Sa cida sulcitana in curtzu. Dae su 26 de martzu a su 1 de abrile
Lunis 27: s’est iscìpiu ca ant torradu a rimandare s’atòbiu chi si depiat fàghere su 4 de abrile in su MISE intru de su Guvernu, sa RAS, sa Sider Alloys, su diretore de su Piano Sulcis e is sindacados. S’atòbiu s’at a fàghere su 9 de abrile. A cantu si narat parit chi no nci fessit logu in is aereos pro andare a Roma. Si custa cosa est berus... est una befa de diaderus.
Apetantis est arribadu un’àteru comunicadu de sa RSU de s’Eurallumina aundi is operàios narant chi sa segunda parte de ocannu at a essere decisiva pro chi torrit a partire sa fàbbrica in ue si traballaiat sa bauxite. Is operàios signalant ca is protzeduras de valutatzione ambientale durant dae 44 meses, unu record in Itàlia, e dimandant a totus is Entes interessados de si mòvere arregordente chi sunt baddende de 240 miliones de investimentos e 600 postos de traballu.
Martis 28: est emergèntzia in su repartu de emodinàmica de s’uspidali Sirai de Carbònia. Infatis de chi pro 16 meses fiant abarrados sceti 2 dotores chi assiguraiant is interventos pro 8 oras dae lunis a cenàbara (in su 2008 su servìtziu fiat H24), imoi de chi unu dotore at otentu un annu de aspetativa, est abarradu sceti su diretore Salvatore Ierna, chi a solu depet fàgher totu, finas is pràticas burocràticas. Custu fatu causat ritardos graves e est craru chi custa situatzione non podet sighire aici. Medas sunt dimandende un interventu lestru de s’assessoradu regionale pro chi si mandit totu su personale chi serbit pro assigurare unu servìtziu degnu a is malàdios sulcitanos.
Mèrcuris 29: su consìliu comunale de Sant’Antiogu at aprovadu cun votu concòrdiu is lìneas-ghia noas pro su pianu regoladore de su portu. In custa manera s’at a pòdere torrare a cualificare totu sa zona de su portu adatendi-dda a is bisùngios chi a bellu a bellu sunt essende a pillu. Est previstu s’isgavu de su fundali, banchinas pro 500 barcas (diportu piticu e mèdiu) e infrastruturas pro is piscadores, sa cantierìstica e pro su cummèrtziu de su sale chi est s’ùnica atividade de tipu industriale chi, pro imoi e tanti, si podet fàgher in su portu. De custu votu cuncòrdiu nd’est cuntentu su sìndigu Ignazio Locci chi at nadu ca imoi tocat a sighire a su cunfrontu cun sa Regione pro chi si arribit a otènnere unu pianu chi tasformit su portu in polifuntzionale.
Giòbia 30: Manuele Fanutza, chef nuxàiu, no nci dd’at a fata a bìnchere “Cuochi d’Italia” su programma de Alessandro Borghese trasmìtidu dae TV8 in ue si isfidant cun is arritzetas traditzionales is mellus coxineris de totu s’Itàlia. Mancai siat arribadu segundu Fanutza est prexadu meda pro custa esperièntzias proite chi at connotu e s’est cunfrontadu cun collegas de gabbale e at at tentu s’oportunidade de fàgher connòschere sa bidda a su pùbblicu natzionale.
cenàbara 31: sa Polar, sa sotziedade che est mere de s’istabilimentu chi traballat sa bentonite in Piscinas at postu in cassaintegratzione 15 operàios. Luca Pizzuto, consilieri regionale de su grupu Articolo 1 – SDP at nau ca custa decisione de sa sienda est unu fatu grave meda chi impeuat una situatzione giai difìcile. Pizzuto in prus at anuntziadu chi su grupu suu at a intervènnere in sa cummissione indùstria pro averguare si sa sienda est arrispetende cantu est previstu in sa cuncessione regionale, est a nàrrere si su materiale nde-ddu bogant e ddu traballant in Piscinas o si ddu bendint inderetura grezu.
sàbudu 31 e domingu 1 de abrile: Sa Cida Santa nc’est passada cun trancuillidade. In dònnia bidda o tzitade ant fatu siat su Via Crucis cenàbara, siat s’incontru de Gesus e su Madonna domingu a mengianu. A custas prutzessiones, in dònnia logu, mancai su tempus non fessit bellu pro nudda (at fatu frius, bentu e puru unu pagheddu de àcua), at partecipadu gente meda. Custu est unu sinniale bellu meda, chi testimongiat sa fidi e s’atacamentu a is traditziones de is sulcitanos.
Non sunt mancandos is turistas, pruscatotu in Igrèsias e in Sant’Antiogu. Ocannu, cunfronta a s’annu passadu, fiant prus pagu sende chi est caladu su nùmeru de is continentales ma ant aguantadu is “sòlitos” tedescos e s’est bistu puru calincunu americanu in prus. Cunsiderende chi ocannu Pasca Manna fiat “bàscia” e chi su tempus non fiat bonu, si podet nàrrere chi s’istasone turìstica est incumentzada bene e imoi si abetat su ponte longu de s’acabu de custu mese. In Sant’Antiogu dae su primu de abrile is turistas chi tenent dae 12 a 70 annos e chi corcant in is istruturas de Sa Idda depent pagare sa tassa de “soggiorno” (50 centesimos prò dònnia die) chi s’opositzione aiat cuntestadu meda in consìliu comunale.
A cura di Roberto Pinna
