Dae Mèrcuris 22 is studentes de s’iscola mèdia Pàscoli de Carbònia, acumpangiados dae si professores e dae is mammas e is babbos insoro, pro tres dies sunt andados a protestare in pratza Roma proite chi sa palestra de s’iscola est istada posta pro tzentru vacinale e duncas non podent fàere educatzione fìsica nemancu podent essire in sa pratza pro fàere sa ricreatzione e ant dimandadu de atobiare a su sìndigu. Paola Massidda at nadu ca de custu scioberu at informadu su dirigente iscolàsticu su primu de martzu e chi su fàbbricu est s’ùnicu in su territòriu de Carbònia cun is caraterìsticas prevèdidas dae is protocollos de siguresa (superfice, servìtzios, tzentralidade de s’istrutura) e chi, mancai cumprendat is esigèntzias de is piciocheddus de iscola, sa campagna vacinale est prioridade prus manna pro chi si torrit a lestru a sa normalidade.
Pertantis s’at a obèrrere unu tzentru de vacinatzione in Santu Giuanni Suèrgiu chi si aciungit a is de Sant’Antiogu e Carbònia e fintzas Andrea Pisanu chi est sìndigu de Giba e presidente de s’Unione de is Comunos de su Sulcis at dimandadu a s’ATS de abèrrere una sea destinada a su Sulcis de Bàsciu, sende chi in custos comunos is personas antzianas sunt medas e a bortas pro issas afrontare unu viàgiu, chi mancai durit sceti mesora, podet èssere traballosu e difìcile.
Nc’at una novidade istravanda pro is utentes de su SBIS (Sistema Bibliotecàriu Interurbanu de su Sulcis): giòbia 26 de martzu ant presentadu s’intrada de su Sistema in su MLOL, chi est biblioteca digitale italiana prus importante. Duncas a lestru is utentes, de chi si sunt registrados in su sistema, ant a pòdere lìgere, oberende calisisiat aina eletrònica, is e-book de is editores italianos printzipales (si podent pigare in prèstidu pro 14 dies), 7.000 giornales de totu su mundu, e unu muntoni de àteras resursas digitales. Est a disponimentu puru unu catàlogu “OPEN” de aundi si podet atzedere a is colletziones digitales de àteras istitutziones (audiolibros, e-book, ispartidos musicales, mapas e documentos) chi ant a èssere semper a atzessibiles a totus.
Cenàbara 26 ant presentadu su progetu “Arraixinas: contus de tzitadinàntzia” - “Radici: racconti di cittadinanza”, promòvidu dae s’Unione de is Comunos “Metalla e il Mare” e dae su Comunu de Igrèsias e destinadu a is giòvunos dae 14 a 35 annos. Is chi ant a partecipare, cun d-unu camminu articoladu chi tenit a tema su “contare”, ant a esplorare su cuntzetu de tzitadinàntzia sarda, italiana e europera e ant iscobèrrere is raighinas gràtzias a su diòlogu intr’e antzianos e giòvunos, chi bolet èssere una manera pro arresonare s’idea de solidariedade in su tempus passadu e in su de oe. In prus s’ant a informare is giòvunos de is oportunidades promòvidas dae s’Unione Europea in su setore se is iscàmbios culturale, de su volontariadu, de s’ocupatzione e de s’atzessu a su vida pùbblica istatale e regionale. S’ant a fàere 6 atobios formativos on line, unu cuncursu fotogràficu a pitzus de su tema de sa solidariedade e videointervistas dòpias.
Est sighende a andare bene su Carbònia Calcio in su girone G de serie D. Domìniga at bintu 4 a 0 in su campu de Santadi contras a su Giuliano e a pustis de 21 partidas giogadas est su de 5 postos a sola cun 36 puntos in su prenu de sa zona playoff.
Agiornamentu de sa situatzione covid de su territòriu. Mancai is datos de s’ìsula siant impeuados meda custa cida passada, sa provìntzia de su Sud Sardigna sighit a tènnere datos bonos. Puru in logu nostru sa situatzione parit istàbile. Su virus at cassadu a Debora Porrà chi est sìndigu de Bidda Massàrgia e a su consilieri comunale de Carbònia Federico Fantinel. Toteduos dd’annuntziadu cun d-unu vìdeo in Facebook. In Santadi su sìndigu at fatu ischire chi totu su giunta comunale, de chi at tentu unu cuntatu cun d-unu positivu, est negativa e at acabadu sa corantena. In Portescusi abarrat unu casu sceti, 4 in Carloforte. in Giba is casos de positividade sunt 7, cun 14 in corantena cun is iscolas serradas. Situatzione idèntica in Gonnesa e in Domunosa: 3 positivos e iscolas serradas in toteduos is comunos. De sinnilare chi Massimiliano Ventura at fatu apellu pro chi is chi sunt positivos rispetint sa corantena e sinnialint in manera pretzisa is cuntatos istrintos insoru pro firmare s’ispainadura de su virus. Chini iscriet no at agatadu datos de Carbònia e de Igrèsais.
Ocannu puru eus a fàere Pasca Manna praticamente in corantena comente s’annu passadu etotu. In Igrèsias is ritos de sa Cida Santa si faghent in forma ridùsida cun is intradas cuntingentadas e is ambientes sanificados aici a comente prevedint is normas anticovid.
Chini iscriet custa rubrica bosi faghet s’augùriu de nche passare Pasca Manna in serenidade e allerghia e de abarrare semper sanos!
a cura di Roberto Pinna
