Sa cida sulcitana in limba sarda comuna Dae su 27 de donniassanti a su 3 de mese de idas
Domingu 27: In Santadi est andada bene meda sa de XIV editziones de “Pane e olio in frantoio”, sa rassegna enogastronòmica organizada dae s’amministratzione comunale santadesa in pari a is assòtzios locales e su contributu de sa RAS. Gràtzias a sa die bella e calenti, s’est bista gente meda passillende in is arrugas e in sa pratza de su boddeu castiende is mostras e tastende is mellus produtziones locales. Sucessu mannu pro is escursiones: in 150 ant fatu sa tapa santadesa de su Camminu de Santa Bràbara e in 350 a bicicleta ant fatu su giru de is montes e de su sartu. Prenu meda puru in in su situ pùnicu de Pani-Lòriga e in is Grutas de Su de is Tzuddas. Pro su chi pertocat sa produzione de ollu, sa de ocannu est annada mala in totu su Sulcis: defatis mancai su nùmeru de olivàrios siat crescende sempre, cunfronta a s’annu passadu sa produtzione est prus bàscia de s’85%. Pro ispiegare custu fatu tocat a tènnere in cunsideru ca ocannu est annada normale de “iscàrrigu” e in prus tocat a aciungere su sciutori mannu e is travessuras de bentu de sole chi nd’ant iscutu su frore in beranu e in is meses passados nd’at fatu arrùere su pillixeddu de olia chi nci fiat in matas.
Lunis 28: A mengianeddu nc’est istètiu un’ àteru isbarcu in sa costa sulcitana. 16 algerinos sunt arribados in d-una plàgia chi abarrat in su territòriu de su polìgunu militare de Teulada e fiant impunnende conca a Sant’Anna Arresi. Ddos ant firmados is Carabineris chi nce ddos ant lòmpidos a unu centru de collidura in Casteddu. Su consìliu Comunale de Sa Baronia-Villaperùciu at aprovadu su regolamentu pro donare is contributos pùbblicos pro s’isport, su pianu de su centru matrice, una variatzione de bilànciu e at puru ridùsidu de su 10% is indennidades de is amministradores.
Martis 29: Creschet sa polèmica polìtica in Iglesias a pustis de su blitz fatu dae sa Guàrdia de Finantza in is ufìtzios de s’assessoradu a su turismu. Is finantzieris ant pigadu documentos relativos a su finantziamentu de manifestatziones de promotzione turìstica (“Notteggiando” e “Mercatini di Natale”) organizadas s’annu passadu. A parridade de calincunu esponente de s’opositzione, s’assessore Franceschi s’iat a dèpere dimitère. Franceschi rispundet chi est trancuillu e isperat chi a lestru acabit s’inchiesta pro chi si ammostrit chi su traballu chi ant fatu dae issu etotu e massimamente is funtzionàrios est istadu fatu cunformu a su chi narat sa lege.
Mèrcuris 30:. S’Agèntzia Forestas at a oberare, sena de pagare sa pesone, pro tres annos un parte de s’ex upsidali Fratelli Crobu pro is ufìtzios territoriales de su Sulcis. In custa manera sa ASL 7 at a mantènnere s’istrutura in eficèntzia sena de pagare costos de gestione e de manutentzione ordinària.
Giòbia 1: Tempus de fàere unu pagu de contos pro su Piano Sulcis a pustis de 4 annos . In Santadi, de fronte a totus is sìndigos sulcitanos e is rapresentantes de is entes chi traballant in su territòriu, su coordinadore Tore Cherchi at ispiegadu a comente sunt is cosas. Sa situatzione pro su chi pertocat s’ispesa de su dinari disponibile (in totu prus de 650 miliones de èuros) no est bona pro nudda: tropu is arrociallas burocràticas chi fatu fatu bessint a pillu e blocant is proceduras. Perou calincuna cosa est movende-sì siat pro is infrastruturas (luegus s’ANAS at a cumentzare is traballos in SS 293, Abbanoa at a collegare is digas sulcitans e est partende sa gara pro su portu industriale de Portovesme), siat pro is agiudos a is impresas (est acabende s’istrutòria de is dimandas relativas a is bandos pro insediamentos produtivos nous). Ancora firmas is bonìficas, invècias est andende bene sa circa scentìfica (in sa Sotacarbo e in Seruci comentzat a donare resurtados su progetu ARIA) e e s’ant a ammordernare is laboratòrios e is machinàrios de 8 istitudos professionales sulcitanos.
Su ministru pro s’isvilupo econòmicu Carlo Calenda in Casteddu at atobiadu is assessores a su traballu e a s’indùstria de sa RAS, s’amministradore delegadu de Invitalia, is sindacados e sa RSU pro sa chistione de s’ALCOA. Calenda at cunfirmadu is passos a innantis fatos in is ùrtimos mesas e at bòfidu cumpartzire cun totus is sugetos ativos in sa vertentza is atziones de pigare in cidas imbenientes.
Cenàbara 2: Is traballadores de su Geoparcu ant torradu a protestare de fronte a s’Assessoradu de su Traballu in Casteddu. Su Consìliu Regionale at aprovadu sa lege chi prorogat sa cunventzione cun s’Ati Ifras pro un annu, ma s’Assessoradu no at ancora aprontadu is atos e duncas no at arritiradu is lìteras de licentziamentu (su cuntratu iscadit su 31 de mese de idas). In prus is traballadores si sunt chesciados ca ancora no ant ddis pagados s’istipèndiu de is duos meses passados.
Sàbudu 3: Su tempus sighit a abarrare bonu e su mare est chietu e duncas sighint is isbarcos in sa costa de su Sulcis. Sunt giai 130 is algerinos lòmpidos (oberende assumancu 8 barcas) in Sant’Antiogu, Teulada e Sant’Anna Arresi. Nde-Ddos ant pinnigados sa Guàrdia de Finantza, sa Politzia e is Carabineris e a pustis de s’identificadura nche dddos ant a lòmpidus in d'unu centru de acullièntzia.
A cura di Roberto Pinna
