Domingu 23: Beranu chi benit s’at a votare pro is amministrativas in Sant’Antiogu. Sende chi su murighìngiu de is diversos grupos polìticos locales est incumentzadu giae dediora, initziant a essire a pillu is primas boghes a pitzu de su nùmene de is candidados. Paret chi s’ant a candidare Ignazio Locci, consilieri regionale de Fortza Italia e su vicesìndigu Marco Massa. Fortzis si candidant puru Sergio Busonera ex consilieri provinciale e comunale, Alberto Fois leader de su grupu Genti Noa (a cantu si narat paret chi dd’agiudit puru su grupu locale de su M5S) e Massimo Melis, ex vicesìndigu passadu a s’opositzione. S’ùnica cosa sigura est chi non s’at a candidare, assumancus a sìndigu, Mario Corongiu chi est acabende su de duos mandados.
Lunis 24: a is 8:30 de mangianu, su consìliu comunale de Carbònia, s’est riunidu de fronte a s’intrada de s’uspidale Sirai pro protestare contras a su càmbiu de su puntu nàscidas a su CTO de Igrèsias. Fiant presentes puru sìndigos e rapresentantes de is amministratziones comunales de su Sulcis e meda gente comuna. S’est fatu presente ca a mòvere su puntu nàscidas a su CTO de Igrèsias non portat sètiu proita ca in cussu uspidale no ddoe at su sistema de emergèntzia-urgèntzia chi invècias est previstu in s’uspidale de Sirai. Est incumentzada una petitzione populare pro firmare sa procedura e is sìndigos ant otentu un’atòbiu cun s’assessore a sa Sanidade Arru pro mèrcuris a merie.
Martis 25: In Flùmini Maiori, faci a mesudie, unu grupu de unos 60 migrantes at blocadu sa SS 126 in sa zona de S.Angelo. Is migrantes ant protestadu - in manera pacifica - proita ca dae duos non sunt donende-ddos su poket money e si sunt arritirados candu sunt ntervènnidos is Carabineris e unus cantu mediadores culturales. Tocat a nàrrare chi si sunt chesciados medas residentes ca ant ispiegadu ca si sunt agatados presoneris in domu insoru.
A merie s’Assessore a is Traballos Pùbblicos Paolo Maninchedda est caladu a Nuxis pro resonare de is interventos previstos in su Piano Sulcis in sa SS 293, s’istradone chi collegat su Sulcis de Bàsciu cun su Campidanu e Casteddu. S’ex vicesìndigu passadu a s’opositzione Mariano Nonnis s’est chesciadu ca in su tretu de sa SS 293 chi passat in mesu de Nuxis no est previstu perunu interventu invècias si nd’at a fàere de importantes in su tretu chi andat dae Giba a Piscinas. A manera crara e dereta, Manichedda at ispiegadu ca non si podet pònnere àteru dinari ma si podent modificare is interventos giai previstos in sa SS 293. Perou custas modifica depent èssere aprontadas a lestru meda dae is comunos interessados proita in pagu tempus su MEF at a autorizzare s’ispesa de is 15 miliones de èuros postos pro arrangiare sa SS 293.
Mèrcuris 26: 20 sìndigos de su Sulcis Iglesienti ant atobiadu s’assessore a sa Sanidade Arru pro sa chistione de su puntu nàscidas e prus in generale pro s’organizatzione noa de sa sanidade in su Sulcis. S’assessore at nadu ca un’organizatzione aziendale noa est sicuramente dolorosa ma necessària e duncas sa procedura chi est giai incumentzada sighit a andare a innantis. E defatis su puntu nàscidas est istadu mòvidu a su CTO a comente fiat previstu.
Giòbia 27: Su giugi monocràticu de su tribunale penale de Casteddu at assòlvidu, tres personas chi fiant imputadas de turbativa de asta. Sa chistione fiat incumentzada in su 2007 candu una dita de Tratalias aiat bintu un’ apalutu in Perdaxus pro s’intregu de su servìtziu de igene urbana. A pustis sa dita chi aiat pèrdiu – una cooperativa de Perdaxus etotu – chi finas a cussu momentu fiat gestende giai totus is servìtzios comunales (birde pùbblicu, regorta de s’alliga e allichirimentu de is locales comunales) aiat fatu ricursu a su TAR e fiat lòmpidu puru un’espostu a sa Procura de sa Repubblica. Cumentzadas is indagines, cun tanti de intercetatziones telefònicas, in su 2011 nc’est istètiu su rinviu a giudìtziu. Sa chistione s’est serrada cun s’assolutzione cun fòrmula prena de is 2 ingegneris chi fiant in sa commissione chi at giudicadu s’oferta tènnica e su mere de sa dita chi aiat bintu s’apaltu.
Cumentzat a fàere tretu su Fundatzione de su Camminu de Santa Bàrbara. Is consìlios comunales de su Sulcis Iglesiente sunt incumentzende a aprovare s’istatudu de sa Fundatzione chi iat a dèpere gestire e propònnere initziativis in intro de su camminu religiosu, chi in 20 tapas e 400 km at a passare in totu sa Sardigna sudoccidentale tochende crèsias, sitos archeològicos, industriales e naturalisticos.
Cenàbara 28: A corpos de communicados istampa e de post in Facebook, pro totu sa cida at sighidu a crèscere sa polèmica polìtica a pitzu de su puntu nàscidas tramuradu dae s’uspidale Sirai su CTO de Igrèsias. Calincunu polìticu est prexadu (igresientes pruscatotu), calincunu si chesciat (massimamente carboniesos), calincunu sìndigu de su Sulcis de Bàsciu non pigat positzione ma narat ca <<bieus sceti su chi perdeus ma non cumprendeus totu su chi arrinnesceus a sarvai>>. In mesu de totus custu treullu, aundi doniunu dda narat diferente de is àteros, est nàscida sa primu pippia in su CTO: si narat Emma, est masainesa, mamma e filla istant bene. Augùrios mannos!
Sabùdu 29: In Sant’Antiogu a mericeddu genti meda est aproliada in pratza Umberto pro biere “Baddendi poi s Animas”, unu bellu ispetàculu de ballos sardos organizadu dae s’assòtziu “Gruppo Folk Antica Città di Solki”.
