Sa cida sulcitana. in lingua sarda comuna. Dae su 20 de donniassanti a su 26 de donniassanti
Domingu 20: Un’òmine de Tratalias chi fiat circhende cordolinu in Santa Luxia (in comunu de Santu Giuanni Suèrgiu) s’est pigadu una iscupetada. A s’òmine dd’at fertu perdigoni a faci, a unu bratzu e a su costadu e no at pòtziu nàrrere nudda in contu de chini dd’at isparadu proite ca fiat incurbadu a palas de una tupa. Dd’at agiuradu su fillu chi nche dd’at lòmpidu a s’uspidale de Sirai.
In Igrèsias at tentu sucessu mannu “La Fiera del Gusto” sa manifestazione enogastronòmica organizada dae s’assòtziu Primavera Sulcitana, cun su Comunu, sa Pro Loco, su Cunsòrtziu Turìsticu e Centrocitta. S’est bista gente meda, aproliada dae su Sulcis e dae su Campidanu, passillende in is arrugas e is pratzas de su centru istòricu e tastende is mellus produtziones traditzionales de Sardigna.
Lunis 21: Sa Primu Setzione de su Tribunale de Casteddu at cundennadu a Adriano Puddu, s’ex sìndigu de Portescusi, a 6 annos e 4 meses de presone cun s’interditzione in perpètuo dae is pùbblicos ufìtzios. A Puddu dd’ant cundennadu pro concussione e violèntzia sessuale, peculadu tentadu, favoregiamentu de sa prostitutizone e voto de iscàmbiu. Invècias dd’ant assòlvidu pro àteros reatos graves comente sa concussione e sa corrutzione.
Martis 22: s’assòtziu “Meglio in due” at manifestadu in medas comunos de Sardigna (in Igrèsias e in Perdaxus in su Sulcis) ponende a lutu sa bandera de is Cuàturu Moros pro protestare contras a su Consìliu Regionale chi ancora no at cambiadu sa lege eletorale introdusende sa dòpia preferèntzia de genere. Sa dòpia preferèntzia de genere prevedit chi s’eletore potzat donare sa preferèntzia a unu mascu e a una fèmmina chi siant candidados in sa pròpiu lista. Duncas s’assòtziu “Meglio in due” est dimandat chi puru pro s’eletzione de is consilieris regionales si donit custa oportunidade.
Mèrcuris 23: is carabineris ant denuntziadu unu piscadore de Sant’Antiogu pro trufa. S’òmine at pigadu giai 16mila èuros de indennizos, decrarende chi in su 2014 e 2015 fiat imbarcadu ma is Carabineris chi ant fatu is controllos ant istabilidu ca pro prus de sa metade de is dies chi sa pisca fiat blocada s’òmine fiat in Terramanna pro chistiones personales.
Tziu Eraldu Secchi (Francesco a s’anàgrade) de Santu Giuanni Suèrgiu at fatu 100 annos. Is parentes, is amigos, su predi de sa parròchia de Santu Giuanni Batista e s’AUSER cun s’amministratzione comunale dd’ant fatu festa manna in s’agriturismu Agrifoglio. Agurios mannos a Tziu Eraldu e a nde contare àteros 100 in salude!
Giòbia 24: su Servìtziu de Ascurtu de sa Caritas diocesana afortiat sa presèntzia sua in su territòriu. Defatis in Santadi, s’obispu Munsinniori Giovanni Paolo Zedda in pari a is amministradores, at abertu unu centru de ascurtu nou in is locale “Casa Miniati” arrangiados dae pagu de s’Amministratzione Comunale. In su centru, nàscidu gràtzias a sa collaborazione de sa parròchia locale de Santu Nicolau ghiada dae don Giampieru Marangiu, ddoi ant a traballare unas 10 personas e si aciungit a cussos de Sant’Antiogu, de Carbònia e de Igrèsias. S’idea est cussa de collaborare cun is servìtzios pùbblicos e privados ascurtende is personas in dificoltade e donende unu agiuru assumancus pro is necessidades prus immediatas e de agatare una solutzione a totu s’abisòngiu aprontende unu percursu chi pongat a su centru sa persona.
Cenàbara 25: fiat a sa Giorronada Internatzionale contras a sa violèntzia asuba is femmina e puru su Sulcis at bòfidu donare unu sinniale pro circare de cuntrastare sa violèntzia de genere. A mengianu in Sant’Antiogu, a intru de su PLUS, e in paris a s’assòtziu “Donne al traguardo” e s’Amministratzione Comunale ant presentadu s’isportellu de ascurtu antiviolèntzia chi, si no at a firmare o limitare sa violèntzia, siguramente podet èssere unu agiudu de importu mannu pro is fèmminas. A merie in Carbònia in sala polifunzionale de su Comunu s’est fatu unu ispètaculu in memòria de Oretta sa maista de iscola morta in Piolanas dae su maridu etotu in su 1957. A mericeddu in s’oratòriu don Milani de Giba, s’est fatu s’ispetàculu “Antigone – il dolore di una fanciulla devota da Sofocle” curadu dae Gaetano Marino e Marina Fiore e e a pustis sunt sighidos is interventos de su maresciallu de is Carabineris Roberta Di Pilo, de Arianna Vinci (Io non ho paura), Cristina Matta (assistente sociale de Giba) e Diletta Mureddu (CGIL).
Sabudu 26: Su sìndigu de Masainas Ivo Melis at iscritu a su presidente de su consìliu regionale Gianfranco Ganau. Melis at fatu presente totu is dificoltades chi tenent is sìndigos e is assessores a is servìtzios sociales a gestire is casos de amministrazione de sustegnu chi su Tribunale ddis intregat sigundu cantu narant is dispositziones de lege n.6 de su 2004. In pagus faeddos Melis at dimandadu chi sa Regione pongat totus is risorsas chi serbint pro chi non siant prus is amministradores locales a sighire custos casos difìciles chi pigant tempus a sa gestione de sa cosa pùbblica, ma chi ddu fatzant personas cumpetentes a gestire custas situatziones chi bortas meda sunt delicadas.
In Sant’Antiogu su sìndigu Mario Corongiu, in pari su diretore de sa ASL 7 Antonio Onnis e s’assessora a is servìtzios sociales Mariella Piredda, at inauguradu sa “Casa Protetta” pro is antzianos. Sa dita Melania at arrangiadu s’ex ospìtziu chi fiat arruendi-nde e imoi est una istrutura de ecellèntzia de 1000 mq ddoe cun 12 aposentos e ambulatòrios.
