Sa cida sulcitana in curtzu. Dae su 12 a su 18 de abrile
Lunis passadu s’est ispaciada a 69 annos sceti Maria Marongiu chi in is ùrtimos annos fiat vicediretora de sa CARITAS diocesana. Pro annos meda at fatu sa professora in s’istitutu tènnicu Angioy e dae su 2006 a su 2016 est istada vicesìndigu de Carbònia e assessora a is polìticas sotziales. Maria Marongiu lassat unu vacu mannu meda in sa polìtica carboniesa e massimamente de in su mundu de s’associatzionismu e de su volontariadu sulcitanu chi dd’at bista protagonista in is ùrtimos 20 annos.
Lutu puru in Portescusi: martis a 90 annos s’est mortu Renzo Sanna chi in 40 annos est istadu su maistru de 1500 portescusesos. Sanna fiat puru apassionadu chircadore de istòria locale (“Sintesi cronologica di un microcosmo – Portoscuso” est diaderus unu traballu bene fatu) e in su 2017 su Presidente de sa Repubblica dd’iat donadu su tìtulu de prestìgiu mannu de Cavalieri de su Traballu.
Ocannu puru unos cantos comunos sulcitanos partetzipant a su Promemoria Aushwitz: su progetu incarreradu dae s’ARCI cun s’assòtziu “Deina” e finantziadu dae is Comunos de Igrèsias, Carloforte, Sant’Antiogu, Portescusi, Masainas e Bidda Massàrgia donant s’oportunidadi a is giòvunos dae 18 a 25 annos de fàere unu viàgiu de formatzione (ocannu pro more de sa pandemia s’esperièntzia at a èssere fata in digitale) chi ddos at a permìtere de bisitare is logos prus sìmbòlicos (su campu de Auschwitz e su ghetu de Cracòvia) chi ant bistu miliones de personas ispèrdidas dae su machìmine nazista.
Est una bona oportunidade fintzas su bandu “P.R.O Sulcis” chi pertocat is comunos de Carloforte, Masainas, S.G. Suèrgiu, S.A. Arresi e S. Antiogu. Custu interventu est destinadu a 10 disocupados residentes in is comunes interessados (assumancus 4 depent èssere fèmminas) e chi siant sugetos dèbiles a arriscu de esclusione sotziale. Su bandu iscadit su 30 de abrile.
Sa R.A.S. at postu 500mila èuros pro ismenguare su costu de su trasportu de is passegeris non residentes in is comunos de Carloforte e La Maddalena (partzidos in partes uguales). Sigundi is inditos is ufìtzios regionales ant erogare a lestru s’acontu de su 50% de su contributu, e a comente at a arribare sa redicontatzione s’at a protzedere con àteras erogatziones.
In Igrèsias a pustis de 20 e prus annos ant fatu su collaudu pro acabare is traballos in s’ex hotel Margherita di Savoia chi at a essere su ricòveru nou pro is antzianos. In s’istrutura ant modernadu totus is impiantos sigundu sa normativa in vigèntzia e ant assetiadu puru is istantzas e àteros locales pro is òspites. S’interventu baliat in totu 2 miliones de èuros e a lestru s’ant a fàere interventos prus ordinàrios chi candu ant a èssere acabados ant a permìtere de fàere torrare a traballare bona parte de is ex traballadores de Casa Serena.
S’Amministratzione Comunale de Narcau at registradu in sa Càmera de Cummèrtziu de Casteddu su màrchiu “Deco” chi est una denominatzione de orìgine comunale chi at a serbire a promòvere e amparare is produtziones agroalimentares e artisanales narcaresas a manera chi custu màrchiu, chi in pràtica ballit che unu “Made in Narcau” si trasformit in d-una aina de promotzione turìstica e culturale.
Parit chi sa bella cursa de su Carbonia Calcio, candu mancant 7 garas a s’acabu de su campionadu de serie D, si siat firmada: in is ùrtimas 4 partidas at fatu sceti unu puntu, e duncas at pèrdiu cuntatu cun sa zona playoff (est 8 puntos asuta) ma abarrat trancuillu a mesu classìfica (est 11 puntos a innantis de is playout). De sinnilare chi s’atacante Roberto Cappai cun 13 gol fatos (ma cun 5 partidas non giogadas proite ca fiat ingortu) est capocannonieri de su girone G.
Agiornamentu situatzione Covid dae su territòriu. In su mentris chi torrat a cumentzare sa campagna de vacinatzione, podeus iscriere cun siguresa chi sa de tres undadas de ispainadura de su covid est arribada puru in logu nostru mancai pro imoi e tanti is nùmeros non siant ancora malos. In Carbònia is positivos artziant a 41 e in Igrèsias a 32 (cun 168 in corantena, datu de su 14 de abrile); in Domunosa is positivos sunt 38 e 38 puru in Carloforte cun 5 ricoverados e 91 personas in corantena. in Santu Giuanni Suèrgiu is positivos sunt 9 cun su trasportu iscolàsticu suspèndiu de su totu e is iscolas elementares e s’asilu serradas. Novas bonas dae Giba aundi abarrant sceti 2 positivos; 1 sanadu e 1 positivu nou in Villaperùciu e iscola elementare serrada. In Portescusi puru si sinnialat 1 positivu nou. Unu muntone de classes abarrant in domu in Santadi, Nuxis, Sant’Antiogu e Igrèsias pro mellus siguresa ma in custos comunos, francu che Igrèsias, no nc’at agiornamentos disponìbiles in contu de su datu de is cuntagiados. Nc’eus passadu sa prima cida in zona arrùbia nos tocat a tènnere passièntzia e a sighire a abarrare atentos rispetende semper is normas de igene e de distàntziamentu sotziale. Abarrade sanos!
a cura di Roberto Pinna
