NOTA! Questo sito utilizza i cookie e tecnologie simili.

Se non si modificano le impostazioni del browser, l'utente accetta.

Approvo
22
Tue, Jan
20 Nuovi articoli

Sa cida sulcitana in curtzu. Dae s’12 a su 18 de donniassanti

Novas in Sardu (LSC)
Aspetto
Condividi


Sa cida sulcitana in crtzu. Dae s’12 a su 18 de donniassanti

Lunis 12: in sa Grande Miniera de Serbariu est incumentzadu unu cursu organizadu dae sa “Società Umanitària” finantziadu dae sa RAS pro imparare a intervistare e a ascurtare. Is 20 cursistas, cun sa ghia de is antropologos de s’universidade de Casteddu e de chircadores internatzionales, ant a sighire unu percursu formativu de 56 oras chi at a acabare cun s’intervista de ex minadores e s’iscritura de unu documentu de sìntesi chi indagat sa vida a intru de su chi si podiat nàrrere “sistema miniera” chi pro annos meda at influentzadu (e ddu faghet ancora) in sa vida in totu su territòriu nostru.

Martis 13: Giuseppina e Assuntina Pes, sorres tessingianas de Sant’Antantiogu chi aiant imparadu s’arte in s’iscola de su mastru mannu Italo Diana, ant donadu a duas tiallas tèssidas a bissu e filos de oru pro s’artari e sa trona de sa Seu de Igrèsias aici a comente aiant fatu pro sa crèsia de Sant’Antiogu. S’ocasione fiat cussa de sa celabratzione de sa Dies Natalis de su Patronu de Sardigna (est a nàrrere sa die de sa morte terrena chi pro is fideles est sa nàschida de sa vida eterna). De siguru custas òperas, tèssidas cun is colores chi arregordant sa vida de su Santu, sunt unu donu pretziadu meda pro su Seu.

Mèrcuris 14: tanti pro cambiare in Carbònia si faghet polèmica polìtica. No ant a fàghere prus is eletziones pro is comitados de cuartiere proite chi no abastant is personas chi de voluntàrios e a in donu depiant fàghere s’iscrutadore in is 8 sègios citadinos. Dae su PD ant atacadu sa magioranza proite chi is comitados de cuartiere fiant unu de is puntos prus importantes de su programma aministrativu e su fatu chi non siant arrennèssidos a agatare voluntàrios testimongiat chi sa magiorantza est semper de prus distacada dae sa citadinàntzia fintzas candu faghet propostas bonas. Dae sa magioranza a 5 Isteddas arrispundint chi depiant èssere puru is àteras fortzas polìticas, si de diaderus crediant in custu progetu, a donare una manu de agiudu e chi custa e sa sòlita polèmica de s’opositzione pro cuare s’iscarsia de propostas polìticas alternativas.

Giòbia 15: est acabadu in tragèdia su tentativu de isbarcare in su Sulcis de unu grupu de algerinos. Sa Guàrdia Costera in grofu de note est andada a agiudare una barchita chi teniat su motore guastu e fiat bordigende a 20 mìglias de Sant’Antiogu. In sa barca ant agatadu 3 òmines chi ant nadu sùbitu chi nde ammancaiant àteros 8 chi, ingannados dae is lughes in costa e dae sa note niedda, si nche sunt ghetados a s’àcua cunvintos de lòmpere a terra anadende. Sunt partidos is elicoteros e àteros mezos de sa Finantza e de sa Marina pro ddos circare ma fntzas a imoi nd’ant agatadu sceti 2 mortos e sunt sighende a circare is àteros chi ammancant.

Cenàbara 16: de chi dd’iant presentada cenàbara a mengianu est acabada domìngu a merie cun d-unu sucessu mannu de pùbblicu e fintzas de crìtica, sa de tres editziones de “Una Miniera di Cultura” est parte de unu percursu de promotzione de s’editòria sarda ispartzinadu in totu su territòriu regionale e prommòvidu dae sa RAS. Ocannu in totu ant presentadu 7 libros, una regorta de documentàrios e sa proitezione de su film “Scritto nella pietra” de Gianfranco Cabiddu in su Cineteatro centrale. S’argumentu printzipale, sende chi ocannnu Carbònia cumprit 80, fiat s’istòria de sa fundatzione de sa citade etotu e fintzas su raportu de Carbònia cun is traditziones sardas.

Sàbudu 17: in Bidda Cidru at fatu riunione de s’Assemblea de sa Fundatzione de su Camminu di Santa Bràbara. Giampiero Pinna chi est su presidente de sa fundatzione at presentadu is resurtados de ocannu: su nùmeru de pelligrinos chi a bellu a bellu est crescende e incumentzant a nde arribare fintzas dae s’èsteru cun sa presèntzia de tour operators de s’est Europa e at ammostradu puru is progetos preliminares pro fraigare sa ciclovia (pro andare a bicicreta) e s’ipovia (pro andare a cuaddu). De siguru nc’at ancora cosa meda de fàghere pro sa promotzione e massimamente serbit sa collaboratzione de is privados e de totus is entes pùbblicos pro chi is àndalas abarrint abertas e prus de totu tocat chi acabint is certos in intro de is assòtzios.

Domingu 18: in Masainas est acabada sa de XVIII editziones de “Dalla Terra e dalle Mani”, chi ormai est unu eventu clàssicu de s’atòngiu sulcitanu. Sunt istadas duas dies de atòbios aundi espertos de agricoltura ant arresonadu cun sa gente comuna in contu de s’avaloramentu de sa biodiversidade e de is prospetivas de sa filera de produtzione curtza in su benidore. Comente semper non sunt ammancados is laboratòrios temàticos de arresonamentu colletivu in contu de ita mundu bolemus fraigare in su benidore movende dae su rispetu de s'ambiente chi est una parte de importu mannu de s’identidade nostra.

Roberto Pinna