Sa cida sulcitana in curtzu. ae su 10 a su 16 de Cabudanni.
Lunis 10: s’amministratzione comunale de Carbònia at detzìdidu de provare a cuntrastare su giogu de azardu e duncas is ufìtzios comunales sunt istudiende un’ordinàntzia cun sa cale s’at a limitare is oràrios chi s’ant pòdere alluere is machineddas papadinari. Su Comunu cumbidat totus is titulares de esercìtzios pùbblicos e portadores de interessos generalizados chi pentzant de tènnere dannu dae custu atu amministrativu a presentare memòrias iscritas, documentos e osservatziones non prus a trigariu de su 25 de cabudanni.
Martis 11: fatu fatu sighit a pròere e in monte sighit a essire cordolinu a tueddas e gente meda essit a du circare e nde agatat a iscarteddos prenos. A dolu mannu una famìlia de Narcau est abarrada intossicada e est tocadu a nche-ddos lòmpere de presse a s’ispidale de Sirai pro sa lavanda gàstrica sende chi su chi aiant papadu non fiat bonu pro nudda. Est cosa connota dae totus ma no est male a regordare a chini ligit custa rubrica ca tocat a papare sceti su cordolinu chi si connoschet e si non semus siguros e mellus meda a nche ddu lassare aundi est.
Mèrcuris 12: Sa crèsia de Sant’Antiogu, chi est una de is prus antigas de totu sa Sardigna (sa base asserit a èssere su de 4 sèculos e est de impiantu bizantinu), at a èssere restaurada. In totu sunt prontos 400 mila èuros (250mila ddus at postos sa CEI, 150mila sa RAS e 50mila su Comunu). Su sìndigu Ignazio Locci at nadu chi is traballos ant a incumentzare a s’acabu de ocannu o su prus a tradu a s’incumentzu de s’annu chi benit. Is traballos prevedint chi si cambint is arregiolas de su pamentu cun àteras prus cunformas a s’istile de sa crèsia, chi si arrangint e fatzant prus siguros is muros de aintrus e sa sagrestia, chi si cuncordit una espositzione noa de is repertos e chi si fatzat de bellu e nou s’impiantu elètricu, chi est bèciu e pagu siguru.
Giòbia 13: Sa Cantina de Caleseda at otentu 2 prèmios de importu mannu in su “Decanter Asia Wine Awards” in Hong Kong chi est sa cumpetitzione pro binos de importu prus mannu in totu de s’Oriente Estremu. A custa gara ant pigadu parte 3000 binos chi arribaiant dae 37 istados de totu su mundu e ddos ant tastados una giuria fate de 55 esportos. Su carignanu “Piede Franco 2016” at otentu sa medàllia de prata, su vermentinu “Cala di seta 2017” at otentu sa de brunzu. Custa nova dd’ant arrìtzida cun prexu mannu in Caleseda e est unu signale bellu meda chi ammostrat sa cualidade de su binu locale.
Cenàbara 14: fintzas su sìndigu de Carbònia Paola Massidda no est cuntenta de sa decisione de su Guvernu de iscancellare su finantziamentu natzionale pro is periferìas. Su progetu presentadu dae s’amministratzione carboniesa, interessaiàt sa parte meridionale de sa citade e baliat prus de 8 miliones de èuros. In sa lìtera chi at mandadu a su Capu de su Guvernu e su ministru de su Welfare (chi est su capu de su partidu suu etotu) Massidda at iscritu ca, mancai si potzant cumprèndere is arresones pro una iscancelladura partziale, depint abarrare finantziados assumancus is comunos prus virtuosos (comente Carbònia) e, a dònnia manera, non benit bene chi si cambint is acòrdios giai iscritos sena de cunsultare is àteras partes interessadas, massimamente candu àteros òrganos istatales (sa Corte de is Contos) aiant donadu parridade favorèvole.
Sàbudu 15: dae su cumentzu de s’annu, cun su de custa cida seus lòmpidos a 60 isbarcos de algerinos (o assumancus aici decrarant a is Carabineris is personas firmadas) in su Sulcis. Cust’orta 15 personas sunt arribadas cun 2 barcas in Porto Pino, in comunu de Sant’Anna Arresi e ant agatadu is Carabineris de cumpangia de Carbònia prontos pro nde-ddos pinnigare pro nche ddos lòmpere, comente dònnia borta, a su centru de collidura de Muristenis pro is protzeduras de identificadura e de espulsione.
Domingu 16: su Carbònia e sa Monteponi, de chi aiant bintu sa partida de andada contras a su Carloforte e a su Biddamassàrgia (toteduas sunt acabadas 1-0), ant bintu puru sa torrada e duncas andant a su segundu turnu de sa Copa Itàlia de promotzione regionale. Domingu chi benit cumentzat su campionadu de promotzione. Su Carbònia e su Carloforte punnant a fàghere unu campionadu bonu comente s’ annu passadu (ant acabadu su de 5 e de 6 postos), s’obietivu de su Biddamassàrgia e de sa Monteponi chi sunt artziadas dae sa primu categoria est de si sarvare cun trancuillidade.
