Sa cida sulcitana. Dae su 30 de mese de ladàmine a su 5 de donniassanti.
Domingu 30, Lunis 31 e Martis 1: Isfrutende su ponte de sa festa de Donniassanti, in medas biddas sulcitanas s'est sighida sa “traditzione” lòmpida dae is Istados Unidos de afestare Halloween e duncas babbos e mammas ant organizadu festixeddas pro is pipios perou Is chi ant organizadu is festas ant ispiegadu a is pipios cales fiant is usàntzias sardas prus sintzillas pro custas dies de festa. Duncas est capitadu de bìere puru in is biddas de su Sulcis calincunu pipiu, mancari cun d-una die de anticipu cunfronta a sa traditzione, ca in logu de si presentare a is domos allenas narende <<dolcetto o scherzetto>> (aici si furriat in italianu su “Trick or treat” de is americanos) circaiant calincuna cosa <<po is ànimas!>>.
Interessante meda s’eventu organizadu dae sa Cooperativa Sèmata in s’àrea archeològica de Pani Lòriga (Santadi): a primu note, is ghias de sa cooperativa, cuncordadas cun bistimentas chi depiant regordare cussas de is prenuraghesos e a làntia in is manos, ant fatu su giru de sa parte prus antiga de su situ archeològicu ispieghende, unu pagu brullende e unu pagu a sa sèria, su cultu de is mortus de is antenados nostros a unu grupu de bisitadores.
Mèrcuris 2: Unu grupu de migrantes ospitados in Terrùbia, in comunu de Narcau, ant torradu a blocare sa SP80. Sa chèscia est sempre sa pròpiu: non sunt donende-ddos su poket money e si nd’iant a bòllere andare dae sa Sardigna. De chi sunt arribados is Carabineris e is giornalistas e ant ispiegadu su motivu de protesta si-nde sunt torrados a s’ex albergu de Rosas.
Giòbia 3: sa RSU de s’Euroallumina at fatu su de 10 presìdios in is ùrtimos 2 meses de fronte a s’Assessoradu a S’Ambiente in Casteddu, in ue sunt faende is valutatziones de impatu ambientale a pitzus de su pianu de investimentos de 200 miliones presentadu dae sa RUSAL pro fàere torrare a partire sa fàbbrica de Portovesme. Sa decisione de su Savi iat a dèpere lòmpere su 29 de su mese chi intrat. S’obietivu de sa mobilitatzione permanente est cussu de sighire totu su percursu previstu dae is normas e dae is leges chi regulant sa matèria.
Cenàbara 4 In Carbònia sa Somica, chi est sa sotziedade a capitale comunale chi faghet sa parte prus manna de is manutentziones e is arràngios de is istruturas comunales tenet unu diretore nou: est s’ingenieri santantioghesu Giuseppe Baghino chi, a pustis de èssere istadu presentadu dae su sìndigu Paola Massidda, at atobiadu is traballadores e su sindacadu. Sa gestione de sa Somica est chistione delicada, sende chi est istètia finas argumentu de campagna eletorale 6 meses agoa. Dae una parte nc’est chini at promìtidu – pro esèmpiù suM5S chi at bintu is eletziones – de ridùsere is ispesas e is risorsas de sa Somica etotu pro risparmiare dinari pùbblicu e favorèssere is impresesas locales chi sunt sunfrende meda pro sa crisi, a s’àteru oru nc’est chini est timende chi sa ridusidura de is ispesas siat unu perìgulu pro sa cualidade se su servìtziu e pruscatotu pro su livellu ocupatzionale. Su diretore nou at asseguradu ca su mandadu chi dd’at donadu s’Amministratzione Comunale non est cussu de ridùsere s’orgànicu ma de fàere a manera chi sa Somica siat funtzionale a su chi abisòngiat a is citadinos e sichei est possìbile puru chi cresciat su nùmeru de is dipendetes.
Sàbudu 5: Su tempus est sempre bonu e su mare abarrat chietu e aici sighit a lòmpere gente dae s’Algeria in is costas sulcitanas. Custa cida in 5 isbarcos - 3 in su territòriu de S.Anna Arresi e 2 in su de Sant’Antiogu – sunt arribadas giai 100 personas. Nde-ddas ant pinnigadas is Carabineris de sa Cumpangia de Carbònia e nche-ddas ant lòmpidas a unu centru de acullièntzia pro is bìsitas mèdicas e is proceduras de identificadura.
Su comitadu pro su eja a su referendum costitutzionale at organizadu un’atòbiu in Santadi. Lassende a pèrdere is sòlitos slogan a favore de sa riforma chi si intendit a dònnia ora in televisione o in Facebook (pro esèmpiu si passat sa riforma, mancari pagu, ant a calare is costos de sa polìtica o su procedimentu legislativu at a essere prus lestru) est istètiu interessante s’interventu de su deputadu carboniesu de su PD Emanuele Cani chi at regordadu comente pro 30 annos in Itàlia s’est chistionadu de cambiare su bicameralismu paritàriu ma no dd'at fatu mai nemus e at criticadu siat su Capu de su Guvernu Renzi chi at isballiadu impostende su referendum a pitzus de sa persona sua, siat gente de su partidu suo etotu chi at votadu sa riforma in parlamentu e imoe est faende campagna pro su no (cosa chi a parridare de chini iscriet custa rubrica benit male a cumprèndere). Invècias Cristiano Erriu, assessore a is Entes Locales de sa Regione, at ispiegadu ca non c’at perìgulu pro s’autonòmia de sa RAS chi invècias nde bessit afortiada confrunta s’impostatzione atuale. Daniele Reginali, segretàriu provinciale de su PD, at serradu s’atòbiu cumbidende is presentes a ispiegare in domu e a is amigos is arresones de su eja.
