Sa cida in curtzu. Dae su 2 a su 8 de abrile
Domingu 2: Sighit s’atzione de promotzione de su territòriu nostru incarrerada dae Visit Sulcis. Custa borta sa retza chi regollit siendas privas e amministratziones comunales de su Sulcis fiat in Milanu pro sa BIT, aundi at atobiadu medas operadores italianos e istràngios. Is rapresentantes sulcitanos si nde sunt acatados de una farta manna: in sa mapa de is plàgias de Sardigna (prodùsida dae s’Assessoradu a su Turismu) non sunt segnadas cussas de Porto Pino e de Mari de Bàsciu (in comunu de Masainas). Cosa ancora prus grave est chi s’annu passadu puru ammancaiant custas plàgias in sa mapa e duncas mancai sa farta fessit sinnialada, s’assessoradu (o chini at imprentadu su paperi) no at currègidu s’errore. Unu dannu mannu pro totu sa zona nostra, massimanete si pigamus a cunsideru su fatu chi s’istade passada sa plàgia prus circada in internet fiat pròpiu sa de Porto Pino. De siguru est netzessària un’atzione de coordinamentu intru de is entes locales e s’Assessoradu a su Turismu.
Lunis 3: s’AIAS nc’at bogadu puru a Armando Ciosci, autista e sindacalista USB, chi est unu de is dipendentes chi est protestende contras a sa sienda chi non pagat is istipèndios dae 9 meses. A cumentzare dae martis chi benit de custa chistione si nd’at a resonare puru su Consìliu Regionale.
Martis 4: s’assessora a sa cultura de Carbònia, Emanuela Rubiu, de chi nc’at passadu totu su mangianu de lunis arresonende cun su sìndigu, oe at annuntziadu chi at abarrare in sa giunta de Paola Massidda. Rùbiu si fiat dimìtida mèrcuris passadu cun tanti de lìtera protocollada, ma non sunt essidos a pillu is motivos de is dimissiones e nemancu proite si-nde siat istorrada dae cussa detzisione.
In d-unu incidente acuntèssidu in sa SS 130 s’est morta una fèmmina, una cummissa de 35 annos de Igrèsias. Sa giòvuna at pèrdidu su controllu de vetura chi s’est acapotada e nc’est essida a foras de sa vetura etotu. Un àteru automobilista chi fiat passende at bistu sa scena e at tzerriadu is Vigiles de su Fogu e su 118 chi sunt lòmpidos a lestru ma no ant pòtziu fàghere nudda pro agiudare a sa fèmmina.
Mèrcuris 5: in Sant’Antiogu, comente est traditzione, gente meda nd’at segadu is arrampos de is matas de prama (massimamente dae is chi s’agatant in su Lungomare) pro ddos traballare e torrare a bèndere pro su Domingu de Prama. Su Comunu at donadu s’avisu chi is pramas sunt prenas de sa mexina chi ddas ant ghetadas pro provare a nde ispèrdere su punteruolo rosso. Duncas podent èssere perìgulosas pro sa salude e in antis de ddas manigiare est mellus a ddas sciacuare cun àcua meda.
Giòbia 6: Gianluigi Rubiu, consilieri regionale de s’UDC, at presentadu un’interrogatzione a s’assessore regionale Arru in contu de sa situatzione de sa sanidade pùbbica in s’ex ASL 7. Pro una risonantza magnètica e pro una bìsita a su coru nche bollent 6 meses; pro su chi pertocat is bìsitas remautològicas, mammografias e ecografias is CUP de su territòriu arrispundint ca sunt foras de s’agenda (in pràtica non faghet a ddas prenotare). Duncas a sa gente ddi benit a marolla a andare in is istruturas privadas (cun costos artos meda) opuru a circare in is istruturas de Casteddu. Ancora peus sa situatzione de su repartu de cardiologia de su Sirai chi est asuta de orgànicu. Duncas, a parridade de Rubiu, su Sulcis Iglesiente est bivende in d-una situatzione iscàndulosa e cun sa lege de riordinu de sanidade in totu sa Sardigna, intamu de ammelilorare, sa situatzione est impeuende semper de prus.
Cenàbara 7: in sa biblioteca regionale de Casteddu ant presentadu sa de 32 editziones de “Ai confini tra Sardegna e Jazz” chi s’at a fàghere in sa pratza de su Nuraghe de S.Anna Arresi dae su 1 a su 10 de cabudanni, invècias su 31 de austu in sa pratza de sa crèsia de Santa Maria de Pramas s’at a fàghere s’anteprima. Sèmper in Casteddu, in sa sede de sa Fondazione Sardegna, ant presentadu sa Fundatzione e sa guida de su Camminu de Santa Bràbara.
Invècias in sa Grande Miniera de Serbariu s’est fatu unu cunvènniu organizadu dae sa RSU de s’Eurallumina a pitzus de s’indùstria, de su paesàgiu e de s’ambiente. Sunt intervènnidos Cristianu Erriu, Tore Cherchi, Pasquale Mistretta (s’ex retore de s’Universidade de Casteddu) e ingegneris e espertos de indùstria e de ambiente. Fiant invitados a partetzipare e a ascurtare is interventos sceti is chi no aiant pigadu positzione contrària a su progetu de sa ripresa produtiva de sa fàbbrica de Portovesme.
Sàbudu 8: in Sant’Antiogu in sa sala de is cunferèntzias de Palàssiu de su Capìtulu, s’Amministratzione chi est pro nche essire at presentadu cantu at fatu in custos 5 annos de mandadu cun su vicesìndigu Marco Massa chi si candidat a sìndigu; invècias Alberto Fois (candidadu de Genti Noa) at fatu comìtziu in Pratza Itàlia e at presentadu su programma e totu s’iscuadra sua.
