Sa cida sulcitana in curtzu. Dae su 26 de freàrgiu a su 4 de martzu
Lunis 26: una nova de utilidade pro totus, massimamente pro is famìlias chi tenent prus abisùngiu. S’EGAS at prorogadu s’iscadèntzia a su 31 de custu mese pro presentare is dimandas pro otènnere unu contributu pro su pagamentu de is bulletas de Abbanoa relativas a s’annu 2016 (est su chi si narat “BONUS IDRICO”). Duncas cumbenit chi is chi sunt interessados andint a lestru si informare in palàssios comunales pro ischire cale documentos serbint e a comente depent fàghere sa dimanda.
Martis 27:in Masainas ant acabadu is traballos pro cumpletare s’istàdiu comunale. Ant torradu a fàghere de nou su terrenu de giogu (dd’ant fatu in erba, in antis fiat in terra) e ant amodernadu is lughes e acarraxadu sa tribuna. In totu s’interventu est costadu 82millas èuros.
Mèrcuris 28: Papa Frantziscu at mandadu una lìtera a is piciocheddos de sa 5°A de s’istitutu Allori. Custos piciocheddos aiant fatu unu flashmob in su mese de ladàmine de s’annu passadu e aiant mandadu a su Papa is elaborados insoru in contu de su tema de s’acullièntzia. Frantziscu at abantadu meda s’atzione chi aiant cuncordadu is mastros cun is babbos e is mammas e isperat chi su messàgiu chi ant ispainadu is pipios de Igrèsias serbat a donara unu contributu a s’atentzione chi amminescit a totus is chi sunt circhende una vida prus dignitosa.
Giòbia 1: Janus River, unu polacu de 81 annos chi est faghende su giru de su mundu a bicicreta cun sceti 3 èuros in busciaca, est arribadu in su Sulcis. River in dònnia tapa chi faghet contat a totus sa vida sua e proite at detzìdidu de partire pro custa aventura. Finas a imoi, est 16 annos girende, at bisitadu 150 paisos e fatu 250mila kilòmetros. Su viàgiu suo iat a dèpere acabare in su 2028 in Pechinu pròpiu sa die chi faghet is annos. Chi andit in bon’ora e Deus dd’acumpangit semper!
Cenàbara 2: in su MISE de Roma ant firmadu totus is documentos de cumpetèntzia de s’Istadu pro chi torrit a partire puru s’istabilimentu de s’Eurallumina (chi est propriedade sa RUSAL). Su MISE at agiudare su pianu pro amodernare is impiantos cun d-unu contributu totali de 83 miliones de èuros (16 a “fondo perduto”) de fronte a unu investimentu chi balit in totu 160 miliones. Mancai siat lòmpida custa bona nova is traballadores chi dae annos sunt gherrende sighint in s’istadu de agitatzione. Defatis sighint a mancare totus is autorizatziones de sa Regione chi s’est pigada àteras 30 dies pro donare is arrispustas a s’Eurallumina cosa chi at fatu arrinnegare, e meda puru, is operàios.
sàbudu 3: ddoi fiat gente meda a sa presentade fata in s’àula de su consìliu comunale de Sant’Antiogu, de su romanzu chi at iscritu Filippo Lorrai. Lorrai cun “Il Grande Erik”, chi at bintu su prèmiu literàriu natzionale RAI ERI “La Giara”, nosi contat sa vida de tres generatziones de una famìlia de artistas de circu chi at a èssere binta dae sa violèntzia de su mundu esternu. E semper in Sant’Antiogu sa VBA Olimpia at bintu su derby cun su Sarroch (chi fiat prima in classìfica) in su girone F de campionadu de sèrie b natzionale de Volley e imoi ca amancant sceti 6 partidas a acabare su campionadu est 8 puntos a innantis de sa de tres ùrtima iscuadra cun àteras 2 iscuadra a coa e incumentzat a bìdere sa sarvesa.
Domingu 4: s’est avotadu pro is eletziones polìticas. In is biddas e is tzitades de zona nostra prus o mancu at votadu su 65%, unu datu chi est prus bàsciu de a sa mèdia regionale (68%). Si andat dae su de 59% de Piscinas a su 71% de Portescusi. Pino Cabras at bintu su collègiu uninòminale de Carbònia cun su 46% de is votos. Invècis Gianni Marilotti chi est sempri de su M5S cun su 42% at bintu su collègiu uninominale de su Senadu chi acarraxat totu sa Sardigna de Bàsciu. Duncas su primu partidu in su Sulcis-Iglesiente est sena de duda peruna su M5S, sighit cun pagu prus de su 30% sa coalitzione de centru-dereta cun sa Lega chi a logus at pigadu prus votos de Forza Italia, pagu e nudda at pigadu s’UDC chi no arribat a su 2% passadu puru de FdI (3.7%); andat male meda su PD (chi si firmat a su 23% e praticamente no esistint is àteros partidos de sa coalitzione) e LEU (pigat su 3.5% chi si sarvat sceti in Carbònia pighende s’7%); pagu tretu ant fatu is indipendentistas de sa Coalizione AutodetermiNatzione chi non sunt arribados mancu a su 1.5% in su collègiu. Totus is àteros sunt asuta de s'1%.
Roberto Pinna
