Sa cida sulcitana in curtzu. Dae su 27 de mese de argiolas a su 2 de austu
Custa cida puru sunt arribados algerinos meda in su Sulcis. Intr’e lunis e martis nd’arribadu giai 70, a bortas isbarcados deretos in is pràgias, àteras bortas ddos ant tragados a su portu de Ponti sa Guàrdia de Finantza. Duncas sunt istadas dies de traballu mannu pro is Fortzas de s’Òrdine impegnadas a nde-ddos pinnigare e lòmpere a su tzentru de collidura de Muristenis chi ormai est prenu. Sa situatzione est ancora prus cumplicada proite in 8 sunt risurtados positivos a su tampone de su coronavirus e est crescende puru sa cimbella de is amministradores locales e fintzas de sa gente comuna. Est giustu a nàrrere chi assumancus is istràngios chi tentant de arribare in manera clandestina sunt controllados e postos in isolamentu, invècias a is turistas chi sunt arribende, mancai si depant registrare in sa app Sardegna Sicura, no ddos controllat nisciunus.
Est istàda una cida mala pro su chi pertocat is fogos in totu sa Sardigna. In logu nostru gràtzias a is interventos lestros de sa Guàrdia Forestale, de is Pompieris e de is iscuadras de sa Protetzione Civile e s’agiudu de s’elicòteru de sa base de Marganai, is fogos chi ant atacadu in Santu Giuanni Suèrgiu, in Carbònia e in Villaperùciu sunt stètius firmados sena de fàghere dannu meda (prus traballosu meda su de domìniga in Igrèsias). Curiosu su chi est acuntèssidu mèrcuris a mangianu in su sartu de Piscinas. Is òmines de su 5° Reggimento Genio de Macumere sunt bènnidos pro fàghere iscopiare, in d-una gava isbandonada e in siguresa, un’ordignu chi at agatadu unu piscadore 2 cidas a coa in sa zona de Porto Pino ma calincuna cosa no at funtzionadu bene: a comente ant atacadu is detonadores s’iscòpiu at fatu partire ispetzones in dònnia logu e in d-unu momentu est partidu unu fogu in is campos a giru chi is òmines de sa Forestale ant istudadu in pagu minutos.
Giòbia in Teulada ant presentadu su lìbru de Micheli Ladu “Riu Mannu – The land(g)uage Grabbing”. Custu lìbru est piticheddu in su nùmeru de is pàginas ma est mannu meda e fungudu in s’arrexonu. Infatis, movende de un’esperièntzia chi ant fatu totus is chi sunt nàschidos dae is annos 50 finas a is annos 80, sa bìsita militare, tratat in manera lèbia e irònica chistiones chi sunt de importu mannu pro su benidore de sa Terra nostra. Su libru est iscritu totu in sardu – a parridade de s’autore non beniat bene a ddu iscrìere in italianu – e duncas est fintzas un’esperimentu linguìsticu: cun d-unu pagu de passièntzia e mancai cun s’agiudu de unu vocabolàriu, chini connoscit su sardu ddu ligit in pagu ora e est siguru chi si ispassiat.
Cida passada s’est scìpidu chi sa dita Ichnusa Wind Power srl, at presentadu unu progetu pro cuncordare a 35 km dae sa costa, unu parcu fatu de 42 turres eòlicas artas 225 metrus capassu de prodùsere sa potèntzia totale de prus de 500 Megawatt. Sigundu su progetu custas turres non s’iant a deper biere dae sa costa e s’impatu ambientale at a èssere bàsciu. Cenàbara Est arribada sa reatzione de is amministratziones comunales de Portescusi e de Carloforte. Su prexu no est meda: si chesciant proite chi is istitutziones locales sunt is ùrtimas a connoschere “cosas” chi sunt de importu mannu pro sa vida de is comunidades insoru, non sunt previstos benefìtzios econòmicos, e in prus cusut progetu iat a pòder pònnere in perìgulu sa pisca de sa turina, chi est un’atividade econòmica importante pro Carloforte e Portescusi chi in is ùrtimos annos fiat unu de is volonos de su turismu locale e in prus nc’at s’arriscu mannu de ismenguare su valore de su paesàgiu.
Sàbudu primu de austu, a pustis de 10 meses de traballos e de is restritziones pro mori de su coronavirus, at torradu a abèrrere sa Basìlica de Sant’Antiogu, Patronu de Sardigna. S’obispu nostru monsignor Zedda at cunsacradu s’àrtari noa e a pustis at nomedadu is predis chi ant a andare a in d-unas cantu parròchias sulcitanas. Duncas pro imoi e tanti pagu festa, ma rispetende is normas anticovid, si podit intrare e ammirare in totu sa bellesa sua sa “domu” de su Santu e de siguru in su benidore su pòpulu sulcitanu at a torrare a festare su Protetore de Sardigna a comente ddi minescit.
Domìnigu in Santadi ant fatu sa de 52 editziones de sa coja meurreddina, s' isposòriu traditzionale organizadu dae sa Pro Loco de Santadi. Ocannu pro mori de is restritziones previstas dae is normas anticovid no est bènnidu bene a fàghere s’isfilada cun is grupos folk chi arribànt dae totu sa Sardigna e nemancu su cumbidu e totus is àteros ispetàculos de mùsica folk e is mostras de sa traditzione sarda.
Roberto Pinna
