Sa cida Sulcitana in curtzu. Dae su 17 a su 23 de Cabudanni
Lunis 17: ant torradu a incumentzare is’iscolas e in Carbònia ddoe at unu pagu de treullu. Infatis su commissàriu istraordinàriu de sa provìncia Mario Mossa cun d-unu decretu nd’at pigadu 3 àulas de s’ex liceu clàssicu dae s’istitutu Beccaria pro ddas donare a su liceu Gramsci-Amaldi. Prexada meda Tonina Puggioni dirigente de su liceu, arrinnegadu Antonello Scanu diretore de s’istitutu tènnicu chi est ispartzidu in 3 sedes e chi est ospitende puru is istudentes de s’iscola de arruga Satta. Ddoe iata èssere disponìbile s’edifìtziu de arruga Dalmazia, ma Mossa at nadu chi nde depent fàgherre unu ostellu (o assumancus aici narat su progetu) e duncas tocat a tènnere passièntzia e abetare chi acabint is traballos in s’iscola de arruga Satta (dae su Comunu ant nadu chi in 6 meses iant a dèper acabare) e a pustis at a torrare totu uguale a prima.
Martis 18: sa Dìnamo Tàtari at bintu a is campiones turcos de su Fernerbache (3 bortas finalistas in ùrtimos 3 annos de s’Eurolega) in d-una partida giogada in su palàssiu de s’isport de Carbònia. De siguru est una bìncida de prestìgiu ma non bolet tenta tropu in contu sende chi a is turcos ddis mancaiant totus is giogadores titulares chi fiant impegnados cun is natzionales insoru (puru s’olbiesu Gigi Datome). Sa partida fiat bella meda: su primu tempus est acabadu 52 a 45 cun is iscuadras chi curriant meda e is defensas allirgas. In su segundu tempus est crèscida sa pressione difensiva, cun is allenadores chi non bolliant pèrdere e fatu fatu aboxinaint puru a is arbitros. Is turcos ant sorigadu sa Dinamo a s’acabu de su de 3 cuartos ammostrende su talentu superiore de is giogadores insoru ma a s’acabara is giogadas de su pivot irlandesu Cooley e de sa guàrdia americana Bamfort ant fissadu su puntègiu a 95 a 86.
Mèrcuris 19: s’obispu de Igrèsias monsignor Zedda at nomenadu don Andrea Zucca, chi est predi in Biddiarriu in comunu de Giba, amministradore de sa parròchia de Santu Pontzianu in Carbònia.
Giòbia 20: su consìliu comunale de Carbònia no at arrìtzidu sa proposta fata dae s’opositzione de incarrigare is ufìtzios de pigare dònnia initziativa ùtile pro trasferire a s’AIAS is risorsas econòmicas chi serbint pro pagare is dipendentes. Dae sa magiorantza ant ispiegadu chi su Comunu de Carbònia at a pagare su dèpidu sceti de chi s’at a averguare, in manera pretzisa, si custu dèpidu esistit e chi su problema no est su Comunu ma s’azienda etotu chi non pagat is dipendentes suos dae 8 meses.
Cenàbara 21: sa RAS at a pònnere 83mila èuros pro is “eventos manos” chi s’ant a fàghere in Sant’Antiogu s’annnu chi benit. 50mila ant a andare pro s’Arena Fenicia Festival e 33mila pro s’ “Isola del Tesoro”. Soddisfatzione manna pro is amministradores comunales chi si gosant su sutzessu de ocannu e giai sunt priparende s’annu chi benit.
Sàbudu 22: in sa crèsia bècia de Tratalias munsignori G.P. Zedda at atobiadu sa pastora de sa Crèsia Batista E. Greene I. Pavaloaia de Crèsia Ortodossa in pari a unu grupu fideles in ocasione de sa de XXII Giorronadas pro sa Custòdia de su Creau. Ocannu s’est arrexonadu, in pari a rapresentantes de is assòtzios locales de s’agricoltura, de s’indùstria e de sa pisca, in contu de s’àcua chi est sa risorsa printzipale pro dònnia atividade umana e non faghet pròpiu a nde fàghere de mancu pro bìvere. A acabare sa giorronada unu bellu pràngiu a sa sarda cumbiradu dae sa pro loco de Tratalias e una passillada a sa diga de Montepranu cun sa rècita de su Babbu Nostru comunitàriu e is conclusiones de Monsignor Zedda.
Domingu 23: Sàbudu a note Gianni Morandi, de chi at acabadu is ripresas pro sa de 2 sèries de “L’isola di Pietro” at fatu unu cuncertu a indonu pro is Carlofortinos e nd’at aprofitadu gente meda pro andare a ddu castiare. A s’acabada is chi dd’ant castiadu fiant prus de 10mila. Gente meda est abarrada a corcare in Carloforte etotu (no nche fiat mancu unu postu in is albergos) ma sa polèmica est incumentzada a su pròpiu: medas de is chi boliant torrare no ant agatadu logu is s’ùrtimu traghetu chi partiat a is 23:00 e duncas ant dèpidu abetare is primos traghetos pro Portovesme a die infata e candu sunt lòmpidos a ant agatadu sa multa in sa màchina. Su sìndigu Salvatore Puggioni at nadu chi in s’ìsula at funtzionadu totu bene gràtzias a su pianu aprontadu dae su Comunu, sa Delcomar at ispiegadu chi is traghetos ant respetadu totus is normas de siguresa e de càrrigu. Fortzis iat a èssere abastada unu pagu de “elasticiade” de is guàrdias comunales in su portu de Portovesme e mancari a pònnere unu traghetu in prus.
Salude a tottus
Roberto Pinna
