Sa cida in curtzu. Dae su 19 a su 26 de Friàrgiu
Domingu 19: at tentu sucessu mannu s’isfilada de carnevali organizada dae sa Pro Loco in Santu Giuanni Suèrgiu. Ddoi fiant 8 grupos organizados (5 carros e 3 grupos a pee) e unas cantu millas de personas chi sunt lòmpidas dae totu su Sulcis e finas de Casteddu fiant castiende. Sa giuria at istabilidu chi su grupu “Il mondo degli animali” de Su de Is Ùrigus at bintu su primu prèmiu: 500 èuros e Cibù, sa mascotte a forma de cibudda posta pro trofeu.
Lunis 20: Sàbudu a noti passadu in Igrèsias vàndalos ant postu fogu in sa bibliocabina de fronte a su mercadu cìvicu. S’iscònciu est pagu – sceti 3 libros abruxados proite chi Mauro Usai, su presidente de su consìliu comunale, fiat passende pròpiu in su momentu chi est partidu su fogu e at acurtu a nde-ddu istudare – ma s’afrustu fatu a sa cultura e sa bona voluntade de is giòvanos de s’assòtziu Trevessu chi ant aprontadu sa bibliocabina est mannu meda. A custu afrustu is igresientes an rispùndidu in manera forte: volontàrios ant allichiriddu sa bibliocabina e dd’ant prena cun àteros libros e finas s’assessore a is Entes Locales de sa RAS Cristiano Erriu at impromìtidu chi nd’at a donare àteros 50 .
Martis 21: su consìliu comunale de Carbònia at incumentzadu s’esàmine de su bilànciu de previsione 2017. Su surcu intru de sa magiorantza de su M5S e s’opositzione est fungudu meda. S’assessore a su bilànciu Manca at presentadu su documentu (prus de 122 miliones de èuros) oberende slides comente faghiat Matteo Renzi e at nadu chi mancari amminchint 2 miliones e 600mila èuros de intradas cunfronta a s’annu passadu no ant crèschidu is alìcuotas tributàrias e in prus at pròmitidu mòdificas in s’assestamentu previstu in mese de argiolas. A s’àtera parte nc’est chini comente s’ex sìndigu Giuseppe Casti cuntestat is segadas a is servìtzios sociales e su fatu chi non si siat postu mancu un’èuru pro is investimentos, o Fabio Usai (Partito dei Sardi) chi cuntestat su fatu chi depiat èssere unu bilànciu partecipadu iscritu in pari a is citadinos ma invècias dd’ant fatu is funtzionàrios e is assessores serrados in is ufìtzios. Petantis sa magiorantza no at arricidu mancu unu de is emendamentos propostos dae s’opositzione. Martis chi benit dd’iant a depère èssere aprovadu a manera definitiva.
Mèrcursis 22: is consìlios comunales de Narcau, Nuxis e Sa Baronia-Villaperùciu ant deliberadu de pigare in cunventzione su pròpiu segretàriu comunale. Nc’est istètia unu pagu de polèmica in Sa Baronia, candu a s’acabu de sa setziada, sa consiliera de opositzione M.G. Peis s’est chesciada pro sa cunvocatzione istraordinària e urgente cun sceti cun duos puntos in s’òrdine de is traballos narende chi su getone de presèntzia de pagare a is consilieris at a essere carrigadu in bilànciu comunale e in prus at imputadu a sa giunta comunale de s’essere aumentada s’istipèndiu. Su segretàriu comunale dd’at ispiegada chi est bennidu a marolla a fàere una riunione urgente pro chistiones chi dipendiant dae is esigèntzias de is àteros comunos; su sìndigu, Antonello Pirosu, invècias dd’at cumbidada in sa pròssima setziada a ispiegare cun cale atu sa giunta s’est aumentada s’indennidade proite s’indennidade etotu est istabilida dae sa lege natzionale chi at impostu de dda ismenguare.
Giòbia 23: In igrèsias, a pustis de 10 dies, at torradu a abèrrere su Mercadu Cìvicu. Ant bogadu is arregiolas dae su pamentu e dd’ant torradu a fàere totu de rèsina cun colores diferentes a segunda de sa categoria merceològica e nc’ant a iscriere 16 faeddos-crae pro sa sustenibilidade e sa partecipatzione cìvica chi ant a cumpletare s’interventu realizadu cun sa collaboratzione de s’Iscola Civica de Arte Cuntemporànea. A lestru ant a cumentzare is traballos a foras de s’istrutura: s’ant a imbrachinare is prospetos esternos, ant a arrangiare is iscalas e ant a impermeabilizare sa cobertura.
Cenàbara 24: su sutasegretàriu a sa Defensa, su generale Domenico Rossi est andadu a s’uspidale Sirai de Carbònia pro commemorare su magiore Giuseppe La Rosa, mortu in d-unu atentadu in Afganistan in su 2013. A pustis est andadu in s’àula consiliare de Santu Giuanni Suèrgiu aundi s’est fata un’àtera cerimonia commemorativa cun sa banda de sa Brigada Tàtari e is istudentes de s’iscola mèdia G. Marconi ant lìgidu unas cantu testos a pitzus de su tema de sa paghe e de sa solidariedade. Elvira Usai, su sìndigu de Santuanni, at invitadu su sutasegretàriu Rossi, personna connota in su Sulcis proite a metade de is annos 90 fiat su cumandante de su Primu Regimentu de Teulada, a si interessare a is problemas de sa zona nostra. Su generale Rossi at cunfirmadu s’impegnu pigadu dae su Guvernu a si cunfrontare cun sa Regione pro allebiare is tzerachias militares ma at nadu chi cun is esigèntzias de dònnia territòriu si depent tènnere in contu ipuru is esigèntzias de s’addestramentu.
Sàbudu 25: su cìrculu polìticu Antonio Gramsci (ex SEL) de Sant’Antiogu cun d-unu comunicadu de su presidente at decraradu chi no at a partecipare a is eletziones amministrativas chi s’ant a fàere beranu chi benit. In su comunicadu si ligit chi est unu scioberu dolorosu, pigadu a s’unanimidade, ma su de nche bollet èssere a marolla in polìtica no andat bene, massimamente candu non si cumpartzint progetos e propostas.
a cura di Roberto Pinna
