Sa cida sulcitana in curtzu. Dae su 19 a su 25 de freàrgiu
Lunis 19: su Comitadu “Porto Solky”, a pustis de is atòbios fatos cida passada cun su coordinadore de su Piano Sulcis Tore Cherchi e is dirigentes de s’ANAS, at dimandadu un’atòbiu pùbblicu de fàghere s’àula de su Consìliu Comunale pro chi totus is polìticos, de calisisiat livellu, narint sa positzione insoro in contu de su pianu de viabilidade in antis de is eletziones de su 4 de martzu chi benit. Su Comitadu “Porto Solky” est dimandende de torrare a modulare su dinari previstu in su Pianu Sulcis ponendi-ddu pro fàghere manutentzione a su ponte (sende ca est fàula chi est perigulosu e duncas unu ponte nou non serbit) e pro ammelliorare sa siguresa de sa SS126 e de su portu turìsticu.
Martis 20: sunt essende boghes in contu de possibilidade chi is operàios chi ant a intrare a traballare s’ex istabilimentu de s’ALCOA pighint una parte de is cuotas societàrias de sa Sider Alloys. In casu si fatzat a una cosa deaci at a èssere una novidade bona in su panorama natzionale (in Germània e in su Nord Europa est giai de paritzos annos chi is indùstrias prus mannas funtzionant in custa manera) proite ca si is operàios podent partetzipare a is ùtiles de sa sienda (duncas podent guadàngiare prus dinari) ant a tènnere prus istìmulos a traballare de prus e mellus. Is sindacados sunt abetende de connòschere calincuna cosa in prus dae is dirigentes de sa Sider Alloys.
Mèrcuris 21: ddoe fiat una pariga de centus personas a sa fiacolada chi at organizadu su predi de Santu Giuanni Suèrgiu don Tonino Bellu. S’iscopu de sa manifestatzione fiat cussu de denuntziare sa situatzione de totus is servìtzio sanitàrios de sa ASL 7 chi a pustis de sa riforma regionale sunt impeuende semper de prus. Don Bellu at nadu ca sa suferèntzia non tenent colore polìticu e at dimandadu sceti chi totu su setore de sa sanidade pùblica si acostit a is bisòngios de is personas malàdias.
Giòbia 22: dae Carbònia sunt partidos una corantina de mezos de su “Movimento Artigiani e Commercianti Liberi” de su Sulcis e ant impunnadu a su palàssiu de sa Regione in Casteddu pro protestare contras a su ritardu de su bandu pro is incentivos in su setore de s’edilìtzia previstu in su Piano Sulcis. A is artigianus ddis aiant promìtidu chi su bandu partiat a intrus de su 31 de gennàrgiu ma finas a imoi est ancora totu firmu. Dae is “piani alti” de arburada Trieste narant ca sunt acabende de incarrerare totus is protzeduras burocràticas e chi sunt prontos a atòbiare is rapresentantes de is artigianos cida chi benit.
Cenàbara 23: s’Amministratzione Comunale de Sant’Antiogu provat a cumbàtere is muntronàrgios de àlliga chi sa gente “pagu educada” lassat ororu de mori in su sartu. Su consilieri cun sa dèlega a s’ambiente Pasquale Renna at ispiegadu ca de una parte s’at a circare de sensibilizare is residentes ponende in 18 puntos cartellos de educatzione ambientale e chi a lestru s’at a donare a totus is famìlias su libureddu cun totus is informatziones pro seberare s’àliga in manera giusta. A s’àtera parte cun s’agiudu de sa Forestale, de is Barracellos, de is Guàrdias Comunales e de sa Protetzione Civile e fintzas de is Carabineris s’ant a afortiare is controllos ponende foto-tràpulas mòbiles pro cassare is chi iscàrrigant àlliga a treullu in is coretas.
Sàbudu24: Sa campagna eletorale pro is eletziones polìticas de su 4 de martzu est acabende e finas a imoi, assumancus in sa zona nostra, s’est bistu pagu movimentu. De is leaders natzionales in custas dies, est calau sceti Alessandro Di Battista de su M5S (chi pro custu fùrriu non s’est mancu candidadu) chi at fatu unu comìtziu in pratza Sella in Igrèsias e a pustis est andadu a Uliana. Sa mancantza in custa campagna eletorale de is leaders natzionales de is coalitziones de tzentru-manca e tzentru-dereta in Sardigna est unu fatu bastante istranu chi lassat pentzare chi issos, fortzis, cunsiderint giai pèrdidos totus is collègios sardos a vantàgiu de su M5S.
Domingu 25: a cantu parit s’est firmada sa mortalla de lìngua asulla chi custu atòngiu passadu at mortu prus de 4100 berbeghes in 200 e passa siendas de su Sulcis. Ormai est giai de 2 meses chinon si sinnialnt prus pegos mortos. Su frius de is urtimos meses at bocchidu sa muscerra chi trasportàt sa maladia. In su fratempus est sighende sa campagna de vacinatzione e is allevadores dimandant indennizos proite chi su male at fertu pròpiu in su tempus de is angiarinos e duncas nc’ant pèrdiu sa produtzione de late e puru is angioneddos.
Roberto Pinna
