NOTA! Questo sito utilizza i cookie e tecnologie simili.

Se non si modificano le impostazioni del browser, l'utente accetta.

Approvo
25
Mon, Jun
45 Nuovi articoli

Sa cida sulcitana in curtzu. Dae su 2 a su a s’8 de abrile

Novas in Sardu (LSC)
Aspetto
Condividi

Sa cida sulcitana in curtzu. Dae su 2 a su a s’8 de abrile

Lunis 2 de abrile: fiat su Lunis de Pasca e a pustis de unu mesi e prus at torradu a fàghere una bella die de sole e sa gente nd’at aprofitadu pro nche essire. Is ristorantes e is agriturismos fiant tosu prenos e est andada gente meda a bisitare is sitos turìsticos: 450 fiant is chi sunt intrados in is grutas de Is Tzuddas, in 600 e prus sunt calados a in Porto Flàvia (a pustis s’est scìpidu chi est isparèssidu s’incassu de sa die de Pasca Manna), 160 is chi ant passilladu in sa necròpoli Montessu. Sunt nùmeros unu pagheddu prus bàscios cunfronta a s’annu passadu ma nc’est de nàrrere chi ocannu Pasca Manna fiat bàscia e su tempus non fiat tropu siguru, e duncas sunt ammancados turistas, pruscatotu is continentales e fiant prus pagu puru is istràngios. A dònnia manera is previsiones po ocannu sunt bonas meda e medas istruturas tennet giai totu prenotadu pro su mese de austu chi benit.

Martis 3: unu mese e mesu agoa Ignazio Locci, su sìndigu de Sant’Antiogu, aiat decraradu gherra contras a sa gente chi iscavuat s’àliga a treullu. Gràtzias a is foto-tràpulas is barracellos ant postu 7 multas de 50 èuros a personas chi ant lassadu sacus prenus de àliga aundi non depiant. Duncas s’amministratzione Sant’Antiogu est faghende su chi aiat promìtidu. Dae su Comunu arregordant ca s’ecocentru est abertu dònnia die dae is 09 a is 12 e dae is 17 a is 20 francu su giòbia chi est serradu.

Mèrcuris 4: una nova bona pro is santuannesos: infatis s’amministratzione comunale at intregadu a una dita de Nuragus is traballos (90mila èuros su valore) pro torrare a asfartare sa zona industriale acanta de sa SS 126 e is istradas chi arribant a Bruncu Tèula e a Is Pusceddus.

Giòbia 5: in Nuxis ant fatu unu pagu de polèmica polìtica in consìliu comunale. Andrea Pubusa, professore universitàriu e ex consilieri regionali, chi at pèrdidu is eletziones s’annu passadu s’est dimìtidu dae consilieri mandende una lìtera cun sa cali at criticadu meda sa giunta in càrriga (in pràtica ddos at imputados de non fàghere nudda) e s’est chesciadu pro mancàntzia de cunfrontu. Dd’at arrispùndiu su vicesìndigu Michele Fanutza chi at signaladu chi benit male a si cunfrontare cun chini s’est presentadu in consìliu una borta sceti in 10 meses e at ispiegadu totus is atziones chi est incarrerende sa giunta pro agiudare is personas prus dèbiles.

Cenàbara 6: incurtzant is eletziones amministrativas de su 10 de làmpadas e in Igrèsias sighint a èssire candidados a sìndigu. Carlo Murru, diretore de is uspidales de Igrèsias, e chi at fatu giai su sìndigu in Cuartùciu, si proponit cun su sustegnu de 3 listas cìvicas. Parit chi puru Pinello Cossu, chi est istètiu assessore provinciale e presidente de su consìliu comunale (àrea sardista), siat aprontende una lista sua. Apetantis Valentina Pistis, chi est in campagna eletorale giai de unas cantu meses, at presentadu a Miriam Cabras chi in casu bìnciat is eletziones at a èssere assessora a su turismu e a su cummèrciu. Non si scit ancora si Emilio Gariazzo (PD) si torrat a candidare e non si scit nemancu su nùmene de su candidadu de su centru-dereta.

sàbudu 7: sighint a promòvere su territòriu nostru is rapresentantes de sa retza Visit Sulcis: cust’orta fiant in sa fiera de su turismu ide Minsk (Bielorrùsia) aundi at atobiadu 30 tour operators de s’Europa de s’est e medas clientes finales. De siguru is atziones de promotzione de VisitSulcis, massimamente in d-unu mercadu chi est crescende semper de prus comente cussu de s’Est Europa, sunt unu bellu signale de unidade pro totu sa zona nostra.

domingu 8: sighit su momentu difìcile de sa Sulcispes in sa “Poule B” de campionadu de sèrie D regionale de basket: infatis s’iscuadra de Paolo Massidda, chi intru de ingortos e malàdios dd’ammancat metade de is giogadores, ant pèrdiu malamente 80 a 126 in domu contras a Terranoa (Olbia) e imoe sunt ùrtimos cun 2 partidas bintas. Sa situatzione de is iscuadras sulcitanas candu ammancant 6 partidas a s’acabu de is campionados de fubalu. In su girone A de su campionadu de promotzione regionale Su Carbònia est trancuillu a su de 6 postos cun 37 puntos; su Carlorte est a 4 puntos dae is play-off cun 44 puntos. In su girone B de su campionadu de prima categoria ormai sa promotzione si dda giogant su Villamassargia (53 puntos) cun sa Monteponi (52), meda prus atesu is àteras; ormai est retrotzedidu su Domusnovas JSE, circat su play-out su Masainas, invècias su Narcau provat a si sarvare diretamente sena de passare dae is isparègios. In su campionadu de segunda categoria s’Isola di Sant’Antioco est segundu e tenet ancora ispera de artziare deretu in prima categoria ma depit sorigare a su Cabuterra chi est a innantis de 7 puntos.

Roberto Pinna