Sa cida sulcitana. Dae su 19 a su 25 de Martzu
Lunis 19: s’est scìpidu calincuna cosa in contu de su programma de Sulcis Iglesiente Espone, sa fiera manna chi si faghet in Carbònia e chi ocannu arribat a sa de 12 editziones. Sa fiera s’at a fàghere su 12 e su 13 de maju chi benit: sàbudu 12 ddoe at a èssere su cuncertu de is Tazenda, domingu 13 s’esibitzione de unus 40 grupos folk presentados dae Giuliano Marongiu e, craramente, s’ant a abèrrere is sitos culturales de su territòriu.
Martis 20: su chef nuxàiu Emanuele Fanutza, mere de su ristorante Letizia e chi giai aiat pigadu parte a s’Expo de Milanu, est arribadu in sa finale de “Cuochi d’Italia”, su programma de Alessandro Borghese chi andat in onda in TV8 aundi is mellus coxineris si sfidant aprontende is pratos traditzionales de sa regione insoru. Fanutza at bintu a su collega de sa Lombardia in semifinale e custa cida chi benit tentat de bìnchere sa finale.
Mèrcuris 21: est giai de una cida chi is tènnicos de sa Sider Alloys, acumpangiados dae 9 ex dipendentes de s’ALCOA, chi sunt intrados in s’istabilimentu de Portovesme pro averguare s’istadu de is impiantos e valutare totu su chi serbit pro ddu fagher torrare a partire. Totus isperant est ca sa situatzione polìtica in Roma, a pustis de is eletziones de su 4 de martzu, non pongat in perìgulu totu su traballu fatu pro torrare a fàgher s’istabilimentu (si chistionat assumancus de unus 400 postos de traballu).
Giòbia 22: depiat incumentzare su beranu invècias at fatu unas cantu dies de ierru forte. Prima at niadu in is montes de Nuxis e a pustis at fatu travessuras de bent’e sole chi nd’at fatu lòmpere undas mannas meda (6 metros e prus) e est bènnidu a marolla a firmare is traghetos chi partiant dae Portovesme conca a Carloforte. Su mare nd’at pigadu is plàgias in sa costa de Sant’Anna Arresi chi castiant a iscurigadroxu e at totu acarraxadu de pala marina de Porto Pino. Iscònciu mannu in Bugerru aundi fiant faghende sa sagra de is arritzones de mare chi depiat acabare domingu 25. Su bentu nd’at pesadu a bolare totus is gazebo e nd'at bogadu palos de lughes chi fiant in su portu.
Cenàbara 23: in su comunu de sa Baronia-Villaperùciu s’opositzione at decraradu chi no at a partetzipare prus is setziadas de Consìliu Comunale proite chi ant dimandadu a su sìndigu 4 bortas de ddu cunvocare pro arresonare de chistiones chi, a parridare insoru, fiant de importu mannu e su sìndigu ddis at torradu ca no. Su sìndigu at arrìspùndiu ca ddos aiat mandados una lìtera arregordende ca est issu chi detzit sende presidente de su Consìliu; ca su consìliu non si cunvocat a comenti acucat a is consilieris; candu faghent sa dimanda de nche pònnere puru sa documentatzione chi serbit pro aprontare assumancus una proposta de delìbera; o sinuncas de fàghere interpellàntzias e interrogatziones chi si podent arresonare a s’acabu de is setziadas normales. Fatu istat ca sa magiorantza at aprovadu su bilànciu a sola, chi est s’atu polìticu prus importante de unu comunu e custa est cosa bastante grave proite chi s’opositzione perdet dònnia diritu de criticare sa giunta. Sa “democratzia rapresentativa” tenet logos pretzisos e in custu casu de siguru est su Consìliu Comunale non sa pratza de su social network e nemancu su bancone de unu tzilleri.
Sàbudu 25: In Carbònia s’est dimìtida sa de 5 assessoras in mancu 2 annos (sena de cuntare is dimissiones de is presidentes de cummissione o chini s’est decraradu lìberu de su vìnculu de magiorantza). Cust’orta at lassadu s’assessora a su personale Barbara Argiolas, sa pròpiu assessora chi cida passada aiat pistighingiadu cun s’ex sìndigu Giuseppe Casti pròpiu in contu de sa gestione de su personale. Pro imoe non si ischint is motivos de is dimissiones (no ndi sciat nudda mancu sa presidente de su Consìliu Comunale), ma dae s’opositzione craramente atracant e torrant a dimandare is dimissiones de su sìndigu.
Ddoi fiat gente meda in sa biblioteca de Santadi a sa presentada de su lìburu de Giuseppe Maggiolo “Antica Sardegna – Una storia diversa”. S’autore at regortu, sintetizadu e cummentadu totus is fontes chi si agatant in Internet e is libros de is istudiosos prus importantes chi tratant de sa tziviltade nuraghesa, circhende de cambiare sa manera de comente si castiat a s’istòria nostra. De siguru est unu traballu interessante mancai siat unu pagheddu atrividu ma comente àteros, custu autore puru ponet sa chistione de comunicare mellus sa tziviltade nuraghesa.
Domingu 26: sa retza Visit Sulcis sighit a promòvere su territòriu nostru. Cust’orta fiant in Nàpuli , a sa Borsa de su turismu mediterràneu aundi ant atobiadu 20 compradores, giai totus CRAL, tzìrculos ricreativoos pro is traballadores, interessados a organizare fèrias pro grupos bastante mannos de personas in sa zona nostra.
Chini iscriet custa rubrica faghet a totus is ligidores de www.tentazionidellapenna.com e a is famìlias insoro is mellus augùrios de bona Pasca Manna.
Roberto Pinna
