Giòbia 18, a pustis de is protestas de is traballadores incumentzadas cun d-unu sit-in de protesta de fronte a s’intrada de su stabilimentu, de is organizatziones sindacales e is decraratziones polèmicas de s’assessore regionale a s’ambiente Gianni Lampis, sa Sider Alloys at decraradu chi at mandadu totu sa documentatzione a s’Assessoradu regionale a s’Ambiente la documentazione chi serbit pro incarrerare sa Valutatzione de Impatu Ambientale e at cunfirmadu sa disponibilidadi a collaborare con totus is istitutziones pro fàghere andare a innantis su progetu produtivu.
In Pratza Sella in Igrèsias ant postu su defibrilladore chi ant comporadu gràtzias a su progetu Iglesias Cardioprotetta, incarreradu dae s’assòtziu Alberto Riccaboni. In prus cun sa collaboratzione de de “Irc Comunità” e “Accademia del Soccorso” ant ativadu puru is cursos de primu agiudu a manera de formare unun nùmeru semper prus mannu de personas.
Cenàbara a mengianu in Sant’Antiogu sa Guàrdia Forestale at fatu un’operatzione manna meda de controllu in is domos de 5 personas chi sunt collegados a su mundu de sa pisca abusiva. S’operatzione, coordinada dae sa Procura de Casteddu, est consighèntzia de is fatus de su 21 de su mese de gennàrgiu passadu candu iant postu fogu a is mezos navales de sa Forestale. S’operatzione, aundi ant partzetzipadu 90 òmines de is istatziones de sa Sardigna de bàsciu, est acabada cun sa notìfica de 5 avisus de garantzia.
In Igrèsias is organizadores de sa Fiera de su Libru, chi ocannu arribat a sa de ses editziones ant annuntziadu su tema de ocannu: <<candu ses prexadu meda, dona atentzione>>. Sa Fiera, ocannu puru, pro more de sa pandemia movit a s’atòngiu: s’at a fàere dae su 29 de cabudanni a su 4 de ladàmine.
Agiornamentu covid de sa situatzione covid. A pustis de is polèmicas pro su decretu de Draghi chi permitiat a is residentes in zona arrùbia de mòvere in Sardigna, su sìndigu de Sant’Antiogu su 17 de martzu at emìtidu un’ordinàntzia chi imponiat sa corantena a totus is foresus. Duas dies a pustis su Presidente de sa Regione at bogadu a campu s’ordinàntzia chi permitiat de lòmpere in Sardigna sceti a is chi teniant su tampone negativu o opuru depiant fàghere 10 dies de corantena obbligatòria. Nche fiat calincuna duda a pitzus de sa legitimidade de s’ordinàntzia (fortzis in cuntrastu cun s’artìculu 120 de sa Costitutzione) ma a s’acabada nc’at pentzadu su Guvernu natzionale a risòlvere totus is problemas: infatis, a dolu mannu nostru, mancari totus is àteros indicadores fèssint bonos meda, s’ìndighe RT e arztiadu a pitzus de 1,08 e custu at fatu intrare sa regione dereta zona in colore de aràngiu sende ca fintzas a su 6 de abrile sa zona groga no esistit prus. Duncas torrant a serrare bar e ristorantea (permìtidu sceti s’asportu) e totus is sitos turìsticos chi però fiant tancados su fine de chida, s’ant a ridùsere is letziones in presèntzia pro is chi andant a s’iscola superiore.
In su territòriu sa situatzione parit istàbile: in bona sustàntzia candu nde sanat si nde ammaladiat. In Igrèsias ddoi at 24 positivos, con 3 arricoverados ma 107 personas sunt in corantena. In Carbònia is casos sunt 21, si signalat 1 casu in Tratalias, in Gonnesa abarrat 1 positivu sceti, in Carloforte ddoi at 8 positivos (1 ricoveradu), in Portescusi abarrant 3 casos ma nd’at 11 in corantena; in su sìndigu de Santadi at fatu ischire chi no nc’at sceti una persona in corantena ma chi sa ATS no est agiornende s’elencu de is personas sanadas. In su mentris in Sant’Antiogu (in su palàtziu de s’isport) e in Carbònia (in sa palestra de s’iscola Pascoli) domìniga a mengianu est incumentzada sa campagna de vacinatzione puru pro is over 80. In totu ant fatu su vacinu a 800 personas, s’ispera de totus est chi si fatzat a lestru pro coitare a torrare a sa normalidade.
Dd’eus sèmper iscritu in custa rubrica: a torrare a segus est unu momentu e aici est acuntèssidu. Pro torrare in zona bianca e tènnere unu pagheddu de libertade in prus est pretzisu a rispetare is normas de igene e distantziamentu sotziale. Abarrade sanos!
Roberto Pinna
