Sa cida in curtzu, Dae su 26 de Martzu a su primu de Abrile. Custu nùmeru de “Sa Cida Sulcitana in Curtzu” est iscrita in collaboratzione cun is chi sighint su cursu de iscritura de sa lìngua sarda in Narcau.
Domingu 26: Stefano Como, 35 annos fatos, de Sant’Antiogu e chena de traballu, a pustis de èssere artziadu in su palcu de de Italia’s Got Talent cun umiltade meda, at ispantadu is giugis e sa gente chi fiat ascurtende: at cantadu in manera perfeta “The Show Must Go On” de is Queen e Claudio Bisio dd’at donadu su “golden buzzer”(duncas at a andare deretu a sa finale). Cunfirmant sa bravura de su cantante santantioghesu is 390.000 e prus bortas chi ant torradu a castiare s’esibitzione sua in youtube in prus pagu de 24 oras (imoi sunt acanta de lòmpere a unu milione). Est chitzi pro nàrrere si Stefano Como at a èssere un’istedda de sa mùsica italiana ma est siguru chi de issu, in Sant’Antiogu e in su Sulcis, nd’eus a torrare a chistionare. (de R.Podda, M. Lai)
Lunis 27: 6 dipendentes de s’AIAS de Cortoghiana, Domus Noas e Assèmini, in rapresentàntzia de totus is collegas insoru, ant incumentzadu s’isciòperu de su fàmine pro rivendicare su pagamentu de 9 istipèndios arretrados. Sa protesta sighit giai dae unu mese e mancari si-nde siat interessadu finas s’Assessore a sa sanidade Arru sa situatzione non si isblocat. Dae una parte s’AIAS cuntestat su pagamentu mancadu de su servìtziu a medas amministratziones sulcitanas, a s’àtera parte is amministratziones locales narant ca sunt in règula cun is pagamentos. In s’interis is traballodores de s’AIAS chi sunt cumbatende ant otentu sa solidariedade de sa Diòcesi de Igrèsias e de is consìlios comunales de meda amministratziones sulcitanas (Cun F. Pranu).
Martis 28: A pustis de s’acabu de is urtimos cuntentziosos in su Consìliu de Istadu, protzedit a lestru s’iter pro realizare su centru intermodale de Igrèsias. Defetis a sa presèntzia de su Responsàbile ùnicu de su protzedimentu, su dot. Felice Carta, e de su diretore de is traballos, s’ing. Cristiano Murru, ant intregadu is traballos a s’impresa “Moderna Costrutzioni 85” de Serrenti. S’impresa at bintu s’apaltu pro unu totale de 3 miliones e 287mila èuros. Is traballus depent acabare in 240 dies. (cun L. Steri)
Mèrcuris 29: Su Consìliu Comunale de Narcau, fintzas cun su votu a favorèvolede s’opositzione, at aprovadu su bilànciu de previsione 2017. De siguru custu fatu est cosa manna: non fiat mai sutzèdidu chi sa minorantza votessit a favore de s’atu principale chi règulat sa “vida” de is amministratziones locales (in totu su “documentu” balit 8 miliones e 200mila èuros). Custu est unu sinniale bellu meda chi de siguru refletet de sa ganas de is narcaresos de collaborare totus in pari pro su bene de bidda. (cun G. Ricciardi)
Giòbia 30: In s’atòbiu chi s’est fatu in su MISE su ministru Carlo Calenda at cunfirmadu a is organizatziones sindacales natzionales e territoriales de is metalmecànicos de CGIL, CISL e UIL s’ipotesi de unu acòrdiu cun sa sienda isvìtzera Sider Alloys pro comporare s’istabilimentu Alcoa de Portovesme. Su ministru at nadu ca innantis però si depet perfetzionare sa bèndida de ALCOA a INVITALIA de su smelter (est a nàrrere sa funderia). In su fratempus Invitalia at valutadu ammìssibile su pianu propostu dae is isvìtzeros. In su pianu sa sienda at donadu disponibilidade a pònnere dinari suo pro investimentos e at previstu su recùperu de unos 400 postos de traballu. (RP)
Cenàbara 31: Ancora un’isbarcu de migrantes in sa costa sulcitana. Faci a is 7:30 de mangianu un’òmine chi fiat passende in sa SP 86 in comunu de S.A. Arresi, at bistu unu grupu de nordafricanos e at tzerriadu a su 112. Is Carabineris unt allòmpidos e ant blocadu 14 personas. Custas personas, totus giòvanos e in bonas cunditziones, sunt abarradas pagu ora in Sardigna: a pustis de is operatziones de identificadura nche-ddas ant mandadas in Sicìlia pro su rimpàtriu. (cun G. Serventi).
In Carbònia s’est fata una riunione de su Comitadu Provinciale pro s’Òrdine e sa Siguresa Pùbblica. Su Prefetu de Casteddu Giuliana Perrotta, cun si cumandantes de is Fortzas de s’Òrdine e is sìndigos de su Sulcis ant arrexonadu de s’aumentu de su flussu de migrantes chi ant a lòmpere in su territòriu e de is atziones de fàere pro garantire sa siguresa de is festas de Pasca Manna e de is manifestatziones previstas s’istade chi benit. A pustis unus cantu sìndigos in manera polèmica si nde sunt bogados sa fàscia e dd’ant lassada apoxada in sa mesa e ant ispiegadu a sa rapresentante de su Guvernu sa situatzione difìcile chi est bivende sa zona nostra. Su Prefetu at faeddadu puru a is dipendentes de s’AIAS chi sunt protestende contras a sa sienda chi no ddis pagat s’istipèndiu dae 9 meses e at promìtidu s’impegnu suo pro chi si isblochit sa situatzione. (RP)
Sàbudu 1 de abrile: note de caos e timoria in s’Antiga Baronia de Villaperùciu: in grofu de note, una o prus personas chi teniant pagu cosa de fàghere ant atacadu fogu a s’àcua de sa Funtana de su Baroni, una funtana pùbblica chi fortzis ant isgavadu a su printzìpiu de su 1800 pro òrdine de s’ùrtimu barone de Villaperùciu, Don Bissente Otger. Est serbidu s’interventu de is Pompieris, de is Guàrdias Forestales, de sa Protetzione Civile e de medas voluntàrios de su logu proite chi s’àcua fiat tenende a pampa e pro bìnchere su fogu est bennidu a marolla prènnere sa funtana de arena. Sa cumpangia de is Barracellos est indaghende pro agatare is chi ant iscritu custa brulla. (Cun G. Usai)
Parit chi mèrcuris passadu s’assessora a sa cultura de Carbònia Emanuela Rubiu, apat iscritu una lìtera a su sìndigu cun sa cale ddi dimandaiat de nde-dda tròcere s’incàrrigu. Finas a imoi non si scint is motivos de custa decisione ma su sìndigu cun is àteros assessores e su grupu consiliare dd’ant dimandada de abarrare in giunta. Duncas is dimissiones sunt “suspèndidas” finas a lunis, candu iat a dèpere pigare una decisione definitiva. S’opositzione at torradu a atacare a su sìndigu imputende-dda de no èssere bella a ghiare sa tzitade. Si sa Rubiu cunfirmat is dimissiones at a èssere su de 3 assessores de sa giunta Massidda chi lassat s’incàrrigu in 9 meses. (R-P.)
a cura di Roberto Pinna
