchina longa 60 metros chi at a permìtere s’atracu de barcas de piscadores longas prus de 10 metros e puru de barcas a vela. Si totu andat bene e si su tempus ddu permitit pro su beranu chi benit at a èssere totu prontu.
mèrcuris 16: sighint is traballos pùbblicos in Sant’Antiogu. Sa giunta comunale at aprovadu su progetu esecutivu chi balet 100mila èuros pro aberrere sa parte de sa necròpoli pùnica connota con su nùmene de Is Pirixeddas chi abarrat a pagu tretu de su forte Su Pisu e s’at a fàghere puru un’istrutura de linna chi at serbire de infopoint turìsticu. A lestru incumentzant is cantieres regionales LAVORAS chi ant a donare traballu a 36 personas in 5 cantieris comunales; àteros 350mila èuros ant a èsser postos pro acabare de arrangiare s’asfartu in is arrugas de su centru de Sa Idda.
Giòbia 17: s’amministratzione comunale de Carbònia e su Carbonia Calcio ant agatadu un’acòrdiu pro sa chistione de su dèpidu lassadu pro sa gestione de s’istàdiu comunale. In bona sustàntzia s’Amministratzione bolet chi s’assòtziu reconnosciat una parte de su dèpidu (9.000 èuros est su tanti chi ant carculadu is ufìtzios a manera forfetària) e chi si paghit assumancus una prima rata. A pustis si podet incumentzare sa protzedura de cumpensatzione de su crèditu chi tenet s’assòtziu isportivu (15mila èuros) pro is traballos chi su club decrarat de aere fatu aintrus de s’istàdiu.
Cenàbara 18: is candidados a presidente de sa Regione sighint a èssere 7 ma s’est arritirada, a pustis de duas debatas cun is àteros candidados, Ines Pisano chi at nadu chi no at agatadu is cunditziones giustas e chi is positziones suas sunt acanta de su candidadu de su centru-manca Massimo Zedda e in su mentris est caladu in campu su giornalista e iscritore Vindice Lecis pro is Comunistas Sardos.
Sàbudu 18: ormai is listas de is candidados sunt prontas e in sa zona nostra si presentant amministradores locales meda in is coalitziones de centru-manca e centru-dereta. Infatis si candidant cun su centru-dereta: Veronica Impera (assessora in Santadi), Giorgio Alimonda, Gianfranco Trullu e Laura Cappelli sìndigos de Portescusi, Perdaxus e Buggerru; cun su centru-manca si candidant Ilaria Pisu Domus Noa (assessora in Domus Noas) e Ilària Portas (vicesìndigu de Masainas). Fabio Usai de Carbònia chi est cunsideradu s’òmine prus forte in cursa andat cun su PSdAz e si gherrat su cadira cun Paolo Dessì. Nc’at curiosidade pro su resurtadu chi ant a otènnere is partidos de s’àrea indipendentista/autonomista. Unu chi iat a poder otènnere unu cunsensu bonu est ex sindacalista de sa CISL Fabio Enne chi s’est candidadu cun su Partidu de is Sardos chi est semper istadu bastante crìticu cun totu su mundu de sa polìtica, massimamente pro sa gestione de su Piano Sulcis.
Domìniga 20: Is campionados de fubalu diletantes sunt arribados giai a sa de duas giornadas de sa torrada. In su girone A de promotzione sighit a abarrare a s’ùrtimu postu su Carloforte chi ormai est cundennadu a sa retrocessione; de chi fiat partida male meda s’est arripigliada sa Monteponi chi s’est arribada in zona trancuilla cun 21 puntos, sunt a su de tres e de cuàtru postos su Carbònia e su Bidda Massàrgia chi sunt gherrendesì unu postu pro in ia Play Off (36 e 31 puntos). In su girone B de primu categoria sunt gherrendesì su primu postu su Cortoghiana cun sa Fermassenti (prima e segunda), trancuillos in mesu de sa classìfica su Narcau e s’Atletico de Villaperùciu, ancora in zona Play Out s’Isola de Sant’Antioco. In su girone C de sa segunda categoria su discursu pro sa promotzione est a aintrus de s’Antiochense 2013 chi est prima a sola tres puntos a innantis de sa Monreale Calcio cun totus is àteras iscuadras chi sunt 10 puntos a coa.
Roberto Pinna
