Sa cida sulcitana in curtzuDae su 19 a su 25 de abrile
Lunis ant fatu sa de 662 festas de Sant’Antiogu. Che s’annu passau etotu no est bennidu bene a festare a su Patronu de Sardigna sigundu sa traditzione. Duncas ocannu puru nudda missas in presèntzia cun is fideles, nudda prutzessiones e nemancu ispetàculos tziviles: s’obispu nostru Giovanni Paolo Zedda at tzelebradu sa missa in sa basìlica in direta televisiva. Gràtzias a sa collaboratzione de sa Protezione Civile, de s’Associazione Nazionale Carabinieri e de sa Cumpagnia de is Barracellos in totus is domos de is santantioghesos est arribadu su cocoi beneditu chi est unu de is sìmbulus de sa festa in pari a unu paperi cun sa pregadoria a su Santu e informatziones istòricas de rilievu.
Su Comunu de Igrèsias est intradu sa “Fondazione Sardegna Isola del Romanico” chi tenit pro iscopu su de avallorare su patrimòniu de is crèsias romànicas de Sardigna. Nde faghet giae parte 60 comunos e s’idea est de criare una retza manna de collaboratzione e fintzas unu parcu temàticu. Duncas s’amministratzione comunale sighit in su camminu de avaloramentu de su patrimòniu artìsticu incarreradu unos cantos annos a coa.
S’amministratzione comunale de Sant’Antiogu at postu 150mila èuros agiudare totus is atividades chi sunt patende meda sa crisi econòmica causada dae sa pandemia. A lestru at a essire su bandu pùbblicu e su sìndigu Nàssiu Locci at ispiegadu chi s’at a circare de ismenguare is costos fissos de is atividades (pro esèmpiu pesones e utèntzias).
Su 22 de abrile in s’iscola primària de Masainas is iscolanos cun is maistras inosro e s’amministratzione comunale ant bòfidu tzelabrare cun unu sinniale cuncretu sa de 51 editziones sa die internatzionale de sa Terra: tenende in cunsideru su fatu chi Masainas est parte de s’Associazione Nazionale Città dell’Olio, ant postu 10 matas de olia in sa pratza de s’iscola a manera chi totus ddos potzant biere crescende: unu gestu piticheddu ma mannu meda in su significu pro amparare s’ambiente. Ant fatu una bella initziativa puru in Igrèsias: is boghes e is imàgines de 14 fèmminas chi rapresentant assòtzios e realidades produtivas locales si sunt aciuntas a su cortometràgiu fatu de Christian Castàngia a pitzus de is “Is Giardinus de sa Biodiversidade” trasformende-sì in d-unu appellu chi ant mandadu a su Presidente de sa Repùbblica.
Sant’Antiogu invècias s’assòtziu “Marinai d’Italia” a canoa nd’at bogadu àliga a muntones dae sa zona de su ponte.Agiornamentu de sa situatzione covid dae su territòriu. Nc’at trèulu mannu pro sa campagna de vacinatzione in logu nostru. A cida passada ant vacinadu pagu prus de is personas chi fiant prevèdidas dae su pianu regionale (18mila), e si sunt chesciados sìndigos meda pro su fatu chi sa zona nostra siat a coa meda cunfronta a su restu de s’Ìsula. Dae su 23 de abrile is prenotatziones pro su vacinu si depent fàere on-line cun su portale regionale e duncas is chi fiant fatas diretamente in is CUP de su territòriu non balint prus. De siguru custu fatu causat problemas a is prus antzianos chi sunt pagu pràticos cun su computer ma in custa manera si istransint is ammuntonamentos de gente foras dae is CUP e in su mentris ancora no ant torradu a donare s’apuntamentu a is chi ant sartadu su turno cida a innantis candu non fiant arribadas is doses de vacinu. Sàbudu Mauro Usai at annuntziadu chi in sa palestra de bia Toti in Igrèsias ant incumentzadu a aprontare is istruturas pro fàghere unu tzentru in ue s’ant pòdere vatzinare finas a 1000 personas a sa die.
In su mentris chi is numeros regionales incumentzant a melliorare, impeuant in logu nostru. Infatis, ligende is ùrtimos datos disponìbiles, is positivos sunt artziados a: 46 in Domunosa e 65 personas sunt in corantena; 78 in Carbònia e 118 in corantena; 62 in Igrèsias e 233 in corantena; 15 in Santu Giuanni Suèrgiu e 83 in corantena; 32 in Sant’Antiogu; 9 in Gonnesa; 8 in Musei, in Bidda Massàrgia 7, 4 in Sant’Anna Arresi. Benit male a contare su nùmeru de classes e de iscolas serradas dae is sìndigos pro mellus siguresa. Novas bonas sceti dae Carloforte: sunt sanados in 19 e duncas abarrant 21 positivos e 34 in corantena.
Pro cantu su de èssere in zona arrùbia fatzat infadu mannu a totus – is datos generales sunt prus bonos de is de àteras regiones chi sunt torrende a abèrrere e nos at cundannadu su nùmeru artu de focolaios e su ritardu in sa comunicatzione de is datos – tocat a sighire a tènnere passièntzia e ascurtare s’apellu chi ant fatu unus cantos sìndigos a is cuntzitadinos insoro: pro bìnchere su virus, imbàsciu chi at a arribare su vacinu pro totus, tocat a rispetare is règulas de distantziamentu sotziale e èssere pretzisos in sa fase de su traciamentu de is cuntatos, proite su virus camminat cun is personas.
Abarrade sanos!
a cura di Roberto Pinna
