Sa cida sulcitana in curtzu. Dae su 13 a su 19 de donniassantu
Lunis 13: in Igrèsias is giòvanos de s’assòtziu Trevessu, a pustis de unu mese de “sciòpiru” ant torradu a abèrrere sa bibliocabina. Dd’iant serrada pro protestare contras a totus cussas personas chi fiant oberendi-dda male: nche fiant is chi bèndiant is libros o dda oberaiant pro magasinu o pro nche apicare manifestos, sena de iscarèssere is chi ant provadu a atacare fogu in su mese de freàrgiu. Imoi s’ispera de is piciocos de Travessu est chi totus is igresientes amantiosos de is libros e de sa cultura donint cura a sa bibliocabina.
Martis 14: su dirigente de su Comunu de Carbònia at torradu sceda is preguntas chi dd’ant fatu sa magiorantza e s’opositzione in contu de is rimborsos de is ispesas de viàgiu chi arriciant unas cantu assessores chi non sunt residentes in Carbònia. Su dirigente at donadu s’arrexone a cussos de s’opositzione, proite chi a cumentzare dae ocannu, sunt cambiadas is interpretatziones de medas Cortes de is Contos de s’art. 84 de su Dlgs 267/2000 chi detat is normas pro otènnere is rimborsos. Duncas imoi su rimborsu si podet circare sceti pro apuntamentos istitutzionales (riuniones ufitziales de sa Giunta o de su Consìliu o de cummissione) e non prus pro calisissiat viàgiu. Est craru chi sunt arribadas àteras crìticas dae s’opositzione; su M5S, chi guvernat sa tzitade, at arrispùndidu narende chi s’est fatu burdellu meda pro nudda e chi s’ant a sighire is règulas noas.
Mèrcuris 15: riunione record de su consìliu comunale de Sa Baronia-Villaperùciu. Is riuniones de consìliu in su comunu de su Sulcis de Bàsciu costumant a durare pagu, a bortas mancu unu 10 minutos, custa at duradu prus de 3 oras. Pro dònnia agrumentu (fiant 6 is puntos de arresonare) sa cabugrupu de minorantza M.G. Peis at pistighingiadu cun su sìndigu Antonello Pirosu. Candu s’est chistionadu de s’ùrtimu puntu – is rimborsos de is missiones de su sìndigu dae su 2006 a su 2015 – non sunt ammancadas acusas graves a livellu personale chi a parridade de chini iscriet custa rubrica non sunt dignas de is chi depint rapresentare is interessos de totu una communidade.
Giòbia 16: comente dònnia annu est lòmpia s’ora de is contos pro su Piano Sulcis. In totu su dinari disponìbile est de 708 miliones de èuros, ispartzidos in 4 setores principales: bonìficas, siendas, infrastruturas, iscola e circa scientìfica. Cunfronta a s’annu passadu sa situatzione est andende unu pagu prus bene: pro imoi ant impegnadu risorsas pro 600 miliones cun obbligatziones giurìdicas vinculantes. Incumentzant a a fàghere tretu is infrastruturas (si bidet calincunu traballu in is istradas e in is portos), sunt a regime is programmas pro sa circa scentìfica e is istruturas iscolàsticas. Est andende bene puru sa zona franca urbana (sunt 4.300 is siendas piticas chi gosant is benefìtzios) e ant abertu is bandos pro agiudare is investimentos de is siendas prus mannas (finas a 20 miliones de èuros). Semper male sa chistione de is bonìficas de is àreas mineràrias pro mori de is ritardos de s’Igea in sa pianificatzione, invècias sunt andende a innantis cussas in su polo industriale de Portovesme e in s’ex Sardamag in Sant’Antiogu.
Cenàbara 17 in Carbònia est acabadu su primu Festival de sa Cultura e de sa Scèntzia organizadu dae “S’Ischiglia-Università Popolare del Sulcis” cun su patrocìniu e su contributu econòmicu de su Comunu di Carbònia. Pro totu sa cida in sa Grande Miniera nche sunt istados mostras, atòbios e relatas de espertos in contu de matemàtica, ambiente, neuroscèntzias, architetura, arte e mùsica cun medas atividades chi ant bistu sa partecipatzione de famìlias, chircadores e giornalistas. S’idea de is organizadores fiat cussa de fabricare una cuscèntzia scentìfica colletiva e in prus si isperat est chi sa cultura si trasformit in d-unu volanu de isvilupu pro totu su territòriu.
Sàbudu 18: su comitadu Porto Solky cun d-unu comunicadu at torradu a cuntestare su ponte nou cun sa circunvallatzione previstos in su Piano Sulcis. A parre de is rapresentantes de su Comitadu iat a èssere mellus a pònnere is 57 miliones de èuros previstos pro pònnere in siguresa sa SS 126 in su tretu chi andat dae Carbònia a Sant’Antiogu e pro sa ricualificatzione de su Lungomare. Àteros esponentes polìticos locales ant nadu chi est prus giustu a ascurtare puru is tzitadinos
Domingu 19: In Frùmini Majori s’est fatu su de 8 cursos de formatzione pro is acumpangiadores de gruta organizadu dae s’AGTI (Assòtziu de is Grutas Turìsticas Italianas). Nche fiant is guidas de 10 grutas lòmpidas dae Continente e de is 2 grutas sulcitanas (Su Mannau e Is Tzuddas in Santadi). Est istètia un’ocasione bona pro acuisire cumpetèntzias noas ascurtende is cuntzillos de is espertos e finas pro si cunfrontare. Totu sa cambarada de chi at sighidu unas cantu oras de letzione est andada a bisitare is grutas de Su Mannau, de Santa Bràbara e de Is Tzuddas chi ant lassadu ispantados pro mori de sa bellesa istravanada insoru is ospites continentales.
Roberto Pinna
