Sa cida in curtzu: Dae su 12 a su 19 de friàrgiu
Domingu 12: Non totus sunt cuntentos chi si siat isblocada, a pustis de 930 dies, sa protzedura autorizativa pro s’Eurallumina. Dae una parte is ambientalistas tenent timorias pro s’incuinamentu e pro sa salude – est giustu a sinnilare chi a Angelo Cremone, istòricu ambientalista portoscusesu e ex consilieri provinciale, at arrìcidu melètzas (dd’ant iscritu in sa fentana de domu sua “ Cremone sei morto” ). A s’àtera parte nc’est gente meda chi non credet prus in su sistema industriale sulcitanu chi finas a imoi nos at lassadu sceti iscòrias e disocupatzione.
A dolo mannu tocat a nàrrere chi in custos annos non s’est fatu nudda de cuncretu pro circare un’alternativa a s’indùstria: is bonìficas, chi podent èssere unu setore aundi is operaios podent agatare impreu, sunt firmadas dae arrociallas burocràticas; nudda s’est fatu pro torrare a cualificare is operaios etotu e sunt pagos meda is chi ant circadu (e agatadu) un’àteru mestieri e duncas sa maioria de issos (e duncas de is famìlias inosru) sighint a bìvere cun is ammortizadores sociales. Sa beridade est, chi mancari no ammanchint initziativas bonas in su turismu e in s’agricoltura, su territòriu a bellu a bellu est acabende-sì de mòrrere. Pro imoi e tanti, sena de s’indùstria est difìcile a bìere un’essida dae custa crisi niedda chi paret non bollat acabare prus.
Lunis 13: in Masainas ant presentadu un investimentu importante in su setore agroalimentare in s’àmbitu de is initziativas de su Piano Sulcis. Sa sotziedade cooperativa “I tre solchi” at pònnere 145 ètaros de terrenu a mèndula, olia, cerexa, tzafaranu e isparagu in su territòriu de is comunos de Santu Giuanni Suèrgiu, Giba e Santadi. Sa sotziedade est formada dae 9 sugetos, intru de custos nche sunt sa TirrenoFruit e sa Conad, duncas sòtzios chi tenent resorsas tècnicas e finantziàrias importantes. Sunt previstos puru impiantos de trasformatzione e unu pro sa produtzione de energia dae sa biomassa chi abarrat dae sa cultivatzione chi s’ant a fabbricare in Santu Giuanni Suèrgiu.
Martis 14: is carabineris ant arrestadu a unu pregiudicadu de Carbonia proite dd’ant agatadu 500 kilos de arràmine in su cofanu de vetura sua. A frigare su giòvanu, chi dd’ant cassadu acanta s’ex istabilimentu de sa Cardnet in Igrèsias de aundi est ammancadu s’arràmine, una crae chi aberriat s’eca de s’istabilimentu etotu.
Mercuris 15: in Piscinas s’est fata riunione in sa sala consiliare pro arresonare de sa situatzione de sa POLAR, sa dita chi tenet s’istabilimentu aundi si traballat sa bentonita. Ddoi fiant su sìndigu Mariano Cogotti, Gianfranco Trullu chi est su presidente de s’Unione de is Comunos de su Sulcis, sindacalistas, e is consilieris regionales de su territòriu. Sa positzione in is cunfrontos de s’azienda est crìtica meda: defatis de 25 operaios nde sunt abarrados sceti 15, sende chi10 ddos ant trasferidos in Genova a pustis de Paschixedda. Is presentes a sa riunione ant torradu a dimandare un’atòbiu cun s’assessora a s’indùstria de sa RAS pro chi si fatzat una verìfica de is cuncessiones de is gavas de aundi bogant sa bentonita a s’iscopu de mantènnere su livellu ocupatzionale.
Giòbia 16: Is Carabineris ant agatadu una miniera de oru in su campu rom de Carbònia. A segus de unas cantu denùntzias de fura, in mesu a cunditziones igènicas precàrias, is Carabineris de sa cumpangìa de Carbòbia ant scercuestadu orològios, prendas de oru e de prata, e ainas pro traballare pro unu valore de 40mila èuros e dununtziadu 4 personas residentes in su campu.
Cenàbara 17: atòbiu in Masainas organizadu dae s’Amministratzione Comunale pro su REIS (rèdditu de inclusione sociale). Un’atòbiu necessàriu, at nadu su sìndigu de Masainas Ivo Melis saludende su pùbblicu, pro circare de donare rispostas a totus is aspetativas generadas dae sa lege noa. A pustis ant faeddadu Stefania Manca, chi est sa diretora de su servìtziu is polìticas sociales de sa RAS, chi at ispiegadu su mecanismu de funtzionamentu de REIS; s’onorevole Luca Pizzuto, chi fiat su primu firtmatàriu de sa lege, chi at ispiegadu ca s’iscopu est cussu de nde fàere essire sa gente dae sa poberesa pro mèdiu de unu percursu de traballu de aprontare cun is entes territoriales; S’onorevole Franco Sabatini, chi est su presidente de sa commissione bilànciu de su consìliu regionale, chi at promìtidu s’aciunta de àteros 30 miliones de èuros pro fàere polìticas sociales a is 14miliones giai postos pro su REIS.
In su pùbblicu ddoi fiant medas amministradores locales e funtzionàrios responsàbiles de is servìtzios sociales de is comunos de su Sulcis chi nd’ant fatu bessire a pillu unas cantu problemàticas. Totus ant apretziadu sa “ratio” de sa lege chi est diaderus rivolutzionària, est a nàrrere non prus donare dinari a sa gente sena de fàere nudda, ma calincunu at fatu presente chi fortzis fiat mellus a nde arresonare cun is repsonsàbiles de servìtziu, chi imoi s’ant a agatare de fronte a cunditziones noas de aplicatzione non fàcile e ant fatu presente puru su fatu chi medas categorias, chi imoe pigant una forma de agiudu dae is comunos, ant a abarrare foras de su REIS e duncas est necessàriu a modificare is delìberas de aplicatzione.
Sàbudu 18: Ant tentu sucessu mannu de pùbblicu is presentadas fatas in su Teatro Elettra de Igrèsias e in sa Grande Miniera de Serbàriu de su libru de Ignazio Marino “Un marziano a Roma” pubblicadu dae Feltrinelli aundi contat sa beridade sua de is fatos chi dd’ant bistu protagonista in su guvernu de sa capitale de s’Itàlia.
Domingu 19: est torradu su tempus bellu, e aici is algerinos ant torradu a isbarcare in sa costa sulcitana. Custu fine de cida fiat pròpiu un unda mannna de gente: defatis is Carabineris cun s’agiudu de sa Guàrdia Costera, de sa Politzia e de sa Guàrdia de Finantza,in intru de Porto Pino, Teulada, Chia e Sant’Antiogu, ant firmadu 87 personas. Comente semper nde-ddos ant pinnicados e lòmpidos a unu centru de collidura in sa zona de Casteddu.
Roberto Pinna
